Romans 9:1-33
9 Tʼáá aaníígóó ádíshní, Christ bííʼ nishłı̨́įgo doo shiyoochʼíidgo yáshtiʼ da. Jó, Níłchʼi Diyinii shił ééhósingo tʼáá aaníígóó ádíshní.
2 Shidineʼé danilíinii tʼáá íiyisí bąąh shíniʼgo shijéí yineesgai.
3 Shikʼisóó, shidineʼé danilíinii yisdáhidookah biniyé bitsáskʼehgi Christ bitsʼáshidiʼdooltʼeełgo shá haʼdoodzih nidi, shił tʼáá áko doo nítʼééʼ.
4 Éí shidineʼé bidishnínígíí Ízrel dineʼé danilı̨́. Éí Diyin God tʼáá bí ádzaago baʼáłchíní danilı̨́įgo néidiinil. Tʼáá bí bee biʼoh hodidilyéehii yee yił hólǫ́ǫ́ nítʼééʼ. Diyin God bibee ahaʼdeetʼáanii nídeidiilá, bibee hazʼáanii ałdóʼ. Haash yitʼéego Diyin God yichʼįʼ nidahałáa dooígíí bił béédahózin. Diyin God yee nihoníʼáanii baa dadeestʼą́.
5 Ałkʼidą́ą́ʼ Ízrel dineʼé danilíinii dabizhéʼé yę́ę éí bitsʼą́ą́dóó Christ diné dzizlı̨́ı̨́ʼ. Éí Diyin God jílíinii tʼáá ałtsoní bee hóhólníhígíí hoolʼáágóó haa haʼniih leʼ! Tʼáá ákótʼée doo.
6 Diyin God bizaad tʼáadoo biniyéhí da silı̨́ı̨́ʼ, doo dishníigo ádíshníi da. Jó, Ízrel dineʼé doo tʼáá ádzíłtso Diyin God néidiinilii dajílı̨́į da.
7 Áádóó tʼáá ádzíłtso doo Éíbraham baʼáłchíní dajílı̨́į da, azhą́ tʼáá éí bitsʼą́ą́dę́ę́ʼ dahoʼdéechíihii dajílı̨́į nidi, háálá Diyin God ábidííniid, Áízak bitsʼą́ą́dóó naʼáłchíní náás ahoolchíiłii bíká ádahodooʼniid.
8 Jó, éí tsʼísee kʼehgo ahijoolchíłígíí* doo Diyin God baʼáłchíní dajílı̨́į da níigo ání, nidi Diyin God tʼáá bí yee nihoníʼáanii bikʼehgo yichíiłii tʼéiyá Éíbraham baʼáłchíní danilı̨́įgo yaa nitsíkees.
9 Háálá díí saad yee nihoníʼą́ągo Éíbraham ííłní, Baa hoolzhiizhgo náádeeshdááł, áko Sarah biyáázh hodooleeł.
10 Áádóó doo tʼáá éí tʼéiyá ákódzaa da, nidi diné tʼááłáʼí, nihizhéʼé yę́ę Áízak joolyéii há Rebékah iʼniiltsąądgo
11 áłchíní tʼah doo yichı̨́ı̨́góó índa yáʼátʼéehii, doodaiiʼ doo yáʼátʼéehii tʼah doo yaa naaʼaashdą́ą́ʼ Diyin God yitah yiyiizláaʼii bikʼehgo yáʼátʼééh ájooníił dooleełígíí éí dooda, nidi Diyin God tʼáá bí yíká ádííniidígíí bikʼehgo Diyin God yinahazʼáanii náás yitʼih doo biniyé
12 Rebékah áyidííniid, Alą́ąjįʼígíí éí akéédę́ʼígíí yá naalʼaʼ doo.
13 Tʼáá Diyin God bizaad bee akʼeʼashchíinii ánínígi átʼéego, Jéíkab ayóóʼóóshʼní, nidi Íisa éí jiiséłxááʼ.
14 Ákoshąʼ haʼátʼíí dadidiiʼniił? Diyin God daatsʼí doo ákwii átʼéégóó áánííł? Tsʼídá dooda lą́ą!
15 Háálá Mózes ííłní,
Tʼáá háiida baa jiideeshbaałii éí baa jooshbaʼ doo,áádóó tʼáá háiida baa aʼááh dínéesįįłii éí baa aʼááh nisin doo.
16 Áko diné tʼáá hó íiznízinii índa ájooníiłii bikʼehgo éí Diyin God doo náhodiiłteeh da, nidi tʼáá bí haa aʼááh niizı̨́įʼgo tʼéiyá náhodiiłtééh.
17 Háálá Diyin God bizaad bee akʼeʼashchíinii biyiʼdóó Féro kwííłní,
Nidi tʼáá aaníí díí biniyé aláahgo naatʼáanii ániishłaa;ninahjįʼ shibee adziilii bééhózingo ádeeshłííłáádóó nahasdzáán bikááʼgóó shízhiʼ baa haneʼ doo.
18 Áko Diyin God tʼáá bí nízinígíí yaa aʼááh hiniizįįh, áádóó tʼáá bí nízinígíí bízhą́ daʼílı̨́įgo áyósin.
Diyin God hashkénídzin áádóó aa aʼááh nízin
19 Nihí łaʼ áshididoohniił, Diyin God tʼáá hó íiznízinígíí tʼéiyá bikʼehgo diné ááníiłgo, haʼátʼíishąʼ biniyé tʼahdii bikʼíhojiʼááh? Jó, háishąʼ íiznízinígíí yichʼįʼ naaldzilgo yíneelʼą́?
20 Nidi shikʼis nílíinii, tʼóó diné nílíinii, Diyin God bidááh yáníłtiʼgo háishąʼ áshtʼı̨́ nínízin? Daʼ hashtłʼish łeetsʼaaʼásh diné ábiilaii áyididooniił, Haʼátʼíí biniyé kótʼéego áshiinilaa?
21 Hashtłʼish łeetsʼaaʼ ííłʼíinii hashtłʼish tʼááłáʼíígíí bitsʼą́ą́dóó łeetsʼaaʼ ílíinii áádóó łeetsʼaaʼ tʼáá bóhólníhígíí íidoolíiłgo bee bóhólnííh.
22 Tʼáá ákótʼéego Diyin God tʼóó báhádzidgo atíʼdeeshłííł índa shidziil ayóó átʼéii ííshjání ádeeshłííł nízingo, tʼóó báhádzidgo diné atíidoolíiłgo yá nihwiizʼą́ą́ nítʼééʼ yę́ę tʼóó nízaadgóó yichʼįʼ haʼoosniidgoshąʼ haitʼée doo?
23 Bee ayóó áníshtʼéii yitʼíní ádeeshłííł nízingo, tʼáá bítséedi yee ayóó átʼéii nihee dahodooleełgo hashtʼeʼninihinínilii nihaa aʼááh nízinii yee nihilááh neelʼą́.
24 Jó, nihí nihíká ázhdííniidii daniidlı̨́, doo tʼáá hazhóʼó Jew dineʼé bitahdóó tʼéiyá da, nidi doo Jew dineʼé danilíinii bitahdóó ałdóʼ nihíká ázhdííniid.
25 Hozéíya wolyéii binaaltsoos biyiʼ ánínígi átʼéego:
Doo shidineʼé danilı̨́į da yę́ę shidineʼé bidideeshniił,áádóó doo ayóóʼádaóshʼníi da yę́ę ayóóʼádaóshʼníinii bidideeshniił.
26 Áádóó ákótʼée dooleeł, Shidineʼé doo danohłı̨́į da, biʼdooʼniidiitsʼídá tʼáá éí hazʼą́ągi, Diyin God hináanii baʼáłchíní danilı̨́ biʼdiʼníi dooleeł.
27 Áádóó Aizéíyah wolyéii Ízrel dineʼé yaa yáłtiʼgo yee haadzííʼ,Azhą́ Ízrel baʼáłchíní tónteel bibąąhgóó séíigi ánéelą́ąʼ niditʼáá díkwííhígo tʼéiyá yisdádooʼnił,
28 háálá nahasdzáán bikáaʼgi Bóhólníihii yee aa nídóotʼįįłii tʼáadoo łaʼ ááhásįįhítsʼídá tʼáá ákoh góneʼ tsı̨́įłgo ałtso łaʼyidoolííł.
29 Tʼah doo áhánééhdą́ą́ʼ Aizéíyah yee haadzííʼ yę́ęgi átʼéego,Tʼáá ałtsoní bee Bóhólníihii nihidineʼé doo łaʼ ánéisįįdgóogo,Ízrel dineʼé daniidlíinii Sádam índa Gomárah dineʼé ábiʼdisdįįd yę́ęgi ádaniitʼée doo nítʼééʼ.
Ízrel dineʼé haneʼ yáʼátʼéehii doo bił adaaníi da
30 Ákoshąʼ haʼátʼíí dadidiiʼniił? Jó, kódadidiiʼniił, Doo Jew dineʼé danilíinii tsʼídá tʼáá ákogi ádaatʼéii doo hádaatʼı̨́į da nidi Jesus dayoodlą́ągo yaa dadzólíigo tsʼídá tʼáá ákogi ádaatʼé daazlı̨́ı̨́ʼ,
31 nidi Ízrel dineʼé tʼéiyá, bee hazʼáanii bikʼeh dahoniilʼı̨́įgo tsʼídá tʼáá ákogi ádaniitʼée dooleeł danízin nítʼééʼ, ákondi éí yee tsʼídá tʼáá ákogi átʼéii chʼééh yíká ádáátʼįįd.
32 Haʼátʼéegoshąʼ? Jó, Jesus doo dajoodlą́ą́góó bee hazʼáanii binahjįʼ chʼééh ádajíítʼįįdgo éí bąą. Tsé bikʼee dazhdidoogohii biniinaa dazdeezgoʼ.*
33 Diyin God bizaad bee akʼeʼashchíinii éí tsé yaa halneʼgo kóní:
Jóʼakon, Záíyangi tsé biniinaa dazhdidoogohii ninishʼaah.Tsé biniinaa ádił ayoolzihii átʼé.Nidi hoodlą́ągo haa dzólíhígíí dooyaa yánízingóó ábidiʼdoolnííł.
Footnotes
^ Tsʼísee kʼehgo ahijoolchíłígíí nínígíí éí Íshmeiyel Héígar biyáázh ááhyiłní. Gen. 16. Yee nihoníʼáanii bikʼehgo yichíiłii, nínígíí éí Áízak Sárah biyáázh ááhyiłní. Gen. 21.
^ Tsé nínígíí éí Jesus ááhyiłní.
