Ruth 2:1-23
2 Áko Neiyómii hahastiin yę́ę Elímelek wolyéii łaʼ diné ayóó átʼé atʼíinii yikʼéí nilı̨́; éí Bóʼaz wolyé.
2 Áko Ruth éí Móʼab asdzání nilíinii Neiyómii áyidííniid, Shíniʼdii kʼad dáʼákʼehgóó dishááh; tłʼoh naadą́ą́ʼ bideeʼí daagizhgi ajoobaʼ bee shichʼohaʼnéego shąąh tsídookosígíí bikééʼ nahodishdáa doo. Áko ábijiní, Nílááháneeʼ, shichʼéʼé.
3 Tʼáá áko dah diiyáago dáʼákʼehgi daʼayizhii bikééʼgóó nahozhdidá, áko Bóʼaz éí Elímelek yę́ę bikʼéí nilı̨́įgo bidáʼákʼehjįʼ ajííyá.
4 Áádóó jó, Béthlehem kin shijaaʼdę́ę́ʼ Bóʼaz níyáago daʼayizhígíí áyidííniid, Bóhólníihii nihił hólǫ́ǫ doo. Áko áńdahodooʼniid, Bóhólníihii nikʼijidlí.
5 Ákohgo Bóʼaz éí bá naalʼaʼí bikʼehgo daʼjiyizhígíí áyidííniid, Díísh háí bichʼikę́ę́h átʼı̨́?
6 Naalʼaʼí bikʼehgo daʼagizhígíí ánáádooʼniid, Móʼab dineʼé chʼikę́ę́h átʼı̨́, Móʼab kéyahdę́ę́ʼ Neiyómii yił nátʼáázh.
7 Éí ání, Nánooshkąąh, shíniʼ ahandaʼiiljoołgo daʼayizhii tʼáá bikééʼgóó nahodishdáa doo. Ákohgo jiníyáago abínídóó wóshdę́ę́ʼ tʼááłáhígi ájítʼı̨́, tʼáá hazhóʼó tʼóó kónízahíjįʼ kin góneʼ háájoolyı̨́ı̨́ʼ.
8 Ákohgo Bóʼaz éí Ruth ábijiní, Kʼad shíísíníłtsʼą́ą́ʼ, shitsiʼ, díí dáʼákʼeh bitsʼą́ąjįʼ náánáłahdi nínááhodídáa doo biniyé dah doóyaʼ lágo, nidi chʼikę́ę́h shá nidaalʼaʼígíí tʼéiyá bíighahgóó nanináa doo.
9 Jó, dáʼákʼehgi daʼayizhgóó tʼéí díníʼı̨́ı̨́ʼ, ákǫ́ǫ́ bikééʼ nahodídá. Tsíłkéí hazhóʼó ábidishní, Tʼáadoo baa nídaahtʼíní. Ákohgo dibááʼ nánídleehgo tsíłkéí tó háádayiikáhígi nánídáahgo náʼídlı̨́įh doo.
10 Ákohgo yaa azhnoolneʼgo niʼjįʼ yaa ádziidzaago ábijiní, Haʼátʼéegoshąʼ ajoobaʼ bee shichʼohaʼnéego shiníníłʼı̨́? Jó, shaa ákoninizı̨́įʼgo déʼéyóní nishłı̨́.
11 Nidi Bóʼaz ánáhodooʼniid, Nahastiin daaztsą́ą́dóó wóshdę́ę́ʼ bizhááʼáád nílíní tʼáá átʼé bá íinidzaaígíí bee shił hóóneʼ. Nizhéʼé áádóó nimá índa nikéyah bitsʼą́ą́ʼ dah diniyáago doo ééhonísingi yíníyáá lá.
12 Íinidzaaígíí éí Bóhólníihii yikʼé nichʼįʼ nináʼdoodlééł, áádóó Ízrel dineʼé biBóhólníihii Diyin God nichʼįʼ niʼdoolééł; bitʼaʼ biyaajįʼ nííníyáago baa jiisíníliʼ lá.
13 Áko ázhdííniid, Hániʼdii náásgóó shichʼohasneʼgo shiníníłʼı̨́į doo, bóhonishníihii; jó, shikʼéé hwííníłtaaʼ, áádóó jiiníbaʼgo chʼikę́ę́h ná naalʼaʼí bichʼįʼ háínídzííʼ; azhą́ ná naalʼaʼí doo nishłı̨́į da nidi ádíní.
14 Áko Bóʼaz áhodííniid, Hágo, idaʼniidą́ąʼjįʼ ahoolzhiizh; bááh łaʼ dííyı̨́ı̨́ł; chʼil naʼatłʼoʼii bitooʼda bééʼíʼáahgo niyą́. Ákohgo daʼayizhii bíighahgi dzineezdáago shą́ą́ʼ niiltʼé hayaa nizhníką́, áádóó ajííyą́ąʼgo hwiih dzizlı̨́ı̨́ʼ, índa łaʼ tʼáá biʼoh nizhʼníyą́ą́ʼ.
15 Ninááhozhdidoodaał biniyé nízhdiiʼnaʼgo Bóʼaz beʼashiiké yichʼįʼ haadzíiʼgo ání, Bíniʼdii bidaʼastłʼónígíí nidi bitahgóó ninááhodidá. Tʼáadoo tʼóó baa yáhásinígi ádabidohníní.
16 Bíniʼdii álákʼee hadeezbin bíighahgo tłʼoh naadą́ą́ʼ bideeʼí nidaahnilgo éí ádá náyiidláah doo. Tʼáadoo nidadohteehí.
17 Ákohgo dáʼákʼehgi nahodidáago iʼííʼą́, áko náyiizláʼígíí níłkʼíyíʼneesxaalgo tłʼoh naadą́ą́ʼ bideeʼí bee naakáhí íífa* wolyéhígíí tʼááłáʼí bíighahgo áyiilaa.
18 Éí néidiiką́ągo kintahgóó anáádzá; nihizdeesnilígíí bizhááʼáád jílı̨́ı̨́ nítʼéʼígíí bichʼįʼ ííshją́ą́ ájiilaa áádóó chʼiyáán biʼoh ajííyą́ʼígíí baazhnínil.
19 Bizhááʼáád jílíinii áháłní, Jı̨́ı̨́dą́ą́ʼ háadishąʼ ninááhodínídzá? Háadi lá nínááʼiyínídlááʼ? Diné naa ákoniizı̨́ʼígíí bikʼihojidlíi doo. Ákohgo bizhááʼáád jílíinii bił hojoolneʼgo bił ajííyizhígíí baa hojoolneʼgo ázhdííniid, Jı̨́ı̨́dą́ą́ʼ bił íiyizhígíí éí Bóʼaz wolyé.
20 Neiyómii hazhááʼáád ábizhdííniid, Éí Bóhólníihii bikʼijidlíi doo; bijoobaʼ éí dahináanii índa daneeznáanii doo yóóʼiidiʼaah da. Neiyómii ánááhodooʼniid, Éí diné nihikʼéí átʼé; ahánígo nihikʼéí nilı̨́.
21 Áko Ruth éí Móʼab dineʼé jílíinii ázhdííniid, Kweʼé ałdóʼ kóshidííniid, Shidáʼákʼehgi ałtso daʼííyizhjįʼ tsíłkéí shá nidaalʼaʼí tʼéí bíighahgi nanináa doo.
22 Neiyómii éí Ruth hazhááʼáád ábizhdííniid, Éí yáʼátʼééh, shichʼéʼé, nílááh, chʼikéí bá nidaalʼaʼí bił nanikaigo doo łahdi dáʼákʼehgi ninááhodídáa da doo.
23 Ákohgo Bóʼaz bá chʼikéí nidaalʼaʼígíí tʼéí bíighahgi nijigháago tłʼoh naadą́ą́ʼ bideeʼí áádóó tłʼoh naadą́ą́ʼ ałtso daagizh; bizhááʼáád jílíní bił kééhojitʼı̨́ı̨́ nítʼééʼ.
Footnotes
^ Íífa jiníigo éí tsitsʼaaʼ bilasáana bee naakáhígíí ałtsʼíísígo bitisgo áníłtsoígíí óolyé.
