Titus 3:1-15
3 Oodlání danilíinii díí béédabiyíłnííh: naatʼáanii danilínígíí índa bídahólníhígíí bídahojółníih doo, bikʼeh dahojíłʼı̨́į doo, tʼáá ałtsojįʼ yáʼátʼééh óʼooʼníiłii bee hashtʼeʼádazhdólzin doo,
2 áádóó tʼáadoo diné łaʼ nichxǫ́ʼógo baa yádajiłtiʼí doo, tʼáadoo saad ahídajitʼáhí doo, nidi haʼátʼeʼ ádaadin doo, índa tʼáá ałtsojįʼ diné tʼáá ałtso joosánígo bił dajílı̨́į doo.
3 Háálá nihí ałdóʼ łah doo dahoniidzą́ą da nítʼééʼ, doo akʼeh dahoniilʼı̨́į da nítʼééʼ, yóóʼadanihidiʼniitʼááh nítʼééʼ. Adáhonooníinii índa honeeni ałʼąą ádaatʼéii binaalteʼ daniidlı̨́ı̨́ nítʼééʼ. Áká nideiitʼáago índa daʼiilchʼı̨́įdgo, nihikʼedaʼdiniihgo índa akʼedadiniiʼniihgo nihídayéełkaah nítʼééʼ.
4 Nidi Diyin God Yisdánihiiníiłii diné bichʼįʼ yee joobaʼii índa yee ayóóʼóʼóʼníinii yitʼíní silı̨́įʼgo
5 yisdánihíínil. Tʼáá nihí tsʼídá tʼáá ákogi átʼéego ádeiidzaii binahjįʼ éí dooda, nidi tʼáá bí nihaa aʼááh niizı̨́įʼgo yisdánihíínil, náádanihiʼdizhchı̨́įgo táádanihizgiz, índa Níłchʼi Diyinii bee iiná ániidíii nihiih náyoodlá.
6 Éí Jesus Christ Yisdánihiiníiłii bee łą́ągo nihiih yiyííłʼaʼ,
7 áko yee joobaʼii bee tsʼídá tʼáá ákogi ádaniitʼéego nihá haadzíiʼgo iiná doo ninítʼiʼii bíká nihił chohooʼínígíí nihííʼ dooleeł.
8 Ákóhodooʼniidii éí tʼáá aaníí, áádóó Diyin God dayoosdląądii tsʼídá yáʼátʼééh góneʼ ádaaníił doo biniyé díí bee hahásdzíʼígíí bichʼįʼ íłʼáago yéego bee naʼnítin doo nóshʼní. Díidí tʼáá íiyisí diné bá yáʼádaatʼééh áádóó chodaoʼíinii ádaatʼé.
9 Nidi doo áháyą́ą́góó naʼahíyáʼátiʼ, áádóó daʼahílchíihii baa dahaneʼii, áádóó ahiníʼdiiltłáád, índa bee hazʼáanii Mózes baa deetʼáanii biniinaa ałghaʼditʼááh tʼáadoo atah baa nanináhí. Éí doo chodaoʼı̨́į da índa tʼáadoo nídanidlíní da.
10 Diné łaʼ ałtsʼáʼáldahgo ídaʼaleʼii, tʼááłáhídi éí doodaiiʼ naakidida, Tʼáadoo ánítʼíní, nábididííʼniiłgo índa tʼáadoo baa nánítʼíní doo.
11 Háálá nił bééhózingo diné ákótʼéii honítʼiʼii yitsʼáníyáago ádił niʼiisííh índa tʼáá bí bibąąhági átʼéii yee ádá nihootʼą́.
Táítas bee nabidiʼneestą́ąʼii bee naaltsoos niiltʼiʼii
12 Ártemas éí doodaléiʼ Tíkikas nichʼįʼ ííłʼaʼgo, tʼáá haʼátʼéhígoda Nikápolisdi shaa díínááł, háálá ákweʼé shidoohah nisin.
13 Zíínas, bee hazʼáanii yínaʼniłtinii, índa Apálas, tʼáá haʼátʼíhída doo yídin nilı̨́ı̨́góó ádíílíiłgo dah náádidootʼash.
14 Índa bíniʼdii daʼoodlání aadi kéédahatʼínígíí yáʼátʼééh góneʼ ádaaníił dooleełígíí yídahwiidoołʼááł, áko tʼáá íiyisí anídahaztʼiʼgi chodaoʼı̨́į doo, áko doo tʼáadoo biniyéhígóó dahináa da dooleeł.
15 Bił naháshtánígíí tʼáá ałtso kʼé daniłní. Oodląʼ bee ayóóʼádanihóʼníinii nihá kʼé dabijiniih. Tʼáá ánółtso ajoobaʼ nihił hólǫ́ǫ doo. Tʼáá ákótʼée doo.
