Romans 2:1-29
2 Éí bąą kwáʼásiní nílíinii, tʼáá háiida náánáłahjįʼ diné baa nánítʼı̨́įgo tʼáadoo áchʼą́ą́h nidóótséhí da. Bee aa nánítʼínígíí tʼáá éí bee ádá nihoyítʼaahgo átʼé, háálá bee aa nánítʼíinii tsʼídá tʼáá éí ałdóʼ baa naniná.
2 Áko kótʼéego chʼétʼánígíí baa nidajikaii tʼáá aaníígóó Diyin God há nihodooʼáałgo nihił béédahózin.
3 Áko kwáʼásiní nílíinii, ákódaatʼéii yaa nidaakaii bee baa nánítʼı̨́įgo, daʼ ákondiísh ni ałdóʼ tʼáá éí baa nanináago Diyin God yee atíʼdoolíiłii baa dáádideeshááł nínízin?
4 Éí doodaléiʼ Diyin God bibee ajoobaʼ índa yee akʼédí nilíinii áádóó nízaadgóó yee haʼólníinii yee alááh neelʼáanii daatsʼí tʼáadoo nilínígóó baa nitsíníkees? Doósh nił bééhózin da, Diyin God naa joobaʼgo łahgo átʼéego tsíńdííkosgo shichʼįʼ dah nídidíídááł nízin?
5 Nidi doo niníhóóʼáhígíí bąą, áádóó doo łahgo ánáoʼneʼ ánítʼéégóó bąą Diyin God tʼóó báhádzidgo yee atíʼdoolííł bijı̨́įdi tsʼídá tʼáá ákogi átʼéego ánihwiitʼaah yitʼíní áyiilaadi tʼóó báhádzidgo yee atínidoolíłígíí ádá hashtʼeʼnihidíʼníiłgo átʼé.
6 Háálá tʼááłáʼí jinítínígo ádajíítʼįįdígíí bikʼehgo Diyin God hachʼįʼ nidiʼyoolééł.
7 Áko hadaʼjólníigo yáʼátʼéhígi ádajooníłígíí bee aa haʼniih áádóó ił ídlı̨́ índa iiná doo ninítʼiʼii tʼáá hazááká bíká ádajitʼínígíí éí hoolʼáágóó jiináa doogo Diyin God haididooʼááł.
8 Nidi diné tʼáá shí tʼéí daznízinii áádóó tʼáá aaníinii doo bikʼeh dahojíłʼíinii, nidi doo tʼáá ákogi ádaatʼéii bikʼeh dahojíłʼínígíí éí Diyin God hachʼįʼ hashké dínóodzįįłgo tʼóó báhádzidgo atíhodoolííł.
9 Nihokááʼ dineʼé tʼááłáʼí jinítínígo doo aaníígóó ájítʼíinii hachʼįʼ nahwiiʼnáa doo, áádóó tiʼhojooníih doo, Jew dineʼé nilíinii áłtsé, áádóó doo Jew dineʼé nilíinii ałdóʼ.
10 Nidi tʼááłáʼí jinítínígo yáʼátʼéehgo ájooníiłii haa haʼniih doo, áádóó ił jílı̨́į doo, índa hachʼįʼ hózhǫ́ǫ doo, Jew dineʼé nilíinii áłtsé, áádóó doo Jew dineʼé nilíinii ałdóʼ.
11 Háálá Diyin God éí diné doo łaʼ aʼohgo yaa nitsíkees da.
12 Tʼáá ádzíłtso bee hazʼáanii Mózes baa deetʼáanii doo hoł béédahózingóó bąąhági ádajíítʼįįdii éí bee hazʼáanii doo bee haa nídahódóotʼįįłgóó dazhdínóonééł. Tʼáá ádzíłtso éí bee hazʼáanii hoł béédahózingo bąąhági ádajíítʼįįdii éí bee hazʼáanii bee haa nídahódóotʼįįł.
13 Háálá bee hazʼáanii yikʼeh dahółʼíinii tʼéiyá tsʼídá tʼáá ákogi ádaatʼéego Diyin God bá hadoodzih, tʼóó dazdiitsʼaʼí tʼéiyágo éí dooda.
14 Doo Jew dineʼé danilíinii éí bee hazʼáanii Mózes baa deetʼáanii doo bee dahólǫ́ǫ da, nidi tʼáá bí ádaatʼéhígíí bikʼehgo bee hazʼáanii yidaʼałʼı̨́įgo tʼáá bí ádá bee hazʼáanii danilı̨́, azhą́ bee hazʼánígíí bee ádaadin nidi.
15 Áko éí bee hazʼáanii áníinii dabijéí biyiʼdi bił ííshjání áyósin, háálá éí yikʼehgo ádaanííł. Haʼátʼíhída ádajoolíłígíí yáʼádaatʼéehgo, doodaiiʼ doo yáʼádaatʼééhgóó hoł béédahózinígíí ałdóʼ éí bił ííshjání áyósin. Ałkʼídahojitʼááh, éí doodago tʼóó ahidaʼjiilníihgo nitsídadzikees.
16 Jó, haneʼ yáʼátʼéehii baa hashneʼii bikʼehgo ánihwiitʼaah beiníłką́ądi hajéí biyiʼdi nidazhniłʼinii Jesus Christ binahjįʼ Diyin God há nihodiyooʼááł.
Jew dineʼé áádóó bee hazʼáanii
17 Jóʼakon, Jew dineʼé nishłı̨́, diní, bee hazʼáanii Mózes baa deetʼáanii baa dzíínílíigo Diyin God bee ádaa hóʼniih,
18 áádóó Diyin God yee ná íinízinii nił bééhózin, índa bee hazʼáanii bitsʼą́ą́dóó nandiʼneestą́ąʼgo yáʼátʼéehii nidííníʼą́;
19 doo daʼooʼíinii tʼáá aaníí yishʼish índa chahałheeł yiiʼ dayíkáhígíí bá adinídíín nishłı̨́ nínízin.
20 Diné doo dahóyáanii hashtʼeʼnináháshʼéésh índa áłchíní átʼéii nanishtin nínízin. Bee hazʼáanii tʼáá yíní átʼéegi índa tʼáá aaníinii nił bééhózin.
21 Áko ni, diné náánáłaʼ neinitinii nílíinii, daʼ niísh tʼáá ni doo nináʼádidíníítįįł da? Doo azhniʼįįh da, diníigo diné bił hólneʼii, tʼáá ni daatsʼí aníʼįįhgo ádíní?
22 Doo azhdilée da, diníinii, tʼáá ni daatsʼí adíléego ádíní? Edaʼalyaii tʼáá íiyisí bikʼee diníniihii, tʼáá ni daatsʼí tʼáadoo leʼé dadiyinii nihíłchxǫǫh?
23 Bee hazʼáanii bee ádaa hóʼniihii, tʼáá ni daatsʼí bee hazʼáanii hítíihgo bee Diyin God doo nił nilı̨́į da?
24 Háálá Diyin God bizaad bee akʼeʼashchíinii ánínígi átʼéego, Nihí nihiniinaa doo Jew dineʼé danilíinii bitahgóó Diyin God bízhiʼ tʼóó baaʼihgo baa yátiʼ.
25 Bee hazʼáanii Mózes baa deetʼáanii bikʼeh hojíłʼı̨́įgo ąąh náhinilgish tʼáá aaníí ílı̨́, nidi bee hazʼáanii doo bikʼeh hojíłʼı̨́ı̨́góó ąąh náhinilgish tʼáadoo biniyéhí da yileeh.
26 Éí bąą doo Jew dineʼé jílíinii éí bee hazʼáanii tʼáá ákogi átʼéego áníinii bikʼehgo ájítʼéego, doo hąąh náhineeshgizh da nidi, tʼáá bąąh náhineeshgizhii jílı̨́ nahalingo Diyin God haa nitsíkees.
27 Tʼáá aaníí Jew dineʼé danohłı̨́įgo nihąąh nídahineeshgizhgo bee hazʼáanii bee akʼeʼashchíinii nihee dahólǫ́ǫ nidi dahohtííh, áko łaʼ doo Jew dineʼé danilı̨́į da nidi, áádóó doo bąąh nídahineeshgizh da nidi, bee hazʼáanii yikʼeh dahółʼı̨́įgo, daʼ éísh doo nihaa nídadóotʼįįłgo nihá nidahodiyooʼáał da?
28 Háálá tʼáá aaníí Jew dineʼé jílíinii éí doo atsʼíís tʼéiyá bee Jew dineʼé jílíinii óolyée da, índa tʼáá aaníí ąąh náhineeshgizh wolyéii éí doo tʼáá atsʼíís tʼéí bąąh náhineeshgizhii óolyée da.
29 Nidi tʼáá aaníí Jew dineʼé jílíinii éí tʼáá aaníígóó ąąh náhinilgish bee hajéí tłʼáahdi Níłchʼi Diyinii nahwiiłnáanii, éí doo bee hazʼáanii bikʼehgo da. Áko éí bee haa haʼniihii doo diné bitsʼą́ą́dę́ę́ʼ átʼée da, nidi Diyin God bitsʼą́ą́dę́ę́ʼ átʼé.
