Romans 3:1-31
3 Ákoshąʼ Jew dineʼé jílíinii haʼátʼíí bee tʼah atisídi haa nitsáhákees? Doodaiiʼ ąąh náhinilgishshąʼ haʼátʼíí bee ílı̨́?
2 Tʼáá ałtsojįʼ tʼáá íiyisí ílı̨́įgo átʼé. Jó, alą́ąjįʼígíí éí Jew dineʼé danilíinii Diyin God bizaad bee baʼahoosdlííʼ.
3 Áko łaʼ doo daʼoodlą́ą́góoshąʼ, daʼ éísh tʼáá bí bidoodaʼoodląʼ bee Diyin God baʼahódlíhígíí doo ílı̨́ı̨́góó ádeileʼ?
4 Tsʼídá dooda lą́ą! Azhą́ diné tʼáá ádzíłtso dahayoochʼíidgo nihwéédahwiizįįh nidi Diyin God tʼáá aaníí baʼahódlí nilíinii átʼéego bééhózin leʼ, tʼáá Diyin God bizaad bee akʼeʼashchíinii ánínígi átʼéego:
Nizaad bee háínídzíʼígíí tʼáá aaníí átʼéé góneʼ bee nééhodoozįįł,índa baa nísínítʼįįdgo tʼáadoo bee nikʼíhótʼahí da doo.
5 Doo tsʼídá tʼáá ákogi ádeiitʼínígíí bee Diyin God bitsʼą́ą́dóó tsʼídá tʼáá ákogi átʼéii ííshjání ánáyiilʼįįh, jinínígíí haʼátʼíí hodidiiʼniił? Daʼ Diyin God atínihiłʼı̨́įgo doo ákǫ́ǫ́ áátʼįįd daásh dadidiiʼniił? (Díí nihokááʼ dineʼé kʼehgo ádíshní.)
6 Tsʼídá dooda lą́ą! Háálá Diyin God doo ákǫ́ǫ́ átʼı̨́ı̨́góoshąʼ haa yitʼéego nihokááʼ dineʼé yaa nídóotʼįįł?
7 Nidi łaʼ ánáázhdidooʼniił, Shiyoochʼídígíí binahjįʼ Diyin God bitʼááʼaaníinii ííshją́ą́ ííłʼı̨́įgo baa hodooʼnihgoshąʼ, haʼátʼéego tʼahdii bąąhági ááníiłii nahalingo shaa hwiinítʼı̨́?
8 Índa ánáázhdidooʼniił, Yáʼátʼéehii hodooleeł biniyé haaʼíshąʼ doo yáʼádaatʼéehii baa nideiikai dooleeł. Łaʼ diné kójíníigo nazhʼnitin danihiłníigo tʼáá ádzaagóó nihikʼídahaʼááh. Ákódanihijinínígíí tʼáá bą́ą́h daʼjílı̨́ı̨́ góneʼ há nidahodiyootʼááł.
Tʼáadoo łaʼ tsʼídá tʼáá ákogi ájítʼéhí da
9 Áko haitʼé? Nihí Jew dineʼé daniidlíinii daatsʼí tʼah aláhídi daʼniidlı̨́? Doodayéi! Háálá tʼáá íídą́ą́ʼ Jew dineʼé danilíinii áádóó doo Jew dineʼé danilíinii tʼáá ałtso bąąhági átʼéii bibee adziilii dabótąʼ dishníigo bee nihichʼįʼ haasdzííʼ,
10 tʼáá Diyin God bizaad bee akʼeʼashchíinii ánínígi átʼéego:
Tʼáadoo łaʼ tsʼídá tʼáá ákogi ájítʼéhí da, dooda, tʼááłáʼí nidi dooda;
11 doo nidi łaʼda akʼiʼdiitįįh da,doo nidi łaʼda Diyin God bééhodeesįįł nízingo háidéezʼı̨́ʼí da.
12 Tʼáá ałtso honítʼiʼ yitsʼádahaaskai,tʼáá ałtso tʼáá ádzaagóó adahaaskai.Doo nidi łaʼda yáʼátʼéehgo ááníił da, dooda, tʼááłáʼí nidi dooda.
13 Bidáyiʼ jishchááʼ ąą áhootʼé nidahalin,dabiyoochʼíidgo bindaʼadloʼ.Biwooshtłʼah góneʼ tłʼiish bibikʼasdaʼ naaziid nahalingo bizaad dabizǫ́ǫ́z.
14 Bizadahóchįʼgo índa saad bikʼedaʼashchʼíiʼii tʼéí yee yádaałtiʼ.
15 Daʼdiyoołhéełgo dił doonahjįʼ yichʼįʼ ayóó ádaatʼı̨́.
16 Tʼáá dahidikááhgóó nidaʼiiłchxǫǫh índa tiʼdaʼayoołʼnííh,
17 Hózhǫ́ǫ́jí honítʼiʼii doo bił béédahózin da.
18 Binááł Diyin God tsʼídá doo deidísin da.
19 Kʼad nihił béédahózingo bee hazʼáanii Mózes baa deetʼáanii haʼátʼíhída nínígíí, éí bee hazʼáanii yikʼehgo kéédahatʼíinii yichʼįʼ yáłtiʼ, áko tʼááłáʼí jinítínígo doo hadzódziih átʼéégóó áhodoolííł, háálá nihokááʼ dineʼé tʼáá ádzíłtso Diyin God há nihodiyooʼáałgo hwee ádíhólnííh.
20 Éí bąągo nihokááʼ dineʼé bee hazʼáanii áníinii bikʼeh ájooníłígíí biniitʼaa doo łaʼ tsʼídá tʼáá ákogi ájítʼéego Diyin God há hadoodzih da. Jó, bee hazʼáanii bee diné habąąhági átʼéii hoł nibéédahwiizįįh.
Haash yitʼéego Diyin God éí diné tʼáá ákogi ádajítʼéego há hadoodzih
21 Nidi kʼad tʼéiyá bee hazʼáanii tʼáágééd Diyin God bitsʼą́ą́dóó tsʼídá tʼáá ákogi átʼéii kʼad nihichʼįʼ ííshją́ą́ ályaa. Éí bee hazʼáanii índa Diyin God bá dahojilneʼii yę́ę baa chʼídahodziizʼą́.
22 Jesus Christ dajoodlą́ągo baa deijólíigo tʼéiyá Diyin God bitsʼą́ą́dóó tsʼídá tʼáá ákogi átʼéii hwee nidahwiileeh. Éí daʼoodlání tʼáá ałtso bá átʼé, háálá tʼáá ádzíłtso tʼáá ahidajíłtʼé.
23 Jó, diné tʼáá ádzíłtso ádił nidaʼdziisdzííʼ, áko Diyin God yee ayóó átʼéii biʼoh dahizhnilʼąąh.
24 Nidi Diyin God bibee ajoobaʼ tʼáá jííkʼe ainíláhígíí binahjįʼ tʼáá ákogi ádajítʼéego há háádoodzihgo Christ Jesus nááhwiisniiʼígíí bee hwéédahideeshchid.
25 Áko Diyin God biYeʼ yiníłʼaʼgo tsin ałnáoszid bąąhjįʼ daaztsą́ągo bidił deeznaʼígíí díí dayoosdląądgo yaa dadzólíii ádił niʼiidzííh bá yóóʼadahiditʼaah. Díí bee Diyin God tʼáá bí tsʼídá tʼáá ákogi átʼéii nilı̨́įgo ííshją́ą́ íʼdólzin, háálá nahdę́ę́ʼ ádił niʼiidzííh baa daʼíldeeʼii yichʼįʼ haʼólníigo tʼóó yił átʼéego hoolzhiizh.
26 Díí kʼad hoolzhishígíí biyiʼ tʼáá ákogi átʼéii nilı̨́įgo ííshją́ą́ íʼdólzin dishní, háálá tsʼídá tʼáá ákogi átʼéii nilı̨́įgo bééhózin áádóó tʼáá háiida Jesus joodlą́ągo beijólíhígíí ádił niʼdziisíiʼii há yóóʼiidiizʼą́ągo, kʼad tʼáá ákogi ádajítʼé hałníigo há haadzíiʼgo bééhózin.
27 Áko ádaa hodzódlíhígíishąʼ haidzaa? Jó, éí nahjįʼ kólyaa. Haʼátʼíí bee hazʼáanii shı̨́įshąʼ bikʼehgo? Óʼooʼnííłjí bee hazʼáanii daatsʼí bikʼehgo? Dooda, oodląʼ bee Christ baʼahódlííjí bee hazʼáanii bikʼehgo Diyin God tʼáá ákogi ájítʼéego há hadoodzih.
28 Éí bąągo díí nihił béédahoozin, Jesus joosdląądgo beijólíigo tʼéiyá tsʼídá tʼáá ákogi ájítʼéego Diyin God há hadoodzih, bee hazʼáanii Mózes baa deetʼáanii bikʼehgo ájítʼéego éí doo bíighah da.
29 Daʼ Diyin God éí Jew dineʼé tʼéiyá yiDiyin nilı̨́? Tsʼídá dooda lą́ą! Daʼ doo Jew dineʼé danilíiniísh doo yiDiyin nilı̨́į da? Doo Jew dineʼé danilíinii lá ałdóʼ yiDiyin nilı̨́ ni.
30 Diyin God tʼááłáʼí hólǫ́, áko Jew dineʼé, bąąh nídahineeshgizhii, bidaʼoodląʼ bee tʼáá ákogi ádaatʼéego Diyin God bá hahadziih, áádóó doo Jew dineʼé danilíinii, doo bąąh nídahineeshgizhii, tʼáá bí bidaʼoodląʼígíí bee tʼáá ákogi ádaatʼéego ałdóʼ Diyin God bá hahadziih.
31 Ákótʼéego daʼiiniidlánígíí daatsʼí binahjįʼ bee hazʼáanii nahjįʼ kwíilyaa? Tsʼídá dooda lą́ą! Daʼiiniidlánígíí binahjįʼ bee hazʼáanii ílı̨́įgo ádeíníilzin.
