Zechariah 10:1-12
10 Dąąjįʼ anáhálzhishgo Bóhólníihii éí níłtsą́ bídayínóhkeed. Tʼáá áko Bóhólníihii éí kʼos áyiiłʼįįhgo ádahoʼniiłtı̨́ı̨́h; diné bee nidahałtı̨́įhgo tʼááłáʼí nítínígo nídaʼniłtʼı̨́ı̨́h.
2 Háálá edaʼalyaii biyoochʼíidgo yádaałtiʼ áádóó nidaʼídíłkidii woochʼííd kʼehgo bił ádahatʼı̨́ índa tʼáá áhoodzaagóó nidayiiyeełgo dahalneʼ. Áko tʼáadoo biniyéhígóó yee ákʼi dahaltaʼ. Éí bąą dibé doo idadiziniigi átʼéego tʼóó yóóʼadahakááh; dibé yaa áhályáanii ádingo bąą bichʼįʼ nidahwiiʼná.
3 Doo yáʼátʼééhgóó naʼniłkaadii danilínígíí tʼáá íiyisí bichʼįʼ sháhóóchįįd índa tłʼízíchǫǫh atídeeshłííł; jó, tʼáá ałtsoní bee Bóhólníihii bidibé dah danéelkaadii éí Júdah dineʼé átʼéego yaa naneeztą́ą́ʼ áádóó bilı̨́ı̨́ʼ bee naʼabaahígi átʼéego adiih ádaatʼı̨́įgo áyiilaa.
4 Bitsʼą́ą́dóó tsé bee naanáʼástłʼinii hodooleeł; bitsʼą́ą́dóó níbaal bá adaaskaalii hodooleeł; bitsʼą́ą́dóó ałtı̨́ı̨́ʼ bee naʼabaahii hodooleeł; bitsʼą́ą́dóó nidanitʼáii tʼáá ałtso tʼáá łahjįʼ chʼíhidookah.
5 Diné ayóó átʼéii nidahalingo kintah daʼnítiingóó bidaʼanaʼí danilíinii hashtłʼish biyiʼgóó anadeiłʼı̨́įgo yikʼi nidookah, áko Bóhólníihii bił hólónígíí bąą anadadootʼįįł áádóó bidaʼanaʼí łı̨́ı̨́ʼ bił nidaaldlooshii tʼóó ádaa yádadínóodzįįł.
6 Júdah dineʼé danilíinii bidziilgo ádeeshłííł, índa Jóseph dineʼé danilíinii yisdádeeshnił. Baa aʼááh nisingo biniinaa tʼą́ą́ʼ nináhideeshʼish áádóó tsʼídá tʼáadoo yóóʼadííʼą́ą da nahalin doo, háálá shí éí biBóhólníihii Diyin God nishłı̨́, áko bisodizin bá biʼíínísin dooleeł.
7 Íífreiyim dineʼé éí diné ayóó átʼéii nidahalin dooleeł, áko wáin bee ił hózhónígi átʼéego bijéí bił dahózhǫ́ǫ doo; badaʼáłchíní ałdóʼ éí dayiiłtsą́ągo tʼáá íiyisí yaa bił dahózhǫ́ǫ doo; bijéí tłʼááhdę́ę́ʼ Bóhólníihii yee bił nidahoozhǫǫh doo.
8 Bíká ídideesołgo áłah áńdeeshdlííł, háálá tʼáá shí bikʼé nináʼníshdláago shííʼ násdlı̨́ı̨́ʼ. Kʼeeʼąą deeshzhiizhígi átʼéego tʼáá íiyisí kʼeeʼąą nootʼı̨́įł dooleeł.
9 Ałʼąą dineʼé bitahgóó kʼihodideeshłééł índa kéyah nízaadi tʼahdii shéédaalniihgo haʼáłchíní bił dajiináago nináhizhdookah.
10 Ííjip kéyahdę́ę́ʼ nináhodiyeeshʼish, áádóó Asíriya kéyahdę́ę́ʼ áłah ánáhodeeshdlííł. Áko kéyah Gíliyad áádóó Lébananjįʼ náhodeeshʼish índa kéyah doo hohóoghah da hodooleeł.
11 Tónteel achʼįʼ nahwiiłnáanii yiiʼdę́ę́ʼ tó deílkʼoołii hashtʼeididoołtʼeeł, áádóó Náil tooh daditánígóó ałtso néidoołtsih. Áko Asíriya yee ádeidzódlíii aʼohgo átʼéego ádoolnííł, áádóó Ííjip dineʼé binaatʼá gish bighadootı̨́ı̨́ł.
12 Bóhólníihii bee shidineʼé dabidziilgo ádeeshłííł, áádóó shízhiʼ binahjįʼ shibee adziilii yee deíkáah dooleeł, ní Bóhólníihii.
