Zechariah 4:1-14
4 Áko diyingo naalʼaʼí shichʼįʼ yáłtiʼii shaa náánádzáago diné ałhoshdę́ę́ʼ nídiiltʼeʼígi átʼéego náshidiiłtʼeʼ
2 áádóó, Haʼátʼíísh yíníʼı̨́? shidííniid. Áko ádíshní, Dééʼı̨́ı̨́ʼ nítʼééʼ, jóʼakon, áko bee hoolʼiní bá yadaaʼáhígíí áádóó bílátahgi dah azkánígíí áádóó éí bikááʼdóó bee dahoolʼiní tsostsʼidgo dah naaznil índa tʼááłáʼí níʼánígo óola níyizgo biih dahasdzą́ągo bidadiiʼáago yiiłtsą́.
3 Áádóó bílátahgi dah azkánígíí binahjįʼ tʼáá ałchʼijí áliv sikaadii naakigo ałdóʼ ííʼá.
4 Ákohgo diyingo naalʼaʼí shichʼįʼ yáłtiʼii ábidishní, Shibóhólníihii, díishąʼ haʼátʼíí ádaatʼé?
5 Áko diyingo naalʼaʼí shichʼįʼ yáłtiʼii áshíłní, Daʼ díí ádaatʼéhígíísh doo nił bééhózin da? Áko ábidishní, Dooda, shibóhólníihii.
6 Nítʼééʼ áshidííniid, Díí Bóhólníihii bizaad éí Zerábabel bee bichʼįʼ haʼoodzíiʼii átʼé. Atsxeʼ bee dooda, adziil bee dooda, nidi shiNíłchʼi Diyinii bee, ní tʼáá ałtsoní bee Bóhólníihii.
7 Dził ayóó ánítʼéii nílíinii, háísh ánítʼı̨́? Zerábabel bidáahjįʼ kʼíhoneezlá dííleeł áádóó tsé á siʼánígíí chʼííʼaahgo, Ajoobaʼ bee bikʼihojidlíi leʼ, dajiníigo chánahgo dazhdilwosh doo.
8 Bóhólníihii kónááshidooʼniidgo ání,
9 Zerábabel tʼáá bí díí kin biiʼ sohodizin bitłʼááh nástłʼiní áyiilaa áádóó éí ałdóʼ tʼáá bí tsʼídá ałtso íidoolííł. Ákohgo éí tʼáá ałtsoní bee Bóhólníihii naa shiníłʼaʼgo nił bééhodoozįįł.
10 Háishąʼ tʼáá áłtsʼíísígo ádahóótʼįįdígíí dayííʼįįd? Áko díí bił dahózhǫ́ǫ doo, áádóó tłʼóół bikʼehgo kʼéhézdon haʼiitłʼinii Zerábabel dah yooléełgo deizdoołtsééł. Díí tsostsʼidígíí éí Bóhólníihii binááʼ ádaatʼéego nahasdzáán tʼáá siʼą́ą́ nítʼééʼ yikááʼgóó háádadiigał.
11 Ákohgo ábidishní, Díí áliv naakigo sikaadii éí bee hoolʼiní bá yadaaʼáago binahjįʼ ałchʼijí ííʼáhígíishąʼ haʼátʼíí átʼé?
12 Áádóó hanáánáásdzíiʼgo ábidííniid, Díí áliv bitsʼáozʼaʼ naakiígíí bitsʼą́ą́dóó akʼah biiʼ nílíní óola bee ályaii biyiʼdę́ę́ʼ akʼah yahiidzíidii haʼátʼíísh átʼé?
13 Nítʼééʼ áshíłní, Daʼ díí kódaatʼéégóósh doo nił bééhózin da? Áko ádíshní, Dooda, shibóhólníihii.
14 Ákohgo áshidííniid, Díí nizhdiltʼéego akʼah bee alzı̨́įhii bee atsʼáhoʼdeeʼnilgo nahasdzáán tʼáá siʼą́ą́ nítʼééʼ bee Bóhólníihii bíighahdóó dzizíinii ájítʼı̨́.
