Zechariah 13:1-9
13 Éí bijı̨́įdi David baʼáłchíní ahoolchíiłii índa Jerúsalem kin haalʼáagi kéédahatʼíinii bá tó háálı̨́įgo ádoolnííł; éí ádił niʼiidzííh índa tʼóó badaaʼihii bee biʼdidéeh doo biniyé háálı̨́į doo.
2 Áko tʼáá ałtsoní bee Bóhólníihii ání, Éí bijı̨́įdi díí baa hodoolzhish: díí kéyahdóó eʼelyaii bichʼįʼ nidahadláii dabízhiʼ nahjįʼ nidideeshʼáałgo tʼóó baa hodiyooʼnah áádóó ałdóʼ tʼáá ádzaagóó dahalneʼii índa níłchʼi danchǫ́ʼí díí kéyahdóó nahjįʼ hadínéeshkał.
3 Díí baa hodoolzhish: łaʼda tʼáá ádzaagóó halneʼgo tʼáá hó hazhéʼé índa hamá hashchíinii áhodidooniił, Doo hinínáa da doo, háálá Bóhólníihii bízhiʼ bee niyoochʼíidgo yáníłtiʼ, áko hojoolneʼígíí bąą hazhéʼé índa hamá hagháʼdooshish.
4 Díí ałdóʼ baa hodoolzhish: éí bijı̨́įdi tʼáá ádzaagóó dahalneʼii tʼááłáʼí nítínígo bił ádaadzaago yaa dahoolneʼii tʼóó yaa yádadínóozįįł índa bindaʼadloʼ doo biniyé beeldládí ééʼ daditsʼozii akʼínídeiltihgo doo ádeiłʼı̨́į da doo.
5 Nidi ádidooniił, Diyin God yá halneʼii doo nishłı̨́į da; kʼééʼdídléehii nishłı̨́. Tʼáá biyázhí nishłı̨́ı̨́dę́ę́ʼ naalteʼ nishłı̨́.
6 Áko łaʼda yínahódídóołkiłgo áhodidooniił, Haʼátʼíishąʼ ninághahdę́ę́ʼ bee tídááná?* Áko ádidooniił, Shikʼisóó bighangi níyáago atídashiilaa.
Bóhólníihii binaʼniłkaadii nidootsił
7 Diltłish nílíinii, tʼáadoo íłhoshí, nídiidáahgo shinaʼniłkaadii bikʼijįʼ nílı̨́į leʼ. Diné shíighah sizíinii bikʼijįʼ nílı̨́į leʼ, ní tʼáá ałtsoní bee Bóhólníihii. Dibé daʼníłtsʼą́ą́góó taidoojah biniyé naʼniłkaadii bił nizdííłhał. Áádóó dibé yázhí danilínígíí bikʼijįʼ nishłı̨́į doo.
8 Díí baa hodoolzhish: Bóhólníihii ání, Kéyah tʼáá átʼéé nítʼééʼ táaʼgo dibé shijéʼígíí naakigo shijééʼ éí atídoolníiłgo dadínóonééł, nidi tʼááłáhígo shijééʼ ánászįįdii éí tʼáá ákǫ́ǫ doo.
9 Áko tááʼ góneʼ shijéʼígíí ánászįįdii kǫʼ biyiʼ chʼídeeshʼishgo béésh łigaii nídoolyı̨́ʼígi átʼéego índa óola kǫʼ bee bóhoneestą́ʼígi átʼéego ádahodeeshłííł. Áko shízhiʼ yee shídaʼdókeedgo bichʼįʼ ééhodeesįįłgo ábidideeshniił. Díí shidineʼé danilı̨́ı̨́ lá. Áádóó ádashididooniił, Hó éí Bóhólníihii shiDiyin God jílı̨́.
Footnotes
^ Diyin dabidiʼníinii yá dahalneʼii nidaʼídiilgéésh nítʼééʼ. 1Kgs. 18:25-28.
