Zechariah 6:1-15
6 Áko náás náádééshtʼı̨́ı̨́ nítʼééʼ, tsindaabąąs bijáád naakiígíí dı̨́įʼgo dził bitaʼdę́ę́ʼ chʼídaheezbą́ązgo yiiłtsą́, jóʼakon; éí dził sinilígíí béésh łitsoii dził átʼé.
2 Álą́ąjįʼ tsinaabąąs bijáád naakiígíí łı̨́ı̨́ʼ łichíiʼii bighą́ą́h dínil; nááʼákóneʼ éí łı̨́ı̨́shzhiin bighą́ą́h dínil;
3 tááʼ góneʼ éí łı̨́ı̨́łgaii bighą́ą́h dínil, índa dı̨́ı̨́ʼ góneʼ éí łı̨́ı̨́stłʼinii bidziilii bighą́ą́h dínil.
4 Áko diyingo naalʼaʼí shichʼįʼ yáłtiʼii ábidishní, Shibóhólníihii, díishąʼ haʼátʼíí ádaatʼı̨́?
5 Nítʼééʼ diyingo naalʼaʼí áshidííniid, Díí yáʼąąshdę́ę́ʼ níłchʼi dı̨́ı̨́ʼ ałʼąą átʼéego Bóhólníihii yidááhdóó naazı̨́ı̨́ nítʼéeʼii niʼ nidahoneesʼą́ą́góó dadeeskaígíí ádaatʼı̨́.
6 Łı̨́ı̨́shzhiin éí náhookǫsjigo kéyahgóó bee adeezbą́ą́z; náábíkééʼ góneʼ łı̨́ı̨́łgaii eʼeʼaahjigo bee adeezbą́ą́z; łı̨́ı̨́stłʼinii éí shádiʼáahjigo bee adeezbą́ą́z.
7 Łı̨́ı̨́ʼ bidziilígíí éí nahasdzáán nidahoneesʼą́ą́góó haʼídéesʼı̨́ı̨́ʼ biniyé dah ahiniilchééh. Áko Bóhólníihii ání, Nihílááh, nahasdzáán hazhóʼó haahsííd. Ákohgo nahasdzáán haisííd biniyé bee adeezbą́ą́z.
8 Ákohgo shichʼįʼ hadoolghaazhgo áshidííniid, Náhookǫsjigo bee adeezbą́zígíí éí bee shiníłchʼi hashtʼedíítʼeʼ, jóʼakon.
Naatʼá chʼah éí Jéshuwa bikʼi díʼaah, hodooʼniid
9 Áádóó Bóhólníihii kóshidííniid,
10 Héldeiyai áádóó Tobáíjah índa Jedáíyah éí yisnááh danilı̨́ı̨́ nítʼéeʼgo Bábilan kéyahdę́ę́ʼ nidahaaskai yę́ę nidayiizhjaaʼígíí nídidíínił; tʼáá éí bijı̨́ Zefanáíyah biyeʼ Josáíyah bighan góneʼ yah adíínááł.
11 Áko béésh łigaii áádóó óola łaʼ nídiiníiłgo naatʼá chʼah ádíílíiłgo éí Jásedek aláahgo nááʼiiłniihii biyeʼ Jéshuwa bikʼi didííʼááł.
12 Áádóó ábididííniił, Tʼáá ałtsoní bee Bóhólníihii kóní, Diné Atsʼáozʼaʼ wolyéii tʼáá bí bił hazʼą́ą́dóó dínóoyééł, áádóó Bóhólníihii bikin biiʼ sohodizin íidoolííł, jóʼakon.
13 Tʼáá bí éí Bóhólníihii bikin biiʼ sohodizin íidoolííł áádóó tʼáá íiyisí ayóó átʼéego baa haʼniihgo bibikááʼdóó nahatʼáii yikááʼ dah sidáago nantʼáa doo. Áádóó bibikááʼdóó nahatʼáii yikááʼ dah sidáago nááʼiiłniihii nilı̨́į dooleeł, áko nááʼiiłniihii índa aláahgo naatʼáanii nilı̨́įgo tʼáá ałhiiʼgo bee achʼįʼ hózhóonii yee hooʼáał doo.
14 Áko Héldeiyai áádóó Tobáíjah áádóó Jedáíyah índa Zefanáíyah biyeʼ Josáíyah éí Bóhólníihii bikin biiʼ sohodizin góneʼ naatʼá chʼah bee béédahaniih doo.
15 Díí doo deeghánídę́ę́ʼ nidahidookahgo Bóhólníihii bikin biiʼ sohodizin atah ádeidoolííł, áko tʼáá ałtsoní bee Bóhólníihii nihaa shiníłʼaʼgo nihił béédahózin dooleeł. Bóhólníihii nihiDiyin God haleebee bikʼeh dahonołʼı̨́įgo tʼéiyá kótʼéego nihá áhodoonííł.