Zechariah 3:1-10
3 Ákohgo alą́ąjįʼ nááʼiiłniihii Jéshuwa éí Bóhólníihii bidiyingo naalʼaʼí bidááhdóó dzizı̨́įgo áádóó níłchʼi bidaʼiiníziinii binanitʼaʼí Séítan éí Jéshuwa yikʼi hodiiʼaah doo biniyé honishʼnáájí sizı̨́įgo shił ádzaa.
2 Áko Bóhólníihii éí Séítan ííłní, Séítan nílíinii, Bóhólníihii nideezteh. Bóhólníihii éí Jerúsalem kin haalʼáii niidiníʼáanii nideezteh. Dííyeeʼ kǫʼ biiʼdę́ę́ʼ hahoolghanii átʼı̨́!
3 Bóhólníihii bidiyingo naalʼaʼí bidááhdóó Jéshuwa biʼééʼ chinii yiiʼ sitı̨́įgo sizı̨́.
4 Áko diyingo naalʼaʼí éí łaʼ ákǫ́ǫ́ bidááhdę́ę́ʼ naazínígíí áyidííniid, Ééʼ chinii baa doołtsóosgo nahjįʼ kódaohłééh. Áko ánááhodiʼní, Doo ákwii éʼétʼéii yę́ę ná yóóʼadishʼaahgo ééʼ ílínígíí bee handideeshłííł, jóʼakon.
5 Áko ádíshní, Bíniʼdii chʼah dijoolí chin bąąh ádinii bikʼi dohʼaah. Ákohgo Bóhólníihii bidiyingo naalʼaʼí tʼáá biná sézı̨́įgo chʼah dijoolí chin bąąh ádinii łaʼ bikʼi deideezʼą́ áádóó ééh deistı̨́.
6 Áádóó Bóhólníihii bidiyingo naalʼaʼí éí Jéshuwa neintingo áyidííniid,
7 Tʼáá ałtsoní bee Bóhólníihii kóní, Ádíshníinii bikʼehgo yínáałgo índa shá nanilʼaʼgo honíyą́ągo yínááł ládą́ą́ʼ, ákohgo shikin índa bee shíhólníihii ałdóʼ tʼáá átʼé binanítʼáa doo, índa ákǫ́ǫ́ naazínígíí bitahgi ałnáánídáahgo naa dideeshʼááł.
8 Jéshuwa alą́ąjįʼ nááʼiiłniihii nílíinii, ni áádóó nikʼis danilíinii nidááhgóó naháaztánígíí kʼad dashidoohtsʼı̨́ı̨́h; jó, yáʼátʼéehgo diné bee éédahózinii ádaatʼı̨́. Shá naalʼaʼí Atsʼáozʼaʼ nilíinii bił deeshʼash, jóʼakon.
9 Jó, Jéshuwa binááł díí tsé niníʼánígíí níníłʼı̨́; díí tsé niníʼánígíí binááʼ tsostsʼid; tsé bikʼi naʼashkʼaazhgo bikʼeʼashchı̨́įgo ádeeshłííł, jóʼakon, ní tʼáá ałtsoní bee Bóhólníihii, áádóó díí kéyah hazʼánígi doo ákwii éʼétʼéii tʼáá łaʼa jı̨́ ałtso nahjįʼ kódeeshłííł.
10 Tʼáá ałtsoní bee Bóhólníihii ání, Éí bijı̨́įdi chʼil naʼatłʼoʼii áádóó fig naazkaadii biyaagi tʼááłáʼí nootínígo bił kéédahohtʼíinii hágo dabididoohniiłgo bił nahísóotą́ą doo.
