Romans 15:1-33
15 Niheʼoodląʼ bee danihidziilii éí doo dabidziilii bá náás deíníikáah dooleeł. Tʼáadoo tʼáá ádííghahígo ádił dahoniilzhóní.
2 Nidi haaʼíshąʼ tʼááłáʼí niitínígo bił kéédahwiitʼíinii bá yáʼátʼéeh dooleełii índa biʼoodląʼ dabidziil dooleeł biniyé bił dahoniilzhǫ́ǫ doo.
3 Háálá Christ doo tʼáá bí ádił hóshǫ́ǫ da nítʼééʼ; jó, Diyin God bizaad bee akʼeʼashchíinii ání,
Danéédzíiʼii yee danéédzííʼ yę́ę shikʼijįʼ silı̨́ı̨́ʼ.
4 Háálá tʼáá shiidą́ąʼdi Diyin God bizaad bee akʼedaʼashchíinii nanihinitin biniyé bee akʼedaʼashchı̨́, áko éí binahjįʼ chánah daniidlı̨́įgo hadaʼííníilní, áko nihił chodahooʼı̨́į doo.
5 Diyin God binahjįʼ hadaʼííníilníinii índa bee chánah daniidlíinii éí Christ Jesus bikʼehgo aheełtʼéego nitsídaahkeesgo hazhóʼó kéédahohtʼı̨́įgo ánihósin leʼ,
6 áko tʼáá ánółtso tʼáá łaʼ bizhiʼee danohłı̨́įgo nihiBóhólníihii Jesus Christ biDiyin God, tʼáá éí aTaaʼ nilíinii, baa dahohniih doo.
Haneʼ yáʼátʼéehii éí doo Jew dineʼé danilíinii ałdóʼ bá átʼé
7 Ákótʼé bąą Diyin God baa haʼniih doo biniyé tʼáá Christ kʼé nihidííniidígi átʼéego ałchʼįʼ kʼé danohdzin.
8 Háálá shí ánihidishní, Diyin God bitsʼą́ą́dóó tʼáá aaníinii ííshjání íidoolííł biniyé Christ éí Jew dineʼé yá naalʼaʼí silı̨́ı̨́ʼ, ałkʼidą́ą́ʼ dabizhéʼé yę́ę baa dadeestʼáanii yiʼdoolííł biniyé,
9 áádóó doo Jew dineʼé danilíinii Diyin God baa aʼááh nízinígíí bąą yaa dahaniih doo ałdóʼ biniyé. Tʼáá Diyin God bizaad bee akʼeʼashchíinii ánínígi átʼéego:
Éí bąą doo Jew dineʼé danilíinii bitahgóó nichʼįʼ ahééh nisin doo,nízhiʼ bee naa hashniihgo hashtaał doo.
10 Áádóó ánáádíʼní:
Doo Jew dineʼé danohłíinii, Diyin God bííʼ danilíinii bił nihił dahózhǫ́!
11 Áádóó nááʼáłdóʼ:Doo Jew dineʼé danohłíinii, tʼáá ánółtso Bóhólníihii baa dahohniih,ałʼąą dineʼé danohłíinii, yéego Bóhólníihii baa dahohniih doo!
12 Índa Aizéíyah ánáádíʼní:Jésii bihétłʼóól* nilíinii łaʼ doogááł.Éí doo Jew dineʼé danilíinii binazhnitʼáa dooleeł biniyé jidoogááłDoo Jew dineʼé danilíinii hwee bił chodahooʼı̨́į doo.
13 Níłchʼi Diyinii bibee adziilii binahjįʼ yéego nihił chodahooʼı̨́į doo biniyé Diyin God bee nihił chodahooʼíinii deinohdlą́ągo tʼáá yíní átʼéegi nihił dahózhǫ́ǫgo, índa kʼé danohdzingo ánihósin leʼ.
Paul éí haneʼ yáʼátʼéehii yaa hodoolnih biniyé biʼdoolʼaad
14 Shikʼisóó, tʼáá íiyisí yáʼátʼéehgo ádanohtʼé, índa tʼáá ałtsojįʼ nihił éédahózin, índa nidaʼahinohtingi bídanoołʼą́ągo tsʼídá doo shił naaki nilı̨́ı̨́góó shił bééhoozin.
15 Nidi béénihiishnííh biniyé łahgo nahazʼáanii tʼáadoo bíká sístiʼí bee nihichʼįʼ akʼedaʼshéłchı̨́, háálá Diyin God ajoobaʼ sheidiníʼánígíí bąą
16 shí Jesus Christ binaalʼaʼí nishłı̨́įgo Diyin God baa haneʼ yáʼátʼéehii bee naashʼaʼgo doo Jew dineʼé danilíinii éí Níłchʼi Diyinii diyingo ádabileʼgo Diyin God dabidínóozįįłígíí biniyé, nááʼiiniih kʼehgo Diyin God baa hodideeshʼááł biniyé hoł dahashneʼ.
17 Éí bąą Christ Jesus binahjįʼ Diyin God bá naashnishígíí bee ádaa hashʼniih.
18 Háálá doo tʼáá kʼad haʼátʼíida bee haasdzíiʼ da, tʼáá hazhóʼó Christ shinahjįʼ łaʼyiyiilaii tʼéiyá bee hadeesdzih. Jó, éí Christ baa hweeshneʼígíí índa ásdzaaígíí bee shinahjįʼ doo Jew dineʼé danilíinii Diyin God yikʼeh dahółʼı̨́į doo biniyé,
19 áádóó Diyin God bibee adziilii bee béédahózinii índa bikʼee tʼóó ił adahayóii áádóó Níłchʼi Diyinii bibee adziilii bee shinahjįʼ doo Jew dineʼé danilíinii Diyin God yikʼeh dahółʼı̨́į doo. Áko Jerúsalem hoolyéédóó Ilírikam hoolyéejįʼ Christ baa haneʼ yáʼátʼéehii tʼáá átʼé baa nahosisneʼ.
20 Tʼáá éigi átʼéego haneʼ yáʼátʼéehii baa hashneʼ dooleeł nisingo bidiishkaal, diné éí Christ yee nidaʼneeztą́ą́ʼgóó éí dooda, tʼáá íídą́ą́ʼ atłʼááh nástłʼinii ályaa nahalingo Christ tʼáá íídą́ą́ʼ baa dahóóneʼgóó éí doo deesháał da,
21 nidi tʼáá Diyin God bizaad bee akʼeʼashchíinii ánínígi átʼéego:
Tsʼídá tʼah doo hwee bił dahaneʼ da yę́ę haa ákodadínóozįįł,Áádóó tʼah doo haa dahodiitsʼı̨́įh da yę́ę hakʼidadiʼdootı̨́ı̨́ł.
Paul éí Romegóó doogáłígíí yinahaʼá
22 Díí biniinaa nihaa deeshááł nisin yę́ę ląʼídi shidiʼneestłʼah.
23 Nidi náásgóó kweʼé tʼáadoo haneʼ yáʼátʼéehii baa nááhóshneʼígi da hazlı̨́ı̨́ʼ, áádóó ląʼí nááhaídą́ą́ʼ nihaa jóyaʼ laanaa chʼééh níízįįd.
24 Áko ákǫ́ǫ́ yisháałgo nihaa deesháałgo danihiideestséełgo shił chohooʼı̨́. Spéin hoolyéégóó déyáago danihiideestsééł nisin. Áadi tʼáá haa danízahjįʼ ahee nídasiildįįdóó bikʼijįʼ índa déyáágóó shíká adoohjah nihóshʼní.
25 Nidi kʼad Jerúsalemdi Diyin God bidiyı̨́ı̨́ʼ béeso bá naashchínígíí bichʼįʼ díjaaʼ.
26 Háálá Masedóniyadi índa Akéyadi kéédahatʼínígíí bił dahózhǫ́ǫgo Jerúsalemdi Diyin God bidiyı̨́ı̨́ʼ danilíinii bitahgóó badahojoobáʼíígíí béeso yee yíká ííjééʼ.
27 Éí tʼáá bí ádeinízingo Diyin God bidiyı̨́ı̨́ʼ yíká ííjééʼ. Jó, éí tʼáá aaníí bąąh hadaazʼáii danilı̨́, háálá Jew dineʼé danilíinii Níłchʼi Diyinii bee akʼihojidlíii éí doo Jew dineʼé danilíinii bił ałtsʼą́ą́ʼ daʼjíłkʼiiz hazlı̨́ı̨́ʼ, áko doo Jew dineʼé dajílíinii ałdóʼ hanaalyeʼé bee hakʼihodzisdliʼígíí łaʼ tʼáá ákónéehee bee Jew dineʼé bíká anízhdoojah.
28 Díí béeso naashchínígíí ałtso bichʼįʼ kóshłaago índa Spéin hoolyéégóó dah diishááh, áko nihikʼeh yisháał doo.
29 Áádóó nihaa níyáago Christ baa haneʼ yáʼátʼéehii yee akʼijidlíii nihilááh neelʼą́ągo bił nihaa deesháałgo shił bééhózin.
30 Shikʼisóó, nihiBóhólníihii Jesus Christ binahjįʼ áádóó Níłchʼi Diyinii bee ayóóʼádaʼahííníiʼnínígíí ałdóʼ binahjįʼ nánihooshkąąh, Diyin God bichʼįʼ shił sodadołzingo tʼáá awołí bee shá sodadołzin,
31 Judíyagi doo daʼoodlání bitsʼąą shaa áháyą́ą dooleełgo, áádóó Jerúsalemgi choideeshʼįįłígíí Diyin God bidiyı̨́ı̨́ʼ bił yáʼádaatʼéeh doo ałdóʼ biniyé shá sodadołzin.
32 Áádóó Diyin God íinízinii bee shił hózhǫ́ǫgo nihaa deeshááł áádóó ałkʼéé dahodiiltahgo bíká sodadołzin.
33 Diyin God bitsʼą́ą́dę́ę́ʼ bee achʼįʼ hózhǫ́ náhásdlı̨́įʼii tʼáá ánółtso nihił hólǫ́ǫ doo. Tʼáá ákótʼée doo.
Footnotes
^ Bihétłʼóól éí bitsʼą́ą́dóó ahoolchíiłii jiníigo óolyé. Is. 11:10.
