Romans 4:1-25
4 Éíbraham atsʼíís kʼehgo nihizhéʼé jílíinii yę́ę hoł bééhoozinígíí haʼátʼíishąʼ dahodidiiʼniił?
2 Éíbraham tʼáá hó ájooníiłii bee tʼáá ákogi ájítʼéego Diyin God há haadzíiʼgo éí bee ádaa hojiʼniih doo nítʼééʼ, nidi Diyin God binááł éí doo ádaa hojóʼniih átʼée da.
3 Diyin God bizaad bee akʼeʼashchíinii haʼátʼíí ní? Jó kóní, Éíbraham éí Diyin God joosdląąd, áko tʼáá ákogi átʼéii jílı̨́įgo há haadzííʼ.
4 Diné naalnishii bichʼįʼ nahalyéii doo tʼóó bee baa hojoosbaʼii átʼéego yaa nitsíkees da, nidi yikʼé naalnishii átʼé.
5 Jó, doo Diyin God kʼehgo nijildeehii daʼiizhdoodląąłgo tʼáá ákogi ádajítʼé Diyin God hodidooniił. Áko ájooníłígíí doo beijólíii éí hweʼoodląʼ bee aijólíhígíí tʼéí bee tʼáá ákogi ájítʼéego Diyin God há hadoodzih.
6 Ájooníłígíí doo beijólíi da nidi Diyin God tʼáá ákogi ánítʼé hałnínígíí éí bąą hoł hózhǫ́. Éí David haa yáłtiʼgo kóní,
7 Diné doo ákǫ́ǫ́ ádajíítʼįįdii há yóóʼadootʼą́ągo,ádił nidaʼdziisíiʼii ałtso há bikʼéédahoodziidii éí hoł dahózhǫ́!
8 Diné ádił niʼdziisíiʼii Bóhólníihii doo hachʼįʼ nayółtaʼii éí hoł hózhǫ́.
9 Daʼ díí hózhǫ́ǫ́jí bee haʼoodzíʼígíísh bąąh nídahineeshgizhii tʼéiyá daatsʼí bá bee haʼoodzííʼ, doodaiiʼ doo bąąh nídahineeshgizhii daatsʼí ałdóʼ bá bee haʼoodzííʼ? Jó ádadiiʼní, Éíbraham ajoosdląądgo tʼáá ákogi átʼéii jílı̨́įgo há haʼoodzííʼ.
10 Hádą́ąʼshąʼ ákójítʼéego hwééhoozin? Hąąh náhineeshgizh yę́ędą́ą́ʼ daatsʼí, doodaiiʼ tʼah doo hąąh náhinilgish yę́ędą́ą́ʼ daatsʼí? Tʼah doo hąąh náhinilgish yę́ędą́ą́ʼ há bééhoozin, áko hąąh náhineeshgizhgo éí dooda.
11 Éíbraham tʼah doo hąąh náhinilgish yę́ędą́ą́ʼ ajoosdląądgo aijólíhígíí binahjįʼ tʼáá ákogi ájítʼéego Diyin God hwééhósin, áádóó índa ajoosdląądgo aijólíhígíí binahjįʼ tʼáá ákogi ájítʼéego Diyin God há haadzíʼígíí bee hwééhózin dooleeł biniyé hąąh náhineeshgizh. Áko doo bąąh nídahineeshgizhii nidi, daʼoosdląądgo adaʼólíigo tʼáá Éíbraham átʼéhę́ęgi átʼéego tʼáá ákogi ádajítʼéego hwéédahózinii tʼáá ádzíłtso Éíbraham hazhéʼé nilı̨́.
12 Áko bąąh nídahineeshgizhii éí doo tʼóó bąąh nídahineeshgizhígíí tʼéí bee bizhéʼé jílı̨́į da, nidi nihitaaʼ Éíbraham tʼah doo bąąh náhinilgish yę́ędą́ą́ʼ biʼoodląʼ yee aa dzólíii yikʼehgo yigááł yę́ęgi átʼéego hweʼoodląʼ bikʼehgo dajíkáahii ałdóʼ yee hazhéʼé nilı̨́.
Aa deetʼáanii éí oodlą́ bee aʼódlí bee tʼáá aaníigo bééhoozin
13 Háálá Éíbraham áádóó haʼáłchíní ahoolchíiłii nahasdzáán daahóóʼ dooleełgo haa deetʼánígíí éí doo bee hazʼáanii bídéétʼiʼ da, nidi hweʼoodląʼ bee aijólíhígíí bee tʼáá ákogi ájítʼéii bídéétʼiʼgo haa deetʼą́.
14 Jó, bee hazʼáanii bikʼeh dahojíłʼínígíí tʼéiyá há bee hazʼą́ haʼníigo oodląʼ tʼáadoo nilíní da doo nítʼééʼ, índa Diyin God yee nihoníʼáanii doo ílı̨́į da doo nítʼééʼ.
15 Háálá bee hazʼáanii Mózes baa deetʼáanii doo bikʼeh dahojíłʼíinii Diyin God tʼóó báhádzidgo bibee atéʼélʼíinii yee atíhodoolííł, nidi bee hazʼáanii ádingo doo hitíih da doo nítʼééʼ.
16 Éí bąą Éíbraham biʼoodląʼ binahjįʼ baʼáłchíní náás daʼahidoolchíłígíí tʼáá ałtso tʼáádóo nídí Diyin God yee bá nihoníʼáanii bííʼ dadooleeł biniyé Diyin God bibee ajoobaʼ yee bá nihoníʼą́. Jó, bee hazʼáanii bikʼeh ádajítʼéhígíí doo éí tʼéiyá da, nidi Éíbraham hweʼoodląʼ bikʼehgo joogááł yę́ęgi átʼéego hweʼoodląʼ bikʼehgo dajíkáahii ałdóʼ hwííʼ dadooleeł. Háálá daʼiiniidláanii tʼáá áníiltso Éíbraham yę́ę nihizhéʼé jílı̨́.
17 Éíbraham éí Diyin God joodlánígíí bidááhdóó dzizı̨́įgo, Ałʼąą dineʼé bizhéʼé nílı̨́įgo ániishłaa, níigo bee há hooʼaʼ, tʼáá Diyin God bizaad bee akʼeʼashchíinii ánínígi átʼéego. Diyin God éí daneeznáanii dahináago ánídeidleʼ, índa doo hólóonii dahólǫ́ǫgo ádeileʼ.
18 Áko ałʼąą dineʼé tʼóó ahayóí bizhéʼé jidooleeł chʼééh bíká hoł chohooʼı̨́, ákondi bíká hoł chohooʼı̨́. Tʼáá naʼáłchíní ahoolchíiłii ląʼí dooleeł, hoʼdooʼniidii tsʼídá joodlą́.
19 Neeznádiin honááhai nidi hatsʼíís kʼadę́ę daatsaahgo doo baa nitsídzíkees da, áádóó Sarah doo ałchíi daígíí ałdóʼ doo baa nitsídzízkéez da, nidi hweʼoodląʼ tʼáadoo łahgo ádzaa da.
20 Hweʼoodląʼ tʼáadoo hatsʼą́ą́ʼ niitłʼáhí Diyin God yee há nihoníʼánígíí tʼáádóo nídí nijólí, áko Diyin God baa hojiniihgo hweʼoodląʼ bee hadziil dzizlı̨́ı̨́ʼ.
21 Diyin God yee nihoníʼánígíí łaʼyidoolíiłgo yíneelʼą́ jinízingo tsʼídá doo hoł naaki nilı̨́į da.
22 Éí bąą hweʼoodląʼ bee tsʼídá tʼáá ákogi átʼéii dzizlı̨́ı̨́ʼ, hałníigo Diyin God há haadzííʼ.
23 Tsʼídá tʼáá ákogi átʼéii dzizlı̨́ı̨́ʼ, níigo bee akʼeʼashchínígíí doo tʼáá hó tʼéiyá há bee haʼoodzíiʼ da,
24 nidi nihí ałdóʼ nihá bee haʼoodzííʼ. Nihí Jesus nihiBóhólníihii daaztsą́ą́dę́ę́ʼ néidiisáii deiniidlánígíí tsʼídá tʼáá ákogi ádaniitʼéego ałdóʼ nihá haʼdoodzih.
25 Doo ákǫ́ǫ́ ádeiitʼįįdii biniinaa Jesus hoʼdiisyı̨́, índa tʼáá ákogi ádaniitʼéego nihá haʼdoodzih biniyé dadziztsą́ą́dę́ę́ʼ nááhoʼdiilzá.
