Zechariah 1:1-21
1 Daráíyas aláahgo naatʼáanii nilı̨́įgo naaki náhááh góneʼ tseebíí nídízííd binih Ído biyeʼ Berekáíyah, éí biyeʼ Diyin God yá halneʼii nilíinii Zekaráíyah éí Bóhólníihii ábíłní,
2 Bóhólníihii éí danihizhéʼé yę́ę yichʼįʼ tʼáá íiyisí doo bił náhójǫǫh da nítʼééʼ.
3 Éí bąą kóbidiní, Tʼáá ałtsoní bee Bóhólníihii kóní, Shaa náhóhkááh, ní tʼáá ałtsoní bee Bóhólníihii, áko nihaa nídeeshdááł, ní tʼáá ałtsoní bee Bóhólníihii.
4 Tʼáadoo danihizhéʼé yę́ę ádáátʼįįdígi ádanohtʼéhí; éí chʼóóshdą́ą́dą́ą́ʼ dahojilneʼí dajílíinii ádazhdííniid, Tʼáá ałtsoní bee Bóhólníihii kónihiłní, Tʼáá íiyisí doo yáʼáshǫ́ǫ́góó ádanohtʼéii índa doo yáʼáshǫ́ǫ́góó ádaahtʼı̨́įgo deínóhkáahii bitsʼą́ąjįʼ ninádahohkááh, nidi tʼáadoo daʼdiiztsʼą́ąʼ da, doo nidi dashíistsʼą́ąʼ da, ní Bóhólníihii.
5 Danihizhéʼé yę́ęshąʼ, háadi nidaakai? Áádóó dahojilneʼí dajílíinii hoolʼáágóósh dajiiná?
6 Nidi shizaad índa bee nihoyíʼáanii éí shá naalʼaʼí dahojilneʼí dajílíinii hachʼįʼ bee haasdzíiʼii danihizhéʼé yę́ę tsʼídá bikʼidiyaa násdlı̨́ı̨́ʼ. Ákohgo łahgo átʼéego tsíńdadeezkéezgo ádadííniid, Bee ádaniitʼéii áádóó ádeiiʼníłígíí bikʼehgo tʼáá ałtsoní bee Bóhólníihii nihá yee nihodiníʼáanii yee nihainístʼįįd.
Diyin God yá halneʼii éí łı̨́ı̨́ʼ bił ádzaa
7 Daráíyas aláahgo naatʼáanii nilı̨́įgo naaki náhááh góneʼ Sííbat wolyéii łaʼtsʼáadah nídízííd binih naadiin dı̨́ı̨́ʼgóó yoołkáałgo Ído biyeʼ Berekáíyah, éí biyeʼ Diyin God yá halneʼii nilíinii Zekaráíyah kótʼéego Bóhólníihii bizaad baa honíleʼ,
8 Tłʼéeʼgo shił áhoodzaago diné léiʼ łı̨́ı̨́ʼ łichííʼ léiʼ bił yildloshgo yiiłtsą́, jóʼakon. Bokooh góyaa mértal naazkaadígíí bitahgi łı̨́ı̨́ʼ bił sizı̨́. Bikéédę́ę́ʼ łı̨́ı̨́ʼ daalchííʼ áádóó daastłʼinii índa daalgaii naazı̨́.
9 Áko ádííniid, Shibóhólníihii, díishąʼ haʼátʼíí ádaatʼé? Nítʼééʼ diyingo naalʼaʼí áshidííniidgo áshíłní, Díí ádaatʼéhígíí hazhóʼó nił bééhodeesįįł.
10 Jó, mértal naazkaadígíí bitahgi diné éí łı̨́ı̨́ʼ bił sizı̨́įgo ání, Díí éí Bóhólníihii adabiisʼaʼgo nahasdzáán bikááʼgóó háádadiikahgo bá hadaʼídéesʼı̨́ı̨́ʼ yiniyé ádaatʼı̨́.
11 Áko łı̨́ı̨́ʼ dabíyeehii éí Bóhólníihii bidiyingo naalʼaʼí mértal naazkaadígíí yitahgi łı̨́ı̨́ʼ bił sizíinii ádeidííniid, Nahasdzáán bikááʼgóó háádadiikahgo hadaʼísídíilʼı̨́ı̨́ʼ nítʼééʼ, áko nahasdzáán tʼáá náhwiizʼą́ą́ nítʼééʼ hashtʼehodítʼéego háádaalyı̨́ı̨́h, jóʼakon.
12 Ákohgo Bóhólníihii bidiyingo naalʼaʼí ání, Tʼáá ałtsoní bee Bóhólníihii nílíinii, Jerúsalem kin haalʼáagi índa Júdah kéyahgi kin hadaasʼáii bichʼįʼ náháchįʼgo tsostsʼidiin nááhai. Haa nízáagishąʼ doo baa aʼááh niizįįh da doo?
13 Áko Bóhólníihii éí diyingo naalʼaʼí shichʼįʼ yáłtiʼii ajoobaʼ saad índa saad bee haʼahóníinii yee yichʼįʼ haadzííʼ.
14 Ákohgo diyingo naalʼaʼí shichʼįʼ yáłtiʼii áshidííniid, Hadílgháásh, Tʼáá ałtsoní bee Bóhólníihii ání, Jerúsalem índa Záíyan tʼáá íiyisí haa łeʼnisin.
15 Tʼáá áłtsʼíísígo doo shił hózhǫ́ yę́ędą́ą́ʼ bee hachʼįʼ nidahwiiʼnáanii náás kódayiilaago biniinaa ałʼąą dineʼé doo hodítéehee kéédahatʼínígíí tʼáá íiyisí bichʼįʼ doo shił hóózhǫǫd da.
16 Éí bąą Bóhólníihii kóní, Jerúsalem baa aʼáhí nídínéesdzįįł. Tʼáá ałtsoní bee Bóhólníihii ání, Shikin ninádootʼááł áádóó Jerúsalem kin haalʼáii bee ídaʼneelʼąąhí bee bídíʼnóolʼąął.
17 Hanáádílgháashgo ádíní, Tʼáá ałtsoní bee Bóhólníihii kóní, Shikin hadaasʼáii tʼáá ałtsoní bee ádaʼazįįdgo kʼeeʼąą náádeílzhíish doo índa Bóhólníihii éí Záíyan hanááyiʼdiyoołnih áádóó Jerúsalem nínááhodidooʼááł.
Diyin God yá halneʼii éí adeeʼ áádóó daʼatsidii bił ádzaa
18 Ákohgo hazhóʼó dééʼı̨́ı̨́ʼ nítʼééʼ, adeeʼ dı̨́įʼgo yadaaʼáago yiiłtsą́, jóʼakon.
19 Áko diyingo naalʼaʼí shichʼįʼ yáłtiʼígíí ábidííniid, Díishąʼ haʼátʼíí ádaatʼé? Nítʼééʼ áshíłní, Díí adeeʼ dı̨́įʼgoígíí éí Júdah áádóó Ízrel índa Jerúsalem dineʼé tadeinooskaadii ádaatʼı̨́.
20 Ákohgo Bóhólníihii éí daʼatsidii dı̨́įʼgo shił yitʼíní áyiilaa.
21 Áádóó ádíshní, Díísh haʼátʼíí yaa nídiikaigo yikah? Nítʼééʼ áshíłní, Díí adeeʼ danilínígíí éí Júdah dineʼé tadeinooskaadii ádaatʼı̨́, áko diné doo łaʼ dashdíníitʼą́ą da. Nidi ałʼąą dineʼé bidaʼadeeʼ éí Júdah dineʼé tadeidínóołkał biniyé yikʼijįʼ nídahidiibaaʼii yił yééʼ ádahodoolííł áádóó hadeeʼ yóóʼadahidoolkał biniyé díí daʼatsidii haaskai.
