Titus 2:1-15
2 Nidi ni, naʼnitin tʼáá ákóneʼ átʼéii tsʼídá beełtʼéego bee naʼnítin.
2 Diné wónáás daazlı̨́įʼii kódabidiní, Hazhóʼó nitsídaahkees, tʼáadoo yíní ádahodołdiní, hazhóʼó ádaa ádahołyą́, índa dziilí bee daʼiinohdlą́, ayóóʼádaʼíínóhʼní, índa nízaadgóó hadaʼíínółní.
3 Asdzání wónáás daazlı̨́įʼii ałdóʼ nanítingo kódabidiní, Tʼáá ałtsojįʼ dahodíínóhsin, tʼáadoo tʼáá ádzaagóó aa nidahołneʼí, wáin tʼáadoo bee tsiʼnidaahkaí, índa yáʼádaatʼéehii bee nidaʼnohtin.
4 Asdzání ániid nidajikaii hadahastiin índa hadaʼáłchíní ayóóʼádajóʼní dooleełgi éí asdzání wónáás daazlı̨́įʼii yee nidahonitin doo,
5 áádóó dahonohsą́, dahodíínóhsin, nihighan baa ádahołyą́, yáʼátʼéhígi ádanohtʼéego, índa nihadahastiin bídahwíínółnííh, dahałníi doo. Díí bidaʼjiłʼı̨́įgo Diyin God bizaad doo nichxǫ́ʼógo bá haʼdoodzih da.
6 Tʼáá ákótʼéego ałdóʼ diné ániid nidaakaii, Hazhóʼó ádaa ádahołyą́, dabidiníigo baa nídeinikąąh.
7 Tʼáá ni ałdóʼ tʼáá ałtsojįʼ yáʼátʼéehgo ááníłígíí éí daʼoodlání yikʼehgo dayíkáah dooleełgo bee yitʼíní íʼdíínílzin, tʼáadoo baa niyáʼáhodíltiʼí, nidi tʼáá aaníígóó naʼnítin.
8 Saad tʼáá ákóneʼ átʼéii tʼáadoo bee bikʼíhótʼahígóó bee yáníłtiʼ, áko tʼáá háiida nihikʼijįʼ nilíinii doo nichxǫ́ʼógo nihá hadoodzih da, nidi yaa yádínóozįįł.
9 Naalteʼ danilíinii kódabidiní, Nihinanitʼaʼí bídahwíínółnííh, índa tʼáá ałtsojįʼ bił dahonohshǫ́. Tʼáadoo bichʼįʼ saad dahonołʼíní,
10 índa tʼáadoo bee daʼnohʼįįhí, nidi tʼáá ałtsojįʼ nihadaʼahódlíigo ádaʼdíínółzingo tʼáá ałtsojįʼ ádaahníłígíí bee Diyin God Yisdánihiiníiłii bee naʼnitinii diné bił danilı̨́įgo ádayósin doo.
11 Háálá diné tʼáá ałtso yisdéidiyoonił biniyé Diyin God bibee ajoobaʼ yee nihichʼįʼ yitʼíní íʼdiilyaa.
12 Áko díí yee nanihinitin, díí nihokáaʼgi doo Diyin God kʼehgo iináanii índa tsʼísee kʼehgo adáhonooníinii yóóʼadahidiitʼaah, áádóó hazhóʼó ádaa ádahwiilyą́ągo tsʼídá tʼáá ákogi átʼéego índa Diyin God kʼehgo dahiniiʼnáago ánihósingo
13 baa hózhǫ́ǫgo nayíníidlíii bíká dadíníitʼı̨́ı̨́ʼ, éí nihiDiyin God ayóó átʼéii áádóó Yisdánihiiníiłii Jesus Christ nilíinii bee biʼoh hodidilyéehii yidooltséłígíí bíká dadíníitʼı̨́įʼ doogo yínanihiniłtin.
14 Jó, tʼáá éí nidaʼiyiilzííh tʼáá ałtso biiʼdóó náánihidiyoołnih, índa bąąhági ádaatʼéii nihąąh ádingo ánihidoolííł, áádóó tʼáá bí bidineʼé daniidlı̨́įgo yáʼátʼéehgo ádahooníiłii tʼáá íiyisí bídaniidlı̨́įgo baa nideiikai doo biniyé nihá nináʼádeetʼą́.
15 Díí tʼáá ałtso bee naʼnítin. Tʼáá ałtsojįʼ nóhólníihgo chánah ádanileʼ índa adítehgo bichʼįʼ yáníłtiʼ. Diné tʼáá ałtsojįʼ bił danílı̨́įgo íʼdíínílzin.
