Song of Solomon 1:1-17
1 Díí Sálaman biyiin aláahgo átʼéhígíí:
2 Bíniʼdii náshiitsʼǫs, háálá neʼayóóʼóʼóʼniʼ éí wáin biláahgo łikan.
3 Neʼakʼah éí łikání halchin; nízhiʼ éí akʼah łikání halchinii yadziidígíí nahalin; éí bąą chʼikéí ayóóʼádanóʼní.
4 Áchʼįʼ shidídzı̨́įsgo ahiniilchéeł doo. Aláahgo naatʼáanii tʼáá bí bighan góneʼ shił yah ííʼáázh. Naa nihił dahózhǫ́ǫ doo áádóó tʼáá íiyisí nihił nidahoozhǫǫh doo. Neʼayóóʼóʼóʼniʼ éí wáin biláahgo béédeiilniih doo. Tʼáá ákogi ádaatʼéii ayóóʼádanóʼní.
5 Jerúsalem bichʼéʼéké danohłíinii, Kíídar dineʼé biníbaal naaznilígi átʼéego áádóó Sálaman biníbaal biyaadi daníbaalii daalzhinígi átʼéego łinishzhíínígo nishóní.
6 Łinishzhíínígo biniinaa tʼáadoo dashinółʼíní, háálá jı̨́honaaʼéí shiishı̨́ı̨́ʼ. Shimá biyáázhké shichʼįʼ bá nídahachįįhgo chʼil naʼatłʼoʼii yílʼáii baa áháshyą́ągo ádashiilaa. Nidi tʼáá shí shichʼil naʼatłʼoʼii doo baa áháshyą́ą da nítʼééʼ.
7 Ni lą́ą shiiʼ sizíinii ayóóʼánóʼníinii, shił hólneʼ: Háadishąʼ nidibé nídaʼałchosh? Ałnéʼéʼáahgo háadishąʼ hanínádaalyįh? Haʼátʼíísh biniyé nidaʼniłkaadii bił ałchʼodaniʼníinii yikééʼ asdzání biniiʼ yikʼínáʼáłtihgo yóóʼanádáhígi áshtʼı̨́į doo.
8 Asdzání baa dzólníinii nílíinii, doo nił bééhózingóó, nílááh, tʼáá dibé eekaigóó yínááł. Nidaʼniłkaadii biníbaal binaagi nitłʼízí yázhí nidaʼałchozh leʼ.
Báʼdoogehii áádóó adooyehii
9 Ni lą́ą ayóóʼánííníshʼníinii, Féro bitsindaabąąs bijáád naakiígíí łı̨́ı̨́ʼtsaʼii bighą́ą́h dízíinii éí bił ahąąh nininínil.
10 Nitłʼiz ałtaasʼéí daʼahólzhaʼgo nitsiiʼ náztʼiʼgo niniitsįʼ bikʼijįʼ nidahaazhjéeʼgo bee nízhóní; yooʼ nizhóníii nizénáztʼiʼ.
11 Óola éí béésh łigaii bee naashchʼąąʼgo niyoʼ ná ádadiilnííł.
12 Aláahgo naatʼáanii bibikááʼ adání yichʼįʼ dah sidáago shitłah łikání halchinii bee łikání bitsʼáhoníʼá.
13 Ayóóʼóóshʼníinii éí tsin bijeeh łikání halchinii dádeestłʼǫ́ǫgo shibeʼ bitaʼgi dah siłtsooz nahojílingo yiską́.
14 Ayóóʼóóshʼníinii éí Engíídai kéyahdi chʼil naʼatłʼoʼii yílʼáii bitahgóó héna wolyéii bílátah nídeigahígíí nahojílin.
15 Ayóóʼánííníshʼníinii, dooládóʼ ayóó áníínílnin da, shoo, ayóó áníínílnin, jó, hasbídí yinílnááʼ.
16 Ayóóʼánííníshʼníinii, dooládóʼ naa dzólníi da, jóʼakon. Tʼáá aaníí, ayóó áníínílnin. Nihitsáskʼeh ałdóʼ hoolcházhí.
17 Gadtsoh bitsʼáozʼaʼ éí nihikin bá áah sitáán áádóó chʼó éí bééhéeshjééʼ nahalin.
