Song of Solomon 4:1-16
4 Ayóóʼánóshʼníinii, nízhóní yeeʼ jóʼakon, nízhóní yeeʼ; niniiʼ bichʼą́ą́h naníbaalígíí biníkáajįʼ hasbídí yinílnááʼ; nitsiiʼ éí Dził Gíliyad binániijįʼ tłʼízí shijéʼígíí nahalin.
2 Dibétsaʼii ániid tádadoogizhgo áádóó táádaasgizgo índa tʼáá ałtso naakií nidayiishchı̨́įgo tʼáadoo łaʼ hááʼéel daígíigi átʼéego niwooʼ łigai.
3 Nidaaʼ éí bee náʼálkadí łichxíʼígíí nahalin; nizééʼ hózhónígo yáníłtiʼ. Nítłʼahdóó tʼáá ałchʼijí éí niniiʼ bichʼą́ą́h naníbaalígíí bineʼdę́ę́ʼ tsin bineestʼąʼ pámgrenit* wolyéhígíí ałnííʼdóó aháágizhígíí nahalin.
4 Nikʼos éí David bikin yaaʼáago bee naʼabaahii bá hooghan ályaii nahalin; éí tłʼóóʼdę́ęʼgo naagé tʼááłáhídi mííl éí diné dahayóii binaageʼ tʼáá ałtso dah dahidínil.
5 Nibeʼ tʼáá áłah éí jádí yázhí naakií yizhchíinii tłʼééʼ iigahí yitahgóó naʼałchozhígíí nahalin.
6 Tʼah doo eʼeʼaahgóó, tʼah doo chahaʼoh iildóóhgóó tsin bijeeh łikání halchinii mir wolyéii dził bił daníʼáágóó índa tsin bijeeh łikání halchinii fránkinsens wolyéii bił dah daaskʼidgóó deeshááł.
7 Ayóóʼánóshʼníinii, tʼáá íiyisí nízhóní yeeʼ; nizhiin nidi ádin.
8 Dził Lébanandę́ę́ʼ shił yíʼash doo. Báʼdeeshxehii nílíinii, Dził Lébanandę́ę́ʼ shił yíʼash doo. Dził Amána bighą́ą́ʼdóó áádóó Dził Sénir índa Dził Hérman naaznilígíí bighą́ą́ʼdóó dídíitʼįįł; náshdóítsoh bitsiijįʼ ditłʼooígíí dabiʼáándóó índa náshdóíłkiizh éí dził yąąh nidaakaídóó dídíitʼįįł.
9 Shilah índa báʼdeeshxehii nílíinii, yéego shijéí hidíníłnááʼ; tʼááłáhídi adeesgalígíí bee índa tʼááłáʼí niyoʼígíí bee yéego shijéí hidíníłnááʼ.
10 Shilah índa báʼdeeshxehii nílíinii, dooládóʼ bee ayóóʼáshííníʼníinii nizhóní da; wáin biláahgo dooládóʼ bee ayóóʼáshííníʼníinii yáʼátʼéeh da, áádóó łikání dahalchinii spáis wolyéii tʼáá ałtso biláahgo dooládóʼ neʼakʼah łikání halchinii aláahgo łikání halchin da.
11 Báʼdeeshxehii nílíinii, yáníłtiʼgo nidaaʼ bąąhdę́ę́ʼ tsésʼná bitłʼizh nahidilchʼą́ą́ł nahalin. Tsésʼná bitłʼizh índa abeʼ nitsooʼ biyaagi hólǫ́. Niʼééʼ éí Dził Lébanandóó gad áhálchinígi áhálchin.
12 Shilah índa báʼdeeshxehii nilíinii dáʼákʼeh bichʼą́ą́h dáʼdeelkaalii nahalin. Tó háálínígíí índa tó haʼniłhoshgi bidáʼdeedléézh nahalin.
13 Nitsʼą́ą́dóó hadaneesánígíí éí tsin pámgrenit bineestʼąʼ ayóó ádanóolninii bił yílʼá. Héna éí spáíknard wolyéhígíí bił yílʼá.
14 Chʼil spáíknard áádóó sáfran índa kálamas daolyéii áádóó tsin sínaman bitátʼahí índa tsin fránkinsens tʼáá ałtso áádóó tsin mir daolyéii índa tsin shih silı̨́įʼii álooz wolyéii éí spáis aláahgo átʼéii łikání dahalchingo dahoníʼáii tʼáá ałtso bił ałtahgo yílʼá.
15 Dáʼákʼehdóó tó háálíinii áádóó tó doo ádįįhii índa Dził Lébanandę́ę́ʼ tó chʼínílínígíí nahonílin.
16 Náhookǫsdę́ę́ʼ níyol nílíinii, chʼéénídzííd; shádiʼááhdę́ę́ʼ shidáʼákʼehdóó łikání dahalchinii spáis wolyéii honíʼáa doo biniyé shidáʼákʼeh bichʼįʼ díyóół. Hániʼdii ayóóʼóóshʼníinii bidáʼákʼehgi yah iigháahgo tsin bineestʼąʼ ayóó ádahalniihii yiyą́ą dooleeł.
Footnotes
^ Pámgrenit wolyéhígíí éí bilasáana nahalingo bikʼǫ́ǫ́ʼ tʼóó ahayóígíí óolyé.
