Song of Solomon 3:1-11
3 Tłʼéeʼgo shitsáskʼeh bikááʼ sétı̨́įgo shiiʼ sizíinii ayóóʼáyóʼníinii bił nitsínískees; bił nitsínískees, nidi tʼáadoo bikʼíníyáa da nisin.
2 Kʼad nídideeshʼnahgo kintahgóó deesháałgo kintaa daʼaztiingóó índa hóteelgo dahonítʼiʼgóó tʼáá íiyisí ayóóʼóóshʼníinii há dídéeshʼįįł. Hanítą́ąʼ nidi, tʼáadoo bikʼíníyáa da.
3 Nítʼééʼ tłʼééʼ naagháhí kintahgóó hadaʼasíidgo nidaakaígíí shikʼídaaskai, áko ábidííniid, Shiiʼ sizíinii ayóóʼáyóʼníiniísh daołtsą́?
4 Tłʼééʼ naagháhí tʼóó bitsʼą́ą́ʼ dah diiyáhígo shiiʼ sizíinii ayóóʼáyóʼníinii bikʼíníyá. Shimá bighanjįʼ hoł níʼáazhgo áádóó shíʼniiltsąądii bighan góneʼ hoł yah ííʼáazhjįʼ hwííníshtąʼgo tʼáadoo hodííchid da.
5 Jerúsalemdóó chʼikéí danohłíinii, jádí, doodaiiʼ bįįhtsaʼii ádaatʼéhígíí bee ádee hadadidoohdzihígíí baa nánihooshkąąh. Ayóóʼóóshʼníinii tʼáadoo binaagóó nidaʼołchʼízhí índa chʼéédaosííd yíilaʼ; bíniʼ ałhosh.
Iigehgóó ałkééʼ dzideeztʼiʼ
6 Háíyeeʼ níléí honoojíídę́ę́ʼ łid yadaatʼiʼ nahalingo tsin bijeeh łikání halchinii mir áádóó fránkinsens wolyéii índa ádíjihí nidahaniihígíí bee bitsʼáhoníʼáago yigááł.
7 Shoo, Ízrel dineʼé dahayóii bitahdóó diné dahayóii hastą́diin yiltʼéego Sálaman bibikááʼ dah asdáhí hadiinézígíí łaʼ bił nideiʼáago, łaʼ éí binaagóó baa ádahalyą́.
8 Éí tʼáá ałtso diltłish naachʼid dayiichįįh áádóó anaaʼ álʼı̨́ dayiichįįh. Tłʼéeʼgo náhádzidígíí biniinaa éí tʼáá ałtso diltłish bąąh daníʼá.
9 Aláahgo naatʼáanii Sálaman bibikááʼ dah asdáhí hadiinézígíí éí Lébanan kéyahdóó dilkʼis bee bá ályaa.
10 Bikʼijįʼ bee chahaʼoh bá yadaaʼáhí éí béésh łigaii bee bá ályaa; bitłʼááhdę́ę́ʼ haʼnaa daníʼáhígíí éí óola bee bá ályaa; dah nánídaahgi Jerúsalemdóó chʼikéí danilíinii ayóóʼádahóʼníigo bąą naʼatʼą́hí tsídídééh nahalingo łichíʼígíí há yikʼídeistiʼ.
11 Aláahgo naatʼáanii Sálaman iiyeh yę́ędą́ą́ʼ baa hoł hózhǫ́ǫgo hamá éí naatʼá chʼah hakʼiidííʼą́. Záíyandóó chʼikéí danohłíinii, nihílááh, Sálaman naatʼá chʼah hakʼi díʼą́ągo dahodínóołʼįįł biniyé ákǫ́ǫ́ dadohkááh.
