Song of Solomon 2:1-17
2 Shéran nahósʼaʼdóó chǫǫh áádóó dahoníteelgóó tłʼééʼ iigahí nishłı̨́.
2 Chʼil dadeeníinii bitahgi tłʼééʼ iigahí sikaadígi átʼéego chʼikéí danilíinii bitahgi ayóóʼóóshʼníinii hólǫ́.
3 Tsintahgi bilasáanii sikaadígíí nahalingo ayóóʼóóshʼníinii tsíłkéí yitahgi naaghá. Tʼáá íiyisí shił hózhǫ́ǫgo bichahaʼoh biyaagi nédá áádóó bineestʼąʼ shił ayóó áhálniih.
4 Ídaʼazįįd néitʼaahgi shił níʼáázh áádóó bibee ayóóʼóʼóʼniʼ éí bidah naʼatʼaʼí nahalingo shikʼijįʼ yideesbaal.
5 Chʼil naʼatłʼoʼii tʼáá bízhání łeesʼáán ályaii áádóó bilasáana shá náʼíltsoʼgo shikʼi hółtaʼ, háálá ayóóʼóʼóʼní bídin shiʼniitsą́.
6 Bílaʼ nishtłʼají yee shitsiiyah déesniiʼ áádóó bigaan nishʼnáájí yee shinázniiʼ.
7 Jerúsalemdóó chʼikéí danohłíinii, jádí, doodaiiʼ bįįhtsaʼii ádaatʼéhígíí bee ádee hadadidoohdzihígíí baa nánihooshkąąh. Ayóóʼóóshʼníinii tʼáadoo binaagóó nidaʼołchʼízhí índa chʼéédaosííd yíilaʼ; bíniʼ ałhosh.
8 Geʼ, ayóóʼóóshʼníinii biinééʼ hoyooltsʼı̨́ı̨́ł! Shoo, dziłghą́ą́ʼdę́ę́ʼ dah náníljı̨́įhgo yigááł áádóó dah daaskʼidę́ę́ʼ hootʼeeł.
9 Ayóóʼóóshʼníinii éí jádí, doodaiiʼ bįįhkąʼ nahalin, jóʼakon. Tsé yítłʼinígíí bineʼdę́ęʼgo sizı̨́įgo tsésǫʼgi tsin yistłʼǫ́ǫgo dádiníbaalígíí yiníká déezʼı̨́ı̨́ʼ.
10 Ayóóʼóóshʼníinii shichʼįʼ haadzíiʼgo áshidííniid, Ayóóʼánóshʼníinii, shił ayóó áníínílninii, nídiidáahgo nahgóó shił díʼaash.
11 Háálá ałtso yíhai; ałtso ahóółtą́.
12 Nihokááʼgóó chʼilátah hózhóón hanáánootʼą́; tsídii ádaaníijįʼ anáhoolzhiizh áádóó nihikéyah bikááʼgóó hasbídí ádaaní yitsʼaʼ.
13 Tsin fig sikaadii bineestʼąʼ bąąh dahazlı̨́ı̨́ʼ áádóó chʼil naʼatłʼoʼii bílátah daʼiigaigo łikání bitsʼáhoníʼá. Ayóóʼánóshʼníinii, shił ayóó áníínílninii, nídiidáahgo nahgóó shił díʼaash.
14 Shihasbídí nílíinii, tsé daakʼizgóó, tsé nídaʼdeezbaalgóó honílóonii, haaʼíyeeʼ niniiʼ níshʼı̨́, haaʼíyeeʼ niinééʼ dideestsʼı̨́ı̨́ł, háálá niinééʼ nizhóní yeeʼ áádóó niniiʼ nizhóní yeeʼ.
15 Mąʼii dootłʼizhí yázhí éí chʼil naʼatłʼoʼii deílʼáágóó nidahwiiłchxǫǫhii bił nidahidiidił, háálá nihichʼil naʼatłʼoʼii bílátah daʼiigai.
16 Ayóóʼóóshʼníinii shííʼ nilı̨́ áádóó bííʼ nishłı̨́; tłʼééʼ iigahí bitahgóó bidibé yá naagháago nidaʼałchozh.
17 Tʼah doo eʼeʼaahgóó, tʼah doo chahaʼoh iildóóhgóó shichʼįʼgo náníyisgo shaa nínááh, ayóóʼánóshʼníinii. Bííther dził daníʼáágóó jádí, doodaiiʼ bįįhkąʼ naagháhígíigi ánítʼée doo.
