Romans 14:1-23
14 Diné biʼoodląʼ doo bidziilígíí éí kʼé dabidohní, nidi bintsékees tʼáá sahdii átʼéhígíí biniinaa tʼáadoo bił ałghadaʼdohtʼáhí.
2 Diné łaʼda biʼoodląʼ binahjįʼ chʼiyáán tʼáá silı̨́ʼígíí yiyą́ą dooleełgo éí yidooyı̨́ı̨́ł, nidi diné biʼoodląʼ doo bidziilígíí éí naniseʼ bił daʼadáanii tʼéiyá yiyą́.
3 Diné tʼáá azlı̨́ʼígíí jiyáanii éí náánáłaʼ diné doo yiyáanii tʼáadoo bilááh áníshtʼé jiníziní doo, áádóó naniseʼ tʼéiyá jiyáanii éí tʼáá azlı̨́ʼígíí yiyáanii tʼáadoo baa níjítʼíní doo, háálá Diyin God bił nilı̨́įgo nábidiiłtı̨́.
4 Náánáłaʼ naatʼáanii yá naalʼaʼí baa nánítʼı̨́įgo haʼátʼíísh biniyé baa nánítʼı̨́? Jó, yáʼátʼéehgo nijilnishgo, doodaiiʼ doo yáʼátʼééhgóó nijilnishgo, éí hananitʼaʼí tʼéiyá bee bóhólníihgo haa nídóotʼįįł. Hanaanish yáʼátʼéehgo ájoolíił doo, háálá hó Diyin God hadziil áhósingo yíneelʼą́.
5 Diné łaʼda yoołkáałii łaʼ tʼah atisígo átʼéego yidísin łeh, nidi diné łaʼ náánásdzı̨́, éí yoołkáałii tʼáá ałtso aheełtʼéego yidísin łeh. Bíniʼdii diné tʼááłáʼí nítínígo tʼáá bí doo bił naaki danilı̨́ı̨́ góneʼ yaa nitsídaakees.
6 Tʼáá háiida łaʼa jı̨́ hodílzinígíí jidísinii éí Bóhólníihii hoł nilı̨́įgo jidísingo ájítʼı̨́. Áádóó tʼáá háiida łaʼa jı̨́ hodílzinígíí doo jidísin da nidi Bóhólníihii hoł nilı̨́. Diné łaʼda tʼáá azlı̨́ʼígíí jiyáanii éí ałdóʼ Bóhólníihii hoł nilı̨́įgo tʼáá azlı̨́ʼígíí jiyą́, háálá Diyin God bichʼįʼ ahééh jinízingo ájítʼı̨́. Tʼáá azlı̨́ʼígíí doo yiyáanii éí ałdóʼ Bóhólníihii bił nilı̨́įgo doo tʼáá azlı̨́ʼígíí yiyą́ą da, áádóó Diyin God yichʼįʼ ahééh nízingo átʼı̨́.
7 Diné doo łaʼ tʼáá ádííghahígo hináa da, índa diné doo łaʼ tʼáá ádííghahígo daatsaah da.
8 Dahiniiʼnáago Bóhólníihii bá dahiniiʼná, índa daniiʼnéego Bóhólníihii bá daniiʼné. Éí bąą dahiniiʼnáago, éí doodaléiʼ daniiʼnéego Bóhólníihii bííʼ daniidlı̨́.
9 Háálá daneeznánígíí índa dahinánígíí éí Bóhólníihii hwee bóhólníih dooleeł biniyé Christ daaztsą́ áádóó hinááh násdlı̨́ı̨́ʼ.
10 Haʼátʼíishąʼ biniyé nikʼis baa nánítʼı̨́? Éí doodaléiʼ nishąʼ haʼátʼíí biniyé nikʼis jiiníłá? Háálá tʼáá áníiltso Christ* bibikááʼdóó ánihwiitʼaah bidááhdóó deidiidzįįłgo nihaa nídahódóotʼįįł.
11 Jó, Diyin God bizaad bee akʼeʼashchíinii ání:
Tsʼídá tʼáá aaníí hinishná, ní Bóhólníihii,tʼáádóo nídí ałdóʼ diné tʼáá ałtso shichʼįʼ nitsidazhdidoogoh.Tʼáá ádzíłtso Diyin God jílı̨́, dashijiníi doo.
12 Ákohgo tʼááłáʼí niitínígo Diyin God bichʼįʼ ádaa nidahodiilnih.
Nikʼis tʼáadoo naníłtłʼaí
13 Éí bąą haaʼíshąʼ doo ahaa nínáádeiitʼı̨́į da doo, nidi nihikʼisóó łaʼ yikʼee bąąhági ádooníiłii, doodaiiʼ bidínóołtłʼahii tʼáadoo bidáahjįʼ adahohʼníłí dooleełjí bee hashtʼeʼnitsídadoohkos.
14 Bóhólníihii Jesus binahjįʼ doo shił naaki nilı̨́ı̨́góó díí shił bééhoozin, tʼáá ałtso yáʼádaatʼéeh nidi doo yáʼádaatʼéeh da jinízinígíí éí tʼáá ádííghahígo doo hoł yáʼátʼéeh da.
15 Yíníyą́ʼígíí nikʼisóó łaʼ bee bąąh nahwííníłkaadgo tʼáadoo bahatʼaadí doo ayóóʼííníʼníi da sínílı̨́ı̨́ʼ. Yíníyą́ʼígíí bee Christ bá daaztsáanii łaʼ bee wóółchǫǫh lágo.
16 Haʼátʼíida nihił yáʼátʼéehgo tʼáadoo nihitsʼą́ą́ʼ nichǫ́ʼógo ádaahłíiłii baa yátiʼí.
17 Tʼáá haʼátʼíhígíida yidáanii, doodaiiʼ tʼáá haʼátʼíhígíida yidláanii éí Diyin God bee bóhólníihgo bił hazʼáanii doo bídéétʼiʼ da, nidi tsʼídá tʼáá ákogi éʼétʼé áádóó kʼé hwiindzin índa ił hózhǫ́ Níłchʼi Diyinii eidiiʼaahii bídéétʼiʼ.
18 Háálá ákótʼéego Christ bá nijilʼaʼii Diyin God bił yáʼájítʼééh, áádóó diné ałdóʼ bił tʼáá ákǫ́ǫ́ ájítʼé.
19 Éí bąą haaʼíshąʼ bee kʼé náhoodleełii áádóó tʼáá áníiltso ahidiníłnáago danihidziil ánihidoolíiłii hádeiitʼı̨́į doo.
20 Daahsánígíí biniinaa Diyin God yinaalnishii tʼáadoo danółtłʼaí. Daadáanii tʼáá ałtso yáʼádaatʼééh, nidi tʼáá háiida haʼátʼíhída jiyánígíí biniinaa łaʼ bąąhági átʼı̨́ ádajileʼgo tʼáá éí bee doo ákǫ́ǫ́ ájítʼı̨́į da.
21 Atsįʼ* jiyą́ągoda áádóó wáin jidlą́ągoda, doodaiiʼ haʼátʼíhída bee hakʼis bąąhági átʼı̨́įgo áníjiilʼįįhii, doodaiiʼ bidínóołtłʼahii, doodaiiʼ biʼoodląʼ doo bidziilgóó ábidoolíiłii doo baa nijigháájí yáʼátʼééh.
22 Kódaatʼéhígíí baa nitsíníkeesgo yisínídląądígíí éí Diyin God tʼéiyá bił bééhózingo íínísin. Jó, tʼáadoo átʼéhé da jinízingo ájooníłígíí doo bee ákʼíhojitʼááhgóó bąą hoł hózhǫ́ǫ doo.
23 Nidi tʼáá háiida hoł naaki nilı̨́įgo ajiyánígíí éí há nihootʼą́, háálá doo hweʼoodląʼ bikʼehgo ajiyą́ą da. Jó, doo hweʼoodląʼ binahjįʼ ájooníiłii éí ádił niʼiidzííh átʼé.
Footnotes
^ Éí doodago kótʼé, Diyin God.
^ Atsįʼ, nínígíí éí edaʼalyaii bichʼįʼ náádahaniihii ááhyiłní.
