Zechariah 2:1-13
2 Áko dééʼı̨́ı̨́ʼ nítʼééʼ, diné léiʼ bee ídaʼneelʼąąhí dah yooléełgo yiiłtsą́, jóʼakon.
2 Ákohgo ádíshní, Háágóoshąʼ díníyá? Nítʼééʼ áshíłní, Jerúsalem bídíʼnéeshʼąąłgo naaniigo áádóó náásee áníłtsoígíí shił bééhodoozįįł.
3 Áádóó shoo, diyingo naalʼaʼí shichʼįʼ yáłtiʼii náásee dah diiyáago diyingo naalʼaʼí náánáłaʼ neeʼnijįʼ bidááh níyá.
4 Áko áyidííniid, Eii dinééh bichʼįʼ nídiilyeedgo ábidiní, Jerúsalemgi diné áádóó alı̨́ı̨́ʼ tʼóó ahayóigo biniinaa Jerúsalem kin haalʼá doo binaa ahéédaʼastłʼingóó kéédahojitʼı̨́į doo.
5 Háálá Bóhólníihii ání, Kǫʼ honídoonałiigi átʼéego haa áháshyą́ą doo áádóó tʼáá shí bee ayóó áníshtʼéii bee haníiʼgi honishłǫ́ǫ dooleeł.
Yisnááh danilíinii nináhóhkááh, bidooʼniid
6 Shoo, shoo, náhookǫsjí kéyahígíí bitsʼą́ąjįʼ yóóʼohjeeh, ní Bóhólníihii. Jó, tʼáá dı̨́ı̨́ʼdę́ę́ʼ hanáyołígi átʼéego tanihinííłkaad, ní Bóhólníihii.
7 Shoo, Záíyan nílíinii, Bábilan bichʼéʼé bił kééhótʼíinii bitsʼąą yisdánínááh.
8 Tʼáá ałtsoní bee Bóhólníihii kóní, Shaa haniih doo biniyé ałʼąą dineʼé nihighadaʼiisʼnilii yikʼijįʼ shííłʼaad; jó, tʼáá háiida nideelchidígíí éí binázhiin bizhdeelchid nahalin.
9 Hakʼijįʼ shílaʼ yishháad dooleeł áádóó há nidaalʼaʼ nítʼéeʼii biyisnááh dazhdooleeł, jóʼakon. Áko tʼáá ałtsoní bee Bóhólníihii shiníłʼaʼgo nihił béédahodoozįįł.
10 Záíyan bichʼéʼé danohłíinii, nihił nidahoozhǫǫhgo dahohtaał, háálá nihichʼįʼ yishááł, jóʼakon, áádóó nihitahgóó kééhashtʼı̨́į doo, ní Bóhólníihii.
11 Áko éí bijı̨́įdi ałʼąą dineʼé tʼóó ahayóí Bóhólníihii yidahididookah áádóó shidineʼé danilı̨́ dadooleeł. Áko nihitahgóó kééhashtʼı̨́į doo áádóó tʼáá ałtsoní bee Bóhólníihii nihaa shiníłʼaʼgo nihił béédahodoozįįł.
12 Áádóó kéyah diyingi Bóhólníihii éí Júdah dineʼé bííʼ dooleeł, áádóó Jerúsalem nínéididooʼááł.
13 Nihokááʼ dineʼé danohłíinii tʼáá ánółtso, Bóhólníihii bidááhdóó dadíínółyéél, háálá hodiyingo kééhatʼı̨́ı̨́dę́ę́ʼ hideesnááʼ.
