Romans 11:1-36
11 Áko naʼídíshkidgo ádíshní: Diyin God daatsʼí bidineʼé yóóʼiidííʼą́? Tsʼídá dooda lą́ą! Jó, shí ałdóʼ Ízrel dineʼé, Éíbraham bitsʼą́ą́dóó ahoolchíiłii nishłı̨́, Bénjamin bidineʼíígíí nishłı̨́.
2 Diyin God bidineʼé hodeeyá tʼáá bítséedi néidiinilii doo yóóʼiidííʼą́ą da. Diyin God bizaad bee akʼeʼashchíinii Iiláíjah yaa halneʼiísh doo nihił béédahózin da? Éí Ízrel dineʼé baa yájíłtiʼgo Diyin God níjookąąh yę́ędą́ą́ʼ kózhdííniid,
3 Bóhólníihii nílíinii, ná dahalneʼii yę́ę nideistseed,bikááʼdóó nichʼįʼ náádaʼiiniih nítʼééʼ yę́ę dayííłchǫʼ.Tʼáá shí tʼéiyá yisdziih,ákondi shináádaʼniiłhı̨́.
4 Nidi Diyin God éí Iiláíjah haʼátʼíísh yidííniid? Jó ání,
Diné tsostsʼidi míilgo ałdóʼ tsʼídá tʼah doo eʼelyaiiBéíyal wolyéii yichʼįʼ nitsidadeegeehii tʼáá shí ádá áásésįįd.
5 Díí kʼad hoolzhishígíí biyiʼ ałdóʼ tʼáá ákótʼé. Tʼáá díkwííhí tʼéiyá Diyin God bibee ajoobaʼ bee yitah yiyiizlááʼ.
6 Jó, Diyin God bibee ajoobaʼ bee yitah yiyiizláaʼgo yáʼátʼéehgo ádajooníłígíí doo bee atah hwiizláaʼ da; éí doodaléiʼ yáʼátʼéehgo ádajooníłígíí beego éí Diyin God bibee ajoobaʼ doo ajoobaʼ átʼée da. Nidi yáʼátʼéehgo ádajooníłígíí bee atah hwiizláaʼgo éí Diyin God bibee ajoobaʼ doo bee atah hwiizláaʼ da doo, éí doodaléiʼ yáʼátʼéehgo ádajooníiłii éí doo tʼáá aaníígóó yáʼátʼéehgo ádajooníił da.
7 Ákoshąʼ haitʼé? Jó, Ízrel dineʼé hádaatʼíinii tʼáadoo shódayoostʼeʼ da. Diyin God atah yiyiizláʼígíí tʼéiyá shódayoostʼeʼ; łahjįʼígíí éí doo daʼdiitsʼaʼ da daazlı̨́ı̨́ʼ.
8 Tʼáá Diyin God bizaad bee akʼeʼashchíinii ánínígi átʼéego,
Doo akʼidaʼdiitįįhgóó Diyin God ábiilaa;binááʼ doo yee daʼooʼı̨́ı̨́góó,índa bijaaʼ doo yee ádahodiiltsʼaʼgóó áyiilaa.Dííshjı̨́ı̨́góó ákóhootʼé, níigo ání.
9 Áádóó David ałdóʼ ání:
Bíniʼdii biʼádaʼazįįd łoh índa bee ódleehí yileeh,áádóó bíniʼdii yikʼee dadigeehgo atíbiʼdilnééh!
10 Bíniʼdii doo daʼooʼı̨́į da dooleeł biniyé binááʼ ádaniłdįįh,áádóó tʼáá áłahjįʼ bichʼįʼ nidahwiiłnáanii bikʼijįʼ dandaaz leʼ.
Doo Jew dineʼé danilíinii yisdáʼiildééh bá hazlı̨́ı̨́ʼ
11 Áko ninááʼídíshkid: Daʼ Jew dineʼésh nidaʼiisíihgo biniinaa yaa dínéezdeeʼ? Tsʼídá dooda lą́ą! Nidi nidaʼiisíhígíí biniinaa doo Jew dineʼé danilíinii yisdáʼiildééh bee hazlı̨́ı̨́ʼ, Jew dineʼé daʼjoołchʼı̨́ı̨́d dazhdooleeł biniyé.
12 Jew dineʼé nidaʼiisíhígíí biniinaa nihokááʼ dineʼéda bikʼihodzisdliʼ, áádóó Jew dineʼé chʼééh daʼoodląąhígíí biniinaa doo Jew dineʼé danilíiniida bikʼihodzisdliʼ, áko Jew dineʼé daʼoosdląądgo índa, nihokááʼ dineʼé tʼah biláhídi átʼéego bikʼidahojidlíi dooleeł.
13 Kʼad éiyá doo Jew dineʼé danohłíinii nihichʼįʼ yáshtiʼ: Doo Jew dineʼé danilíinii bichʼįʼ yilʼaadii nishłı̨́įgo, naashʼaʼígíí shił nilı̨́įgo íínísin.
14 Áko tʼáá haʼátʼéhígoda shidineʼé, Jew dineʼé danilíinii, daʼoołchʼı̨́įdgo ádadeeshłíiłgo binahjįʼ yisdáhidookah nisin.
15 Háálá Jew dineʼé éí Diyin God nahjįʼ kóhoolaago nihokááʼ dineʼéda yił kʼé náʼahidooʼniidgo Jew dineʼé éí Diyin God yił kʼé náʼahididooʼniiłígíí dooládóʼ baa hózhǫ́ǫ da! Aninéédę́ę́ʼ nídahiiʼnaʼígíí dooleeł!
16 Taosʼniiʼ átsé bidooltsʼiʼii dílzingo nááhaazniiʼgo taosʼniiʼ tʼáá siʼą́ą́ nítʼééʼ ałdóʼ dílzin doo, áádóó tsin bihétłʼóól dílzingo bitsʼádaozʼaʼ ałdóʼ dílzin doo.
17 Áliv sikaadii* bitsʼáozʼaʼ łaʼ nahgóó adahaastiʼgo, áko ni, doo Jew dineʼé nílíinii, áliv sikaadii tʼáá ádzaagóó haníísáanii bitsʼáozʼaʼ nílı̨́įgo, nahgóó aheestiʼii bitsáskʼehgi aghą́ą́h níʼdootsigo, áko áliv bihétłʼóól tʼáá íiyisí yee bidziilgo nooséełii bił ałtsʼą́ą́ʼ aníłkʼiiz doo.
18 Éí bąą atsʼáozʼaʼ nahgóó aheestiʼii tʼáadoo bilááh ánítʼéego ádaa hóʼniihí. Nidi ádaa hóʼniih ládą́ą́ʼ díí béénílniih, ni éí atsʼáozʼaʼ nílı̨́. Atsʼáozʼaʼ éí tsehétłʼóól doo de áyósin da, nidi tsehétłʼóól éí atsʼádaozʼaʼ de ádayósin.
19 Ákondi ádidííniił, Aghą́ą́h shidiʼdootsih biniyé atsʼáozʼaʼ dajílíinii nahgóó adahoʼdiistiʼ.
20 Éí tʼáá aaníí. Jó, éí doo daʼoodlą́ą́góó biniinaa nahgóó adabiʼdiistiʼ, nidi ni éí neʼoodląʼ bee doo nahgóó andiʼdootih da. Áko tʼáadoo ádaa hóʼniihí, tʼóó hodíínísin.
21 Háálá Diyin God éí íiyisí atsʼáozʼaʼ danilíinii tʼáadoo ánéísįįd da, áko ni ałdóʼ doo ádaa áhólyą́ą́góó doo áandoosįįł da.
22 Éí bąągo Diyin God beʼajoobaʼ, índa tʼáá hashkée yee atíʼéłʼíinii baa ákoniizįįh. Jó, Jew dineʼé dajílíinii doo daʼjoodlánígíí biniinaa tʼáá hashkée atíháłʼı̨́, nidi ni tʼéí Diyin God bibee ajoobaʼ yee naa joobaʼígíí baa ákoniizįįh. Áłahjįʼ baa dzíínílíigo hinínáago naa joobaʼ doo, éí doodago ni ałdóʼ tʼóó nahjįʼ andiʼdootih.
23 Áádóó Jew dineʼé danilíinii daʼoosdląądgo aghą́ą́h nídabididootsihgo átʼé, háálá Diyin God aghą́ą́h nídabididootsihgo yíneelʼą́.
24 Áliv sikaadii tʼáá bíniʼ haníísáanii bąąhdóó naniʼdootiʼgo, Diyin God tʼáadoo bá nantłʼaaí áliv kʼidoolyáii bighą́ą́h nánidiʼdootsih, dooládóʼ Diyin God tʼáadoo bá nantłʼaaí Jew dineʼé éí áliv kʼidoolyáii bitsʼáozʼaʼ danilíinii yighą́ą́h nídeididootsih da lá.
Diné tʼáá ádzíłtso Diyin God haa aʼááh nízin
25 Shikʼisóó, doo ádaa dajíínóhdlíi da doo biniyé díí doo bééhózin da yę́ę nihił béédahózin doo nihóshʼní. Jó, Ízrel dineʼé łaʼ kʼad doo daʼoodlą́ą́góó doo ádahodiiltsʼaʼ da daazlı̨́ı̨́ʼ. Nidi doo Ízrel dineʼé danilíinii Diyin God bíká ádííniidígíí tʼáá ałtso baa náhaaskaigo índa, Ízrel dineʼé bił chʼéédadidoodlałgo átʼé.
26 Áadi índída Ízrel dineʼé tʼáá ałtso yisdádookah, tʼáá Diyin God bizaad bee akʼeʼashchíinii ánínígi átʼéego:
Yisdáʼiiníiłii Záiyandę́ę́ʼ doogááł,doo dahozdísin nítʼééʼ yę́ę Jéíkab bitsʼą́ą́dóó daʼahílchíihii yitsʼéidoonił.
27 Áko bibąąhági ádaatʼéii bitsʼáhidíʼą́ągoínda bidziilgo bił ahadadiʼdeeshtʼááł.
28 Jew dineʼé éí haneʼ yáʼátʼéehii doo deiniizı̨́ı̨́ʼgóó bąą Diyin God yiʼanaʼí daazlı̨́įʼgo nihíjígo nihá yáʼíítʼééh. Nidi ałkʼidą́ą́ʼ Jew dineʼé dabizhéʼé yę́ę Diyin God nábiizláʼígíí binahjįʼ tʼah nidi Jew dineʼé ayóóʼáyóʼní.
29 Háálá Diyin God diyingo ainíláii áádóó áká ádííniidgo tsʼídá doo łahgo ánáyódleʼ átʼée da.
30 Nihí, doo Jew dineʼé danohłíinii, Diyin God doo deinohdlą́ą da nítʼééʼ, nidi Jew dineʼé éí Diyin God doo dayoodlą́ą da daazlı̨́ʼígíí biniinaa kʼad nihí Diyin God nihaa aʼááh niizı̨́ı̨́ʼ.
31 Tʼáá ákótʼéego Jew dineʼé kʼad Diyin God doo dayoosdląądígíí bąą Diyin God nihaa aʼááh niizı̨́įʼgo binahjįʼ bí ałdóʼ Diyin God baa aʼááh dínóozįįł.
32 Háálá Diyin God éí diné tʼáá ałtso yaa aʼááh dínóozįįł biniyé tʼáá ádzíłtso doo oodlą́ yaa hodiníʼą́.
33 Dooládóʼ Diyin God hóyą́ągo tʼáá ałtsoní bił bééhózin da! Dooládóʼ yee nihwiiʼaahii doo bikʼizhʼdootą́ą́ʼ átʼée da! Dooládóʼ bihonítʼiʼii doo bééjółkaah átʼée da!
34 Háishąʼ Bóhólníihii bintsíkees hoł bééhózin? Háishąʼ Bóhólníihii kótʼéego yiłníí nítʼééʼ?
35 Háishąʼ hachʼįʼ ninádadoodleeł biniyé Bóhólníihii bazhʼnílá?
36 Háálá Bóhólníihii tʼáá ałtsoní áyiilaa, tʼáá ałtsoní nayiiłná, tʼáá ałtsoní bee bóhólnííh. Hoolʼáágóó baa haʼniih doo. Tʼáá ákótʼée doo.
Footnotes
^ Áliv sikaadii éí Jew dineʼé ááhyiłní.
