Ruth 1:1-22
1 Ákódzaago ándahodiiʼaahii bídahólníihgo yoołkááł yę́ędą́ą́ʼ Ízrel dineʼé bikéyahgi hodííchįįd. Áko Béthlehem kin shijaaʼgi Júdah kéyahdóó diné léiʼ dah diiyáago tʼóó átsééd chʼaajookahgo Móʼab kéyahgóó jíkai.
2 Diné éí Elímelek wolyé áádóó beʼasdzą́ą́ éí Neiyómii wolyé índa biyeʼké éí łaʼ Málan áádóó łaʼ Kíliyan wolyé, Éfata dineʼé dajílı̨́įgo Béthlehem kin shijaaʼgi Júdah kéyah biyiʼ kéédahojitʼı̨́ı̨́ nítʼééʼ. Áko Móʼab kéyahdi jíkaigo ákwii kéédahojitʼı̨́ı̨́ nítʼééʼ.
3 Nidi Neiyómii bahastiin Elímelek daaztsą́, áko hayáázh nidiltʼéhígíí bił chʼíjookai.
4 Díí ashiiké éí Móʼab dineʼé asdzání yá ázyeh, łaʼ Órpah wolyé, łaʼígíí éí Ruth wolyé. Ákwii bił kéédahojitʼı̨́įgo neeznáá daatsʼí nááhai.
5 Nítʼééʼ Málan áádóó Kíliyan tʼáá áłah neezná, áko éí asdzání biyáázhké bąąh nástʼįįd áádóó bahastiin ałdóʼ bąąh nástʼįįd.
6 Áko nízhdiiʼnaʼgo hazhááʼáád nítʼéʼígíí bił Móʼab kéyahdóó nihééjíkai, háálá Móʼab kéyahgi díí baa hozdiiztsʼą́ą́ʼ: haash yitʼéego Bóhólníihii bidineʼé yikʼiinítʼı̨́įʼgo chʼiyáán yeidiníʼą́.
7 Ákohgo nijigháhídóó dah nízhdiidzá; hazhááʼáád nidiltʼéhígíí tʼáá bił Júdah kéyahgóó dah nízhdiikai.
8 Nidi Neiyómii hazhááʼáád nidiltʼéhígíí ábijiní, Nílááh, nihimá bighangóó nídóhtʼaash. Shí áádóó ádajídinígíí nihaa jiinohbaʼ yę́ęgi átʼéego Bóhólníihii nihił hólǫ́ǫgo nihaa joobaʼ doo.
9 Bóhólníihii lá nihahastiin łaʼ bił náádanihighango háádaałyı̨́įhgo ánéidoodlííł. Ákohgo tʼóó bizazhnootʼą́ áádóó yéego anáádazhniicha.
10 Áko áhodííniid, Tʼáá aaníí nidineʼé bichʼįʼ nił néiikah doo.
11 Nidi Neiyómii ání, Tʼóó tʼą́ą́ʼ nídóhtʼaash, shichʼéʼéké, haʼátʼíísh biniyé shił nááhkah doo? Daʼ anáádíʼnéestsąąłgoósh nááʼdeeshchíiłgo shiyáázhké nááhódlǫ́ǫgo éí nihahastiin náádoodleeł?
12 Shichʼéʼéké, nihílááh, tʼóó nídóhtʼaash, háálá shíyeeʼ doo shahastiin nááhódleʼ átʼéégóó hasistih. Bíká shił chohooʼı̨́ dííniidgo, díí tłʼéeʼda shahastiin nááhodoodleełgo áádóó shiyáázhké nááhodoodleełgo
13 nininísą́ąjįʼísh bibaʼ ánóhtʼée doo? Índa nihá nááʼdoohgehgiísh biniyé ádaa áhółyą́ą doo? Dooda, shichʼéʼéké; jó, tʼáá íiyisí nihąąh shíniʼgo Bóhólníihii bigaan yee shichʼįʼ nahodíłgééz.
14 Áko tʼáá íiyisí ánáádazhʼniichago atínáádazdineesdlı̨́ı̨́ʼ, áko Órpah yizhááʼáád nilíinii yiztsʼǫs, nidi Ruth éí hazánázniiʼ.
15 Áko ázhdííniid, Shoo, bił ííyéehii Órpah bidineʼé áádóó bidiyin yichʼįʼ anáádzá, nílááh, bił ííyéehii bikééʼ nídídááh.
16 Nidi Ruth áhodííniid, Nitsʼą́ą́ʼ dah nídideeshdáłígíí tʼáadoo baa náshiinikąąhí; jó, tʼáá hidínááhgóó nił honishłǫ́ǫ doo, kééhótʼı̨́įgi nił kééhashtʼı̨́į doo, nidineʼé éí shidineʼé doo, áádóó niDiyin God éí shiDiyin God doo;
17 dadíítsaałgi shí ałdóʼ ákwii dadeestsaał áádóó ákwii łeeh shidiʼdooltééł. Bíniʼdii Bóhólníihii ákóshílééhdóó tʼah yówehgo, tsʼídá lá anoonééł tʼéí ałtsʼánihidoonił ni.
18 Ákohgo índa Neiyómii éí Ruth tsʼídá hoł nihideeshʼashí nízingo yee hashtʼeʼnitsíníkéezii bikʼizhdiitą́, áko tʼáadoo ákónáázhdooʼniid da.
19 Áko tʼáá ájíłah dashdiiʼáazhgo Béthlehem kin shijaaʼdi níjítʼáázh. Áko Béthlehemgi jiníʼáazhgo tʼáá átʼé kintahgóó tʼóó hakʼee bił adahóóyóí, áko ádaaní, Daʼ díísh Neiyómii átʼı̨́?
20 Áko ábijiníí lá, Tʼáadoo Neiyómii* dashidohníní; Mára* dashidohní, háálá Aláahgo Ayóóʼábóodziilii tʼáá íiyisí bikʼeʼeshchʼíʼígi áshííłʼįįd.
21 Kodóó yóóʼadineeshʼná, tʼáá ákohígo Bóhólníihii shił nátʼáázh. Haʼátʼéegoshąʼ Neiyómii dashidohní, háálá Bóhólníihii atíshííłʼįįd áádóó Aláahgo Ayóóʼábóodziilii chʼénátsoh bééʼooʼníihii yiih shííłtʼeʼ.
22 Ákohgo Neiyómii nídzídzá; Ruth éí Móʼab dineʼé nilı̨́įgo hazhááʼáád Móʼab kéyahdę́ę́ʼ bił níjítʼáázh. Áko Béthlehemgi tsʼídá tłʼoh naadą́ą́ʼ bideeʼí bidaʼniigizh lágo níjítʼáázh.
Footnotes
^ Neiyómii éí Hííbrew kʼehjígo, Baa hózhóonii, jiníigo óolyé.
^ Mára éí Hííbrew kʼehjígo, Bikʼeʼeshchʼíiʼii, jiníigo óolyé.
