Song of Solomon 6:1-13
6 Asdzání bitahdóó ayóó ánóolninii nílíinii, ayóóʼííníʼníiniishąʼ, háájí ííyá? Ayóóʼííníʼníiniishąʼ, háajigo dah diiyáa niʼ? Áko nił hadadíníitaał.
2 Ayóóʼóóshʼníinii dáʼákʼeh góyaa spáis wolyéii yílʼáhígóó ííyá. Áadi naʼniłkaadgo tłʼééʼ iigahí yinizhgo áłah íílééh.
3 Ayóóʼóóshʼníinii bííʼ nishłı̨́ áádóó bí éí shííʼ nilı̨́; tłʼééʼ iigahí bitahgóó bidibé yá naagháago nidaʼałchozh.
Azyehii éí báʼásgehii yaa haniih
4 Ayóóʼánóshʼníinii, Térzah kin haalʼáhígíí nahalingo ayóó ánííníshóní yeeʼ, Jerúsalem nahalingo nízhóní yeeʼ; siláo yinéełii bidah naʼatʼaʼí dah deíłtsóosgo ałkééʼ deíkáahgo bikʼee ił ahayóí nahonílin.
5 Shitsʼą́ąjigo hanighaał, háálá ninááʼ bee shił yaa nííníłtʼeʼ. Nitsiiʼ éí Dził Gíliyad binániijįʼ tłʼízí shijéʼígíí nahalin.
6 Dibétsaʼii táádaasgizgo índa tʼáá ałtso naakií nidayiishchı̨́įgo tʼáadoo łaʼ hááʼéel daígíigi átʼéego niwooʼ łigai.
7 Nítłʼahdóó tʼáá ałchʼijí éí niniiʼ bichʼą́ą́h naníbaalígíí bineʼdę́ę́ʼ tsin bineestʼąʼ pámgrenit* wolyéhígíí ałnííʼdóó aháágizhígíí nahalin.
8 Aláahgo naatʼáanii beʼasdzą́ą́ danilíinii hastą́diin yiltʼé áádóó beʼasdzą́ą́ yíłʼíní danilíinii tseebídiin yiltʼé índa chʼikéí éí tʼáadoo bee néelą́ʼí da.
9 Shihasbídí hadaałtʼéii tʼáá bí tʼéí tʼáá sahdii ánoolnin; tʼáá bí tʼéí bimá yichʼéʼé nilı̨́; bishchíinii bichʼéʼé hadaałtʼéii nilı̨́; chʼikéí danilíinii dabiiłtsą́ągo bikʼihojidlíii, dabidííniid. Aláahgo naatʼáanii beʼasdzą́ą́ áádóó beʼasdzą́ą́ yíłʼíní danilíinii dabiiłtsą́ągo baa dahaznih.
10 Hayoołkááł nahalingo déezʼı̨́ʼígíí háísh átʼı̨́? Ooljééʼ nahalingo nizhóní, jı̨́honaaʼéí nahalingo bitsʼádiʼnídíín, áádóó siláo yinéełii bidah naʼatʼaʼí dah deíłtsóosgo ałkééʼ deíkáahgo bikʼee ił ahayóí nahalin.
11 Honíteelgi chʼil hadaneesánígíí áádóó chʼil naʼatłʼoʼii daatsʼí bílátahí bąąh dah daneezdeeʼ índa tsin pámgrenit daatsʼí bílátah daʼiigaii dínéeshʼįįł biniyé tsin bąąh neeshchʼííʼ nídahadleehii yílʼáhígóó níyá.
12 Tʼah doo baa ákoniisįįhgóó shidineʼé bitsindaabąąs bijáád naakiígíí bikááʼdóó dah sédáa doo niizı̨́įʼgo ákwii ádiistsą́.
13 Shúlam kin haalʼáádóó chʼikę́ę́h nílíinii, nánídááh, nánídááh! Dandíníilʼįįł biniyé nánídááh, nánídááh! Haʼátʼíí biniyé naakigo dah oonéełii daʼalzhishígíí dazhníłʼínígi átʼéego Shúlam kin haalʼáádóó chʼikę́ę́h danółʼı̨́į doo?
Footnotes
^ Pámgrenit wolyéhígíí éí bilasáana nahalingo bikʼǫ́ǫ́ʼ tʼóó ahayóígíí óolyé.
