Song of Solomon 5:1-16
5 Shidáʼákʼehgi níyá, shilah índa báʼdeeshxehii nílíinii, mir éí spáis shee hólóonii bił áłah íishłaa. Shitsésʼná bitłʼizh bitsʼaʼ tʼáá bił yíyą́ą́ʼ; shiwáin áádóó abeʼ yishdlą́ą́ʼ.
Daʼohsą́, shikʼisóó danohłíinii; ídlą́, ayóóʼóóshʼníinii, łą́ągo ahíkaah.
Bitsʼą́ą́ʼ yóóʼííyáii yąąh bíniʼ
2 Ashhosh, nidi shijéí éí tʼáá aniih nítʼééʼ. Ayóóʼóóshʼníinii biinééʼ disétsʼą́ąʼgo dáádílkał néiniłtsʼingo kóní, Shilah, ayóóʼánóshʼníinii, shihasbídí nílíinii, hadaałtʼéii nílíinii, shá ąą ánílééh, háálá dahtooʼ bee shitsiitsʼiin nástłééʼ; dahtooʼ bee shitsiiʼ ałtso nástłééʼ.
3 Shiʼéénééz hadiistsooz; haash yitʼéego biih nídeeshdááł. Shikeeʼ táásígiz; haash yitʼéego tʼóó baaʼih ánáánáshdléeh doo?
4 Ayóóʼóóshʼníinii dáádílkał bee ąą ánálʼįįhgo ahoodzą́ą́ góneʼ adoolniiʼgo bąąh tsíníkéezgo shijéí yidiisnááʼ.
5 Ayóóʼóóshʼníinii bá ąą ádeeshłííł biniyé nídiishʼnaʼ áádóó shílaʼ índa shílázhoozh bąąhdóó łikání halchinii tózhą́ągo dáádílkał bee dáńʼdílkałígíí bąąhjįʼ nahidilchʼą́ą́ł.
6 Ayóóʼóóshʼníinii bá ąą áshłaa, nítʼééʼ ayóóʼóóshʼníinii dah náádiidzáá lá, áko doo naagháhí da. Haadzííʼ yę́ędą́ą́ʼ kʼasdą́ą́ʼ shíniʼ ásdįįd; hanítą́ą́ʼ, nidi tʼáadoo bikʼíníyáa da; bíká ádííniid, nidi tʼáadoo shichʼįʼ haadzíiʼ da.
7 Nidi tłʼééʼ naagháhí kintahgóó hadaʼasíidgo nidaakaígíí shikʼídaaskaigo nídashineesxaalgo atídashiilaa; kin haalʼá binaa ahéédaʼastłʼinígíí yaa ádahalyáanii shibeeldládí ééʼ shighadeistsooz.
8 Jerúsalemdóó chʼikéí danohłíinii, ayóóʼóóshʼníinii bikʼídasoohkaigo, Ayóóʼóʼóʼní bídin shiʼniitsą́, shá dabididoohniił.
Báʼásgehii éí azyehii yaa haniih
9 Asdzání bitahgóó ayóó áníínílninii, haash yitʼéego náánáłaʼ ayóóʼábiʼdóʼníinii biláahgo ayóóʼííníʼníinii nił nilı̨́? Kódaohnééh, nihidiníinii haash yitʼéego náánáłaʼ ayóóʼábiʼdóʼníinii biláahgo ayóóʼííníʼníinii nił nilı̨́?
10 Ayóóʼóóshʼníinii éí tʼóó łigáhí áádóó tʼóó łichxííʼ; neeznáadi mííl yiltʼéego bitahdóó aláahgo átʼé.
11 Bitsiitsʼiin éí óola nídoolyı̨́įʼii nahalin; bitsiiʼ éí yishchʼil áádóó gáagii nahalingo łizhin.
12 Hanááʼ éí abeʼ bee tánásgiz nahalin, áádóó nizhónígo hashtʼeʼniiʼnilgo éí tooh danílı̨́ bibąąhgi hasbídí sikéhígíí nahalin.
13 Biniitsįʼ éí łikání dahalchinii spáis yílʼáii áádóó chʼilátah hózhóón yílʼáii bitsʼą́ą́dóó łikání honíʼá nahalin. Bidaaʼ éí tłʼééʼ iigahí nahalingo bąąhdę́ę́ʼ tsin bijeeh łikání halchinii mir wolyéii nahidilchʼą́ą́ł nahalin.
14 Bílaʼ éí tsihał óola bee ályaii tsé ílíinii béril wolyéii bee naashchʼąąʼ nahalin; bibid gónaa éí chı̨́ı̨́h yee adilohii biwooʼ, áívori wolyéii, éí tsé yá nahalingo dootłʼizhii sáfair wolyéii binídaasʼnil nahalin.
15 Bijáád éí áyah niiʼáhígíí nahalingo tsé dildǫ́ʼii márbel wolyéii bee ályaa áádóó óola tʼáá bízhání bitłʼááh sinilgo tʼááłáhíjí biih hodzánígíí ályaa. Ánoolninígíí éí Dził Lébanan nahalin; gadtsoh agháago yáʼádaatʼéehiigi átʼé.
16 Ayóo łikango yáłtiʼ. Tʼáá aaníí, tʼáá sizı̨́ı̨́ nítʼééʼ ayóó ánóolnin. Jerúsalemdóó chʼikéí danohłíinii, díí ayóóʼóóshʼníinii áádóó shichʼooní átʼé.
