Romans 13:1-14
13 Diné tʼááłáʼí jinítínígo honanitʼaʼí bídahojíłníih doo. Háálá bee óhólníihii tʼáá ałtso Diyin God bitsʼą́ą́dę́ę́ʼ hólóonii ádaatʼé, áádóó nihinanitʼaʼí bibee ídahólníihii tʼáá ałtso Diyin God bitsʼą́ą́dę́ę́ʼ dahólǫ́.
2 Éí bąą bídahólníihii dooda bee bichʼįʼ nidzisteeʼii, éí Diyin God bibikʼeh hoogáałii bichʼįʼ dooda bee nidzisteeʼgo átʼé, áko dooda bee nidzisteeʼii bee haa nídahódóotʼįįłii ákʼijįʼ bídajílná.
3 Háálá bídahólníihii diné yáʼátʼéehgo dayíkáahii doo yił yééʼ ádahósin da, nidi diné doo yáʼádaashóonii tʼéiyá yił yééʼ ádahósin. Doósh bídahólníihii bitsʼąą sínítiʼ da doo, danohsin? Yáʼátʼéehgo ááníił leʼ, áko nizhónígo naa haniih doo.
4 Háálá ná yáʼátʼééh biniyé éí Diyin God yá naalʼaʼí nilı̨́. Nidi doo ákǫ́ǫ́ ánítʼı̨́ı̨́góó éí bikʼee nił yéeʼ doo, háálá doo tʼáadoo biniyéhígóó bibee adziilii hólǫ́ǫ da. Jó, éí Diyin God yá naalʼaʼí nilı̨́įgo doo ákǫ́ǫ́ ájítʼíinii Diyin God tʼóó báhádzidgo bibee atéʼélʼíinii yee atíhodoolííł.
5 Éí bąą diné tsʼídá akʼeh hojíłʼı̨́į doo, tʼáá hazhóʼó Diyin God tʼóó báhádzidgo bibee atéʼélʼíinii tʼéiyá bitsʼąą ájítʼı̨́į dooleełgo éí dooda, nidi tʼáá ákogi átʼéego baa ákoznízingo ałdóʼ biniyé akʼeh hojíłʼı̨́į doo.
6 Tʼáá éí ałdóʼ bąą tax nidahohłé, háálá nihinanitʼaʼí éí Diyin God yá nidaalnishgo tsʼídá éí yindaalnish.
7 Éí bąą tʼáá ałtso tʼáá yą́ą́h danilı̨́įgo ádabidiʼdoolnííł góneʼ bichʼįʼ ádaahnííł, yáál bihididzóhígíí bichʼįʼ nahalyéii yáál bihididzóhígíí bichʼįʼ nidahohłé, tax bichʼįʼ nahalyéii tax bichʼįʼ nidahohłé. Diné dahodísin yą́ą́h danilíinii dadíínóhsin, diné ił ílı̨́ yą́ą́h danilíinii nihił danilı̨́.
Tʼáá łaʼ haʼoojééʼ kʼehgo ayóóʼádaʼahíínóhʼní
8 Diné łaʼda tʼáadoo leʼé yee tʼáadoo nihąąh hayííłʼáhí, nidi ayóóʼádaʼahíínóhʼnínígíí tʼéiyá bee ahąąh hadasoołʼáa doo. Yił kééhatʼíinii ayóóʼáyóʼníinii éí bee hazʼáanii yeʼełʼı̨́.
9 Háálá díí bee hazʼą́: Tsʼídá doo azhdilée da, Diné tsʼídá doo diyííłhéeł da, Tsʼídá doo azhniʼįįh da, Tsʼídá doo tʼáá ádzaagóó hojilneʼ da, Tsʼídá doo adázhnoolníi da, nínígíí áádóó tʼááłáhídi haʼoodzíʼígíí bee, bee hazʼáanii tʼáá átʼé biʼalʼı̨́įgo kóní, Tʼáá ni ádííníʼnínígi átʼéego bił kééhótʼíinii ayóóʼííníʼní.
10 Ayóóʼóʼóʼníinii éí yił kééhatʼíinii doo niyiiłchxǫǫh da, éí bąą ayóóʼóʼóʼníinii éí bee hazʼáanii tʼáá átʼé yiʼósinii nilı̨́.
Christ nínáádoodááł bichʼįʼ yoołkááł
11 Ákótʼéego dahinohná, háálá Jesus nihíká níyáago yisdánihidooniłígíí kʼad koshídę́ę́ʼ hoolzhishgo nihił béédahózin. Daʼiisiidląąd yę́ędą́ą́ʼ ánízah hadziih yę́ę kʼad tʼáá biʼoh ánízah hadziih. Áko tʼáá íídą́ą́ʼ chʼéédadiidziłjįʼ ahoolzhiizh.
12 Nízaadgóó ayííłką́, kʼadę́ę hoolʼįįh lá. Áko haaʼíshąʼ chahałheełgóó baa nideiikaii yóóʼadahididiitʼááł, áádóó adinídíínjí bee naʼabaahii bee hadadidiiʼnííł.
13 Haaʼíshąʼ jı̨́įgo áhátʼínígíí beełtʼéego hazhóʼó ádeiiʼníił doo, tʼáadoo adlą́ baa nideiikaií, tʼáadoo tó tsiʼnaʼiiłáii deiidlání, tʼáadoo ajił baa nideiikaií, tʼáadoo baaʼihgo adádaniilníní, tʼáadoo ahináádadiijahí, índa tʼáadoo daʼahiilchʼı̨́dí dooleeł.
14 Nidi Bóhólníihii Jesus Christ bee hadadohneʼ, áádóó tsʼísee kʼehgo bidádahonooníinii tʼáadoo bá nahosoołʼání.
