Romans 7:1-25
7 Jó, bee hazʼáanii nihił béédahózin, shikʼisóó, áko diné nizhʼníłdįįdjįʼ bee hazʼáanii hwee ádíhólníih dooleełígíísh doo bikʼidaʼdoohtįįh da?
2 Asdzání hahastiin hólóonii hahastiin hináago bee hazʼáanii yee hótąʼ, nidi hahastiin hatsʼą́ą́ʼ daaztsą́ągo bee hazʼáanii bitsʼą́ąjįʼ hwéédíchiʼ.
3 Hahastiin tʼah hináago náánáłaʼ diné bił ahaa náájítʼashgo adiléii bee hoʼdójíi doo. Nidi hahastiin hatsʼą́ą́ʼ daaztsą́ągo éí bee hazʼáanii bitsʼą́ąjįʼ hwéédoochid doo, áko azhą́ náánáłaʼ diné bił ahaa náájítʼash nidi doo adiléii jílı̨́į da.
4 Tʼáá ákótʼéego shikʼisóó, Christ bitsʼíís bił dasinoonáago bee hazʼáanii Mózes baa deetʼáanii bitsʼąą dasinooná, áko Christ bííʼ dasoolı̨́ı̨́ʼ. Jó, Diyin God bá chodeiitʼı̨́įgo dahiniiʼnáa doo biniyé Christ daaztsą́ą́dę́ę́ʼ náábiʼdiilzá.
5 Háálá tsʼísee* kʼehgo dahiniiʼná yę́ędą́ą́ʼ, bee hazʼáanii chʼééh dooda nihiłníigo bąąhági átʼéego adáhonooní tʼéí bídaniidlı̨́ı̨́ nítʼééʼ. Éí nihiyiʼ naalnishgo tʼóó nanihiłtseed.
6 Nidi kʼad bee hazʼáanii bitsʼą́ąjįʼ nihéédahideeshchidgo binaalteʼ daniidlı̨́ı̨́ nítʼééʼ yę́ę bichʼįʼ daneeʼná. Áko ałkʼidą́ą́ʼ bee hazʼáanii bee bikʼeʼashchínígíí doo bikʼehgo Diyin God bá chodeiitʼı̨́į da, nidi Níłchʼi Diyinii bee iiná ániidíii bee bá chodeiitʼı̨́.
Bąąhági átʼéii ayiʼdi hólóonii
7 Ákoshąʼ haʼátʼíí dadidiiʼniił? Daʼ bee hazʼáaniísh bąąhági átʼéii átʼé? Tsʼídá dooda lą́ą! Nidi bee hazʼáanii ádingo bąąhági átʼéii doo shił bééhózin da doo nítʼééʼ. Bee hazʼáanii, Doo adázhnoolníi da, doo dííniidgóó adáneeshníigo Diyin God bichʼįʼ ádił niʼiiszíhígíí doo shił bééhózin da doo nítʼééʼ.
8 Bee hazʼáanii ánínígíí baa ákoniizı̨́įʼgo bąąhági átʼéii bee adáhonooní haa shı̨́ı̨́ néelą́ą́ʼ shiiʼ héełgo áyiilaa. Háálá bee hazʼáanii doo shił bééhózindą́ą́ʼ doo bąąhági áshtʼı̨́į da nisin nítʼééʼ.
9 Bee hazʼáanii ánínígíí łah doo baa ákonisingóó hinishná nisin nítʼééʼ, nidi bee hazʼáanii baa ákoniizı̨́įʼgo bąąhági áníshtʼéhígíí ałdóʼ baa ákoniizı̨́ı̨́ʼ, áko tʼóó bikʼee dasétsą́.
10 Bee hazʼáanii iiná yee nihodooʼááł yę́ę, jó, aninéda yee shohodiiłtʼiʼ.
11 Bee hazʼáanii bee bąąhági átʼéii bá hashja náʼiishʼįįhgo shiʼdeezloʼ, áádóó shiisxı̨́.
12 Jó, bee hazʼáanii dílzinii átʼé, áádóó bikʼeh óʼooʼníiłii ałdóʼ dílzinii ádaatʼé, éí tsʼídá tʼáá ákogi átʼé áádóó yáʼátʼéehii átʼé.
13 Áko daatsʼí yáʼátʼééh nilíinii bikʼee dasétsą́? Tsʼídá dooda lą́ą! Nidi bąąhági átʼéii éí tʼóó yáʼátʼééh nahalin nidi, nashiiłʼnáago bikʼee dasétsą́. Bee hazʼáanii éí bąąhági átʼéii óʼoołʼįįłígíí tʼáadoo bahatʼaadí íidoolííł biniyé eidiníʼą́, áko éí binahjįʼ bąąhági átʼéii tsʼídá doo bóhoneeʼą́ą da silı̨́ı̨́ʼ.
14 Háálá bee hazʼáanii éí diyin kʼehgo átʼéego nihił béédahózin, nidi shí tʼéí tsʼísee kʼehgo áníshtʼé. Bąąhági átʼéii bichʼįʼ nashiʼdiizniiʼ.
15 Tʼáá shí ááshníiłii doo bikʼiʼdiishtįįh da. Háálá yáʼátʼéhígi ádeeshnííł nisinígíí éí doo ááshłíił da, nidi jooshłáhígíida ááshłííł.
16 Áko doo bąąhági áshtʼı̨́į da doo nisinii ádił iisihgo bee hazʼáanii éí tʼáá aaníí áníí lá nisin łeh.
17 Áko doo tʼáá shí áshtʼı̨́į da lá, nidi bąąhági átʼéii shiiʼ hólónígíí áshíłʼı̨́ı̨́ lá.
18 Yáʼátʼéehii shiiʼ ádin nisin (tsʼísee kʼehgo áníshtʼéhígíí ááhdishní). Háálá azhą́ yáʼátʼééhjí ádeeshnííł nisin nidi yáʼátʼéhígi ádeeshníłígíí doo bíneeshʼą́ą da.
19 Háálá yáʼátʼéhígi ádeeshnííł nisinii éí doo ááshłíił da, nidi doo ákǫ́ǫ́ ádaatʼéii doo nisinii, jó, éída ááshłíił łeh.
20 Nidi doo ákǫ́ǫ́ ádaatʼéii doo nisinii ááshłíiłgo éí doo tʼáá shí ááshníił da, nidi bąąhági átʼéii shiyiʼdi hólónígíí áshíłʼı̨́.
21 Jó, kóníshtʼéego ádaa ákonisdzin, yáʼátʼéhígi ádeeshnííł niisįįh nidi bąąhági átʼéii tʼáá áłahjįʼ shidáahgi hólǫ́.
22 Shijéí tłʼáahdi Diyin God yee hasʼáanii tʼáá íiyisí bąą shił hózhǫ́.
23 Nidi náánáłaʼ bee hazʼáanii shitsʼíís biiʼ hólǫ́ǫgo shił bééhózin, éí bee hazʼáanii shintsíkees yił anaʼahilʼı̨́įgo ádił niʼiidzííh yee hasʼáanii shiyiʼ hólóonii yisnááh áshósin.
24 Dooládóʼ lá diné hojoobaʼ átʼéii nishłı̨́į da! Hoolʼáágóó dadeestsaał biniyé bąąhági átʼéego hinishnánígíí bitsʼą́ąjįʼ háí lá yisdáshidoołtééł lá?
25 Jó, éí Jesus Christ nihiBóhólníihii yisdáshidoołtéełgo Diyin God bichʼįʼ baa ahééh nisin! Ákohgo tʼáá shí áníshtʼéego Diyin God yee hasʼáanii shíniʼ bee biʼíínísin; jó, tsʼísee kʼehgo bąąhági átʼéii yee hasʼáaniida biʼíínísin.
Footnotes
^ Tsʼísee, haʼníigo éí Diyin God tʼáágééd diné tʼáadoo leʼé yaa naagháhígíí ááhyiłní.
