Zechariah 11:1-17
11 Lébanan nílíinii, nigadtsoh deílʼáhígíí* dadidoodlił biniyé nidáádílkał ąą ádanileʼ.
2 Chʼó sikaadii nílíinii, nichxa, háálá gadtsoh naazkaadii naaʼadahineezkaad, háálá tsin ayóó ánóolningo naazkaadii dááchxǫʼ. Béíshandóó chéchʼiltsoh danohłíinii, cha nidahohłeʼ, háálá tsin bee hodíłchʼilii ałtso heesneʼ.
3 Nidaʼniłkaadii éí cha nidahałeʼgo hodiistsʼą́ą́ʼ, háálá yee ayóó ádaatʼéii bił ahóóyá. Náshdóí yáázh bitsiijįʼ daditłʼooígíí biyiʼ nidahodiʼniʼgo hodiistsʼą́ą́ʼ, háálá Jórdan tooh yee ádaa haʼniih yę́ę tʼáadoo biniyéhí da silı̨́ı̨́ʼ.
Naʼniłkaadii doo ílíinii
4 Bóhólníihii shiDiyin God kóní, Dibé nidadootsiłii dah noołkałígíí baʼołtsoʼ.
5 Dibé nidayiiłniihgo tʼóó nideiłtseed, áko doo ádáátʼįįdí da nidahalin, áádóó baa nidaʼiiniihii ádaaní, Bóhólníihii baa hwiiʼniih, háálá bee asistʼįįd. Jó, tʼáá hó há nidaʼniłkaadígíí doo hakʼédí danilı̨́į da.
6 Jó, díí kéyahgi kéédahojitʼíinii doo hakʼédí náádínéesdzįįł da, ní Bóhólníihii. Nidi diné tʼáá ałtso bił kééhojitʼíinii índa aláahgo binanitʼaʼí bílákʼee hodííʼą́ą doo, jóʼakon. Áko kéyah atídeidoolííł, áádóó éí bitsʼą́ą́dóó doo yisdáhóshnííł átʼée da doo.
7 Dibé nidadootsiłii éí hojoobaʼ ádaatʼéii baʼastsoʼ, áko tsihał naakigo dibé bá shóisíłtʼeʼ. Łaʼ éí Ił Hóshóonii bee yíníshí, náánáłaʼ éí Łáʼí Ídlı̨́ bee yíníshí. Áko dibé baʼníłtsood.
8 Łaʼ nídízííd binih nidaʼniłkaadii táltʼéego ásíłdįįd, háálá éí bá deeshnih nítʼééʼ áádóó éí ałdóʼ doo dashíłdin da nítʼééʼ.
9 Ákohgo ábidííniid, Doo nihaa ánááháshyą́ą da doo. Dadootsaałii éí bíniʼdii daatsaah; ádooldįįłii éí bíniʼdii ábiʼdildįįh índa daadziihígíí bíniʼdii tʼáá bí nídaʼahildeeł.
10 Áko bee ahaʼdeetʼáanii éí dadineʼé tʼáá ałtso bá íishłaa nítʼéeʼii kʼídeeshtih biniyé shitsihał Ił Hóshóonii bee yíníshí yę́ę kʼínítiʼ.
11 Éí bijı̨́ı̨́ góneʼ kʼínítiʼ, áko dibé hojoobaʼ ádaatʼéii dashiníłʼı̨́įgo Bóhólníihii bizaad átʼéego bił béédahoozin.
12 Ákohgo ábidishní, Yáʼátʼéehgo nitsídaahkeesgo shichʼįʼ nidaʼnohłéego shichʼįʼ nidaʼnohłé, nidi, Dooda, danohsingo nílááh nidaohjaah. Áko béésh łigaii tádiin dah deidiiloʼgo shichʼįʼ naalyá.
13 Ákohgo Bóhólníihii áshidííniid, Łeetsʼaaʼ ííłʼíní bichʼįʼ aniłkaad; éí doozhǫǫgo ílı̨́įgo shą́ą́h azlı̨́įʼii átʼé. Ákohgo béésh łigaii tádiingo nídiinilígíí Bóhólníihii bikin biiʼ sohodizin góneʼ łeetsʼaaʼ ííłʼíní bichʼįʼ ííłkaad.
14 Ákohgo Júdah dineʼé índa Ízrel dineʼé yee ałkʼis nidlíinii bitsʼą́ą́ʼ kʼídeeshtih biniyé náánáłaʼ shitsihał bee Łáʼí Ídlı̨́ bee yíníshí yę́ę kʼínáánítiʼ.
15 Ákohgo Bóhólníihii ánááshidooʼniid, Naʼniłkaadii doo áhályáanii bibee naʼanishí nídiinííł.
16 Háálá kéyahgóó naʼniłkaadii léiʼ nábidideeshłááł, jóʼakon; éí tiʼdahooníhígíí doo yaa nantáa da doo, ayázhí doo haintáa da doo, doodaiiʼ bitah dahwiistǫʼii doo nááyidiiłáah da doo, doodaiiʼ tʼóó naazínígíí nidi, doo yaʼółtsóód átʼée da doo, ákondi daneeskʼahii tʼóó yildeeł doo índa bikéshgaan yikʼi yiizǫ́ǫsgo niyiitíih doo.
17 Naʼniłkaadii doo ajílíinii dibé tʼóó bizhʼníłniiʼii doo hojoobaʼ ájíníi da! Diyin God bidiltłish yee hagaan kʼíidookał índa hanááʼ nishʼnáájí hayíʼdooshish; hagaan ałtso doogą́ą́ł índa hanááʼ nishʼnáájí tʼáá íiyisí bił chahodoołhił.
Footnotes
^ Kweʼé tsin baa haneʼgo éí dineʼé ayóó átʼéii, doodaiiʼ bindanitʼaʼí ááhyiłní.