Song of Solomon 7:1-13
7 Naatʼáanii bitsiʼ nílíinii, dooládóʼ nikeeʼ nizhóní da, akał bikʼi naaztʼiʼgo kééh síníʼeez da. Nikʼaiʼ nizhónígo naanázhahígíí éí naanish yiyiichįįhii nitłʼiz ałtaasʼéí yinaashnishii nahalin.
2 Nitsʼééʼ éí bee adlání nímazí wáin ałtaa násdziidii doo biiʼ ádįįhii nahalin. Nibid gónaa éí tłʼoh naadą́ą́ʼ yanáaʼáago tłʼééʼ iigahí binadeelʼáhígíí nahalin.
3 Nibeʼ tʼáá áłah éí jádí naakií yizhchíinii nahalin.
4 Nikʼos éí chı̨́ı̨́h yee adilohii biwooʼ, áívori wolyéii, bee kin yaaʼáago ályaii nahalin. Ninááʼ éí Bath-rábimdę́ę́ʼ chʼéʼétiinígíí bíighahgóó Héshbangi tó siyínígíí nahalin. Níchı̨́ı̨́h éí Lébanan kéyah wókʼą́ą́dóó Damáskas bichʼįʼgo kin yaaʼáhígíí nahalin.
5 Nitsiitsʼiin éí Dził Kármel nahalin, áádóó nitsiiʼ éí tsídídééh nahalingo łichííʼ. Bee ayóó ánóolninii aláahgo naatʼáanii bee biʼdisná.
Iiyehii áádóó báʼásgehii ahaa bił hózhǫ́
6 Ayóóʼánóshʼníinii nílíinii, bee shił honíshónígíí éí bee dooládóʼ nízhónígo ayóó áníínílnin da.
7 Tsin sikaadii páam wolyéii nahalingo níneez. Nibeʼ tʼáá áłah chʼil naʼatłʼoʼii bineestʼąʼ bąąh dah siyínígíí nahalin.
8 Tsin sikaadii páam bąąh hadeeshʼnah, dííniid, áádóó naaniigo dadeezʼáhígíí yideestsoł. Nibeʼ éí chʼil naʼatłʼoʼii bąąh nidahaazyínígíigi átʼé índa niyol éí bilasáanagi áhálchin.
9 Nizábąąh éí wáin agháago yáʼátʼéehii nahalin. Éí ayóóʼóóshʼníinii nizhónígo bizahidinaad; daʼiiłháashii yádayiiłtiʼ.
10 Ayóóʼóóshʼníinii bííʼ nishłı̨́ áádóó laanaa shóʼníigo shichʼįʼ nitsíkees.
11 Tįʼ, ayóóʼánóshʼníinii, nahgóó diitʼash, índa kin dah naazhjaaʼgóó nanihíiłkaʼ doo.
12 Tʼah abíínídą́ą́ʼ chʼil naʼatłʼoʼii dahólǫ́ǫ́góó diitʼash. Chʼil naʼatłʼoʼii daatsʼí bílátahí bąąh dah daneezdeeʼ áádóó bílátah daʼdiigaígíí daatsʼí ąą ádzaa, índa tsin pámgrenit daatsʼí bílátah daʼiigai. Ákwii lą́ą bee ayóóʼánííníshʼníinii naa dideeshʼááł.
13 Chʼil mándreik wolyéii łikání halchingo bitsʼáhoníʼá, áádóó nihichʼéédą́ą́ʼgóó tsin bineestʼąʼ ániidíii índa tʼáá daʼałkʼidą́ʼígíí ná hashtʼeʼninínil, ayóóʼánóshʼníinii.
