Ruth 3:1-18
3 Ákohgo Neiyómii bizhááʼáád nilíní áyidííniid, Shichʼéʼé, daʼ hooghanísh doo ná háshtʼı̨́į da doo? Éí ná yáʼátʼéehii átʼé.
2 Áko kʼad Bóʼaz éí tʼáá aaníí nihikʼéí jílı̨́; éí há nidaalʼaʼí chʼikéí bił nanikai. Jó, díí tłʼééʼ haʼalʼéesgi tłʼoh naadą́ą́ʼ bideeʼí yąąh yoołchʼíih doo.
3 Éí bąą táʼádígisgo tłashchíín bee ádíltłah, áádóó niʼééʼ agháago yáʼátʼéehii bee hadínééh áádóó haʼalʼéés góyaa díínááł, ákondi doo tʼáá hooshchʼįʼ diné bichʼįʼ ádééhodíílzįįł da, ałtso ííyą́ąʼgo índa.
4 Áko neeztı̨́įgo neeztı̨́įgi hazhóʼó hashtʼeʼnibídíílyęsh, áádóó yah adíínáałgo bikeeʼjįʼ bikʼi didííłtsosgo ákǫ́ǫ́ díníítééł, áko ádííníiłgi yee nił hodoolnih.
5 Áko ánááhodooʼniid, Tʼáá ádíníígóó ááshníił doo.
6 Áko haʼalʼéés góyaa dashdiiyá áádóó bizhááʼáád jílíní tʼáá áhodííniidígi ádziidzaa.
7 Áko áádóó Bóʼaz ííyą́ą́ʼ áádóó oodlą́ąʼgo bijéí bił hózhǫ́ǫgo tłʼoh naadą́ą́ʼ bideeʼí tʼóó ałkʼi yanáaʼá bíighahgi neeztı̨́. Áádóó hazhóóʼógo yah ajiʼyíítsʼiʼgo bikeeʼjįʼ bikʼizdííłtsoozgo ákwii dzineeztı̨́.
8 Tłʼéʼííłníiʼgo diné deesyizgo náhaashjish, nítʼééʼ jó, hakeeʼjigo asdzání léiʼ sitı̨́ı̨́ lá.
9 Háishąʼ ánítʼı̨́? hodííniidgo ázhdííniid, Ruth, chʼikę́ę́h ná naalʼaʼí áshtʼı̨́; ná naalʼaʼí niʼééʼ bikʼíníłtih,* háálá áhánígo nihikʼéí nílı̨́.
10 Áko ábijiní, Bóhólníihii nikʼijidlíi doo, shitsiʼ, díí ajoobaʼ akéeʼdiígíí átséhígíí biláahgo ayóó átʼéego shaa jiisíníbaʼ; jó, tsíłkéí bahajoobáʼíii, doodaiiʼ atʼíiniida tʼáadoo łaʼ bikééʼ dah diniyáa da.
11 Kʼad shitsiʼ, tʼáadoo nił yéʼí, yíníkeedígíí tʼáá ałtso ná biʼeeshłíił doo, háálá shidineʼé kintahgóó tʼáá ałtso néédahósingo, asdzání ílíinii nílı̨́.
12 Tʼáá aaníí áhánígo nihikʼéí nishłı̨́, ákondi náánáłaʼ shiláahgo áhánígo nihikʼéí nilíinii ałdóʼ hólǫ́.
13 Hayííłką́ąjįʼ tʼáá akǫ́ǫ́ sínítı̨́, áko abínígo éí akʼéí nilíinii yaa nidaakaígíí ná yaa naayáago, éí yáʼátʼééh; bíniʼdii ákónééh, nidi éí tʼáadoo ná ádzaagóogo, tsʼídá tʼáá aaníí Bóhólníihii hiná; ákótʼéego shí tsʼídá tʼáá aaníí akééʼ góneʼ akʼéí nilíinii yaa nidaakaígíí ná ádeeshłííł. Hayííłką́ąjįʼ tʼóó sínítı̨́.
14 Hakeeʼjigo dziztı̨́įgo hayííłką́, áko tʼah doo łaʼ haa ákoniizįįhgóó nízhdiiʼnaʼ, áádóó áhozhdííniid, Haʼalʼéesgi asdzání níyáhígíí doo łaʼda bił bééhodoozįįł da.
15 Áko ánáábizhdiʼní, Beeldládí ééʼ bee nanináhígíí deʼníłtsóosgo kweʼé dah diiłtsóós. Áko ákwii dashdiiłtsooz índa tłʼoh naadą́ą́ʼ bideeʼí azis ałníʼneelʼą́ bíighahgo há hééł áyiilaago hazéidéíyı̨́, áádóó kin haalʼáágóó jiníyá.
16 Áko índa bizhááʼáád jílíní baa nídzídzáago áhodííniid, Shichʼéʼé, haa hóótʼįįd? Áko diné há ádzaaígíí tʼáá átʼé bee bił hojoolneʼgo
17 ájíní, Díí tłʼoh naadą́ą́ʼ bideeʼí hastą́ądi haką́ągo sheiníjaaʼ, háálá áshíłní, Bizhááʼáád nílíní bichʼįʼ doo tʼáá ákóhígo nihéédíídáał da.
18 Áko ázhdííniid, Haaʼíshąʼ, shichʼéʼé, tʼóó hashtʼeʼsínídá; nił bééhoozingo haitʼı̨́į dooleeł; jó, díí jı̨́ daatsʼí tʼáadoo hashtʼeditʼeehí ałtso nidoolnish.
Footnotes
^ Ná naalʼaʼí niʼééʼ bikʼíníłtih nínígíí éí, Shá iiyeh, níigo ání.
