Zechariah 12:1-14
12 Ízrel dineʼé bide áhodooníłígíí Bóhólníihii yee haadzííʼ. Bóhólníihii éí yótʼááh hiníláii dah yisbaalii áádóó nahasdzáán bee niłdzilii áyiilaii índa diné níłchʼi yee hináa doo biniyé yee yiih yíyolii éí Bóhólníihii ání,
2 Jerúsalem kin haalʼáii éí tsiʼnaʼiiłáii bee adlání bee sikánígíí nahalingo binaagóó diné tʼáá ałtso bichʼįʼ ádeeshłííł, jóʼakon. Jerúsalem yináshzhiizhgo Júdah dineʼé ałdóʼ yináshzhiizh doo.
3 Éí bijı̨́įdi diné tʼáá ałtso bá Jerúsalem tsé nidaazii nahalingo áhodeeshłíiłgo éí dah dahodiiʼaahii tʼáá ałtso yikʼee adadidoonih, áádóó nahasdzáán nidahoneesʼą́ą́dę́ę́ʼ ałʼąą dineʼé tʼáá ałtso hakʼijįʼ danilı̨́įgo áłah dooleeł.
4 Bóhólníihii ání, Éí bijı̨́įdi łı̨́ı̨́ʼ bee nidaʼabaahii tʼáá ałtso biyadahodideesxis índa łı̨́ı̨́ʼ yee deíbáhígíí tsiʼhabidiyeeshkah, áko ałʼąą dineʼé bilı̨́ı̨́ʼ yee naabaahii binááʼ ádadeeshdįįł, índa Júdah bił hazʼą́ągi tʼéiyá diné bikʼi dííníshʼı̨́įʼ doo.
5 Áko Júdah dineʼé bindanitʼaʼí tʼáá biyiʼídi ádadidooniił, Jerúsalemgi kéédahatʼíinii bee tʼáá ałtsoní bee Bóhólníihii Diyin God nilíinii binahjįʼ shidziil dooleeł.
6 Éí bijı̨́įdi Júdah dineʼé bindanitʼaʼí éí chizh bitahgi tsííd bee naakáhí bee kǫʼ niiką́ nahalingo áádóó tłʼoh naadą́ą́ʼ ałchʼįʼ bidaʼastłʼǫ́ǫgo bitahgi honooyééł niiltʼą́ nahalingo ádeeshłííł. Nishʼnáájí áádóó nishtłʼají diné kéédahojitʼíinii tʼáá ádzíłtso ałtso ahodidoołkʼą́ą́ł, áádóó tʼáá hazhóʼó Jerúsalemgi kéédahatʼínígíí tʼéiyá tʼáá ákǫ́ǫ́ kéédahatʼı̨́į dooleeł.
7 Áko David baʼáłchíní bee baa haʼniihii índa Jerúsalemgi kéédahatʼíinii yee ayóó ádaatʼéii éí doo Júdah dineʼé biláahgo ayóó ádajítʼée da dooleeł biniyé Júdah dineʼé átsé dabiníbaal tʼáá bił Bóhólníihii yisdábidoonił.
8 Éí bijı̨́įdi Jerúsalemgi kéédahatʼínígíí Bóhólníihii bichʼą́ą́h nahaleʼgo bitahgóó doo dabidziilígíí Davidgi átʼéego adziil bee dahodooleeł áádóó David baʼáłchíní ahoolchíiłii éí Diyin Godgi ádaatʼée doo, doodaiiʼ hanááł Bóhólníihii bidiyingo naalʼaʼí nidahalin doo.
9 Áko éí bijı̨́įdi ałʼąą dineʼé Jerúsalem bikʼijįʼ dajílı̨́įgo nidajiikáhígíí tʼáá ádzíłtso ałtso ádahodeeshdįįłgo bee hosíłʼą́ą doo.
10 Áko David baʼáłchíní ahoolchíiłii índa Jerúsalemgi kéédahatʼíinii níłchʼi joobaʼii áádóó náʼookąąhii baa dideeshʼááł, ákohgo shaa adashiizhii dashidínóołʼįįłgo tʼáá hazhóʼó tʼááłáʼí ayeʼ nilíinii baa atínáhodindleehígi átʼéego yaa yínííł danilı̨́į doo, áádóó alą́ąjįʼ yizhchíinii daaztsą́ągo baa atínáhodindleehgo bizhéʼé yéego baa yichaígi átʼéego yéego yaa daacha doo.
11 Éí bijı̨́įdi hontsʼaaʼ Megídodi Héídad-rímangi yínííł danilı̨́įgo atínídadindleeh yę́ęgi átʼéego Jerúsalemgi ayóó átʼéego diné yínííł danilı̨́įgo atínídadindleeh doo.
12 Áko kéyahgóó atínáhodindleeh doo. Tʼááłáʼí dahooghanígíí tʼáá daʼníłʼąą atínídadindleeh doo: David bidineʼé danilíinii tʼáá sahdii, bidaʼasdzą́ą́ danilíinii tʼáá sahdii, Néíthan* bidineʼé danilíinii tʼáá sahdii, bidaʼasdzą́ą́ danilíinii tʼáá sahdii atínídadindleeh doo.
13 Líívai bidineʼé danilíinii tʼáá sahdii, bidaʼasdzą́ą́ tʼáá sahdii, Shímiyai* bidineʼé danilíinii tʼáá sahdii, bidaʼasdzą́ą́ tʼáá sahdii atínídadindleeh doo.
14 Áko ałkʼéí danilíinii daadziihígíí tʼáá ałtso tʼááłáʼí nítínígo baʼáłchíní bídaóltąʼgo tʼáá sahdii, bidaʼasdzą́ą́ tʼáá sahdii yínííł danilı̨́įgo atínídadindleeh doo.
Footnotes
^ Aláahgo naatʼáanii David yę́ę biyeʼ. 2Sam. 5:14.
^ Líívai biyeʼ Gérshan éí biyeʼ Shímiyai wolyé. Num. 3:17-20.