Song of Solomon 8:1-14
8 Shitsilí éí shimá yiyííłtʼóodii nahonílin laanaa; tłʼóoʼdi nanináago nikʼíníyáago nideestsʼǫs; tʼáá aaníí, doo łaʼda shiʼı̨́į da doo nítʼééʼ.
2 Nił dah dideeshʼashgo shimá nashineeztą́ʼígíí bighan góneʼ nił yah ííʼáazh doo nítʼééʼ. Tsin pámgrenit bineestʼąʼ bitooʼ bee wáin ályaaígíí spáis wolyéii bił ałtahgo naa níką́ągo niyíłdlą́ąʼ doo nítʼééʼ.
3 Nishtłʼají yee shitsʼiiyah déesniiʼ doo nítʼééʼ áádóó nishʼnáájí yee shinázʼniiʼ doo nítʼééʼ.
4 Jerúsalemdóó chʼikéí danohłíinii, ádee hadadidoohdzihígíí baa nánihooshkąąh. Ayóóʼóóshʼníinii tʼáadoo binaagóó nidaʼołchʼízhí índa chʼéédaosííd yíilaʼ; bíniʼ ałhosh.
Aniné ábóodziilígi átʼéego ayóóʼóʼóʼní ayóó ábóodziil
5 Háí lá ayóóʼábóʼníinii yee niłdzilgo honoojíídę́ę́ʼ yił yiʼash?
Bilasáana sikaadii biyaagi nándiiłtʼeʼ. Ákweʼé nimá bídiniʼnaʼgo nishchı̨́.
6 Hakʼi niʼítʼą́ nahalingo nijéí bíshííníłtąʼ índa nigaan bikʼi niʼítʼą́ nahalingo ádíshííníltąʼ, háálá aniné ábóodziilígi átʼéego ayóóʼóʼóʼní ayóó ábóodziil áádóó jishchááʼ doo joobaʼ daígi átʼéego łeʼhasin doo joobaʼ da. Éí kǫʼ adzisihígíigi átʼéego Bóhólníihii bitsʼą́ą́dóó kǫʼ adzisih.
7 Tó tʼóó ahayóí danílíinii nidi, ayóóʼóʼóʼní doo yinółtséés átʼée da. Tó yíląąd nidi, doo bił nidoonah da. Diné łaʼ haghangi hwee hólóonii tʼáá ałtso bee ayóóʼóʼóʼní nijiisniiʼgo tsʼídá tʼóó bee hoʼdidootʼįįł.
8 Nihideezhí yázhí hólǫ́, nidi bibeʼ ádin. Nihídéékidgoshąʼ éí nihideezhí yázhí bá haa dadiiʼnííł?
9 Tsé ahénátłʼin jílı̨́įgo bikááʼdóó béésh łigaii bee yaʼniiltłʼǫ́ǫgo ádadiilnííł, índa dáádílkał jílı̨́įgo dilkʼis tsin neheeshjíiʼgo hakʼi nidadiilzhosh.
10 Tsé ahénátłʼinii nishłı̨́ áádóó shibeʼ éí tsé ahénátłʼinii bikááʼdóó kin yaaʼáhígíí nahalin. Hashtʼehodítʼé bikʼíníyáago baa ákoniizı̨́ı̨́ʼ.
11 Béíyal-héímangi Sálaman bichʼil naʼatłʼoʼii yílʼá áádóó chʼil naʼatłʼoʼii yílʼáhígíí łaʼ yaa ádahalyą́ą dooleełgo yeidiníʼą́. Éí tʼááłáʼí jinítínígo tʼááłáhídi mííl béésh łigaii hakʼeh níjaaʼgo aneestʼąʼ bikʼé bichʼįʼ nidajiilée doo.
12 Shichʼil naʼatłʼoʼii yílʼáago shíhígíí éí shííʼ átʼé. Sálaman nílíinii, tʼááłáhídi mííl éí ni doo, áádóó chʼil naʼatłʼoʼii yaa ádahalyáanii naakidi neeznádiin daabí doo.
13 Dáʼákʼehgi kééhótʼíinii, shí daóltąʼígíí niinééʼ yíká daʼíistsʼą́ą́ʼ. Hániʼdii diistsʼaʼgo áshílééh.
14 Ayóóʼánóshʼníinii, tsı̨́įłgo ánítʼı̨́, áádóó chʼil łikání dahalchinígíí spáis wolyéii dził bił níʼáagi jádí, doodaiiʼ bįįhkąʼ naagháhígíigi ánítʼéego shił yíʼash.
