Zechariah 7:1-14
7 Daráíyas aláahgo naatʼáanii nilı̨́įgo dı̨́ı̨́ʼ náhááh góneʼ Kíslev wolyéii náhástʼéí nídízííd binih dı̨́ı̨́ʼgóó yoołkáałgo, Bóhólníihii éí Zekaráíyah yichʼįʼ haadzííʼ.
2 Íídą́ą́ʼ Béthel kin shijaaʼdóó diné danilíinii éí Sharíízer áádóó Ríígem-mélek wolyéii índa diné náádaałaʼ, Bóhólníihii bichʼįʼ sodazdidoolzįįł biniyé Bóhólníihii bikin biiʼ sohodizingóó adahoʼdiisʼaʼ.
3 Éí tʼáá ałtsoní bee Bóhólníihii bikin biiʼ sohodizin siʼánígi náádaʼiiłniihii áádóó Diyin God yá dahalneʼii kódeidííniid, Díí tʼóó ahayóí nááhaijįʼ áshtʼı̨́ı̨́ nítʼéʼígi átʼéegoósh átsʼá ádideeshtʼéełgo ashdlaʼ nídízííd góneʼ yínííł naasháago atínídinishdleeh doo?
4 Ákohgo tʼáá ałtsoní bee Bóhólníihii shichʼįʼ haadzíiʼgo ání,
5 Éí kéyahdóó dinéhígíí tʼáá ałtso áádóó náádaʼiiłniihii kódabidiní, Ashdlaʼda áádóó tsostsʼida nínádíziʼgo yínííł naʼadáago índa hodílzingo doo adą́ nídaołʼaahgo tsostsʼidiin nááhaijįʼ daʼ shíísh shá ádaotʼįįd?
6 Áko daʼooyą́ąʼgo áádóó doodlı̨́įłii daohdlą́ąʼgo daʼ éísh doo tʼáá nihí ádá daʼooyą́ąʼ da índa tʼáá nihí doodlı̨́įłii ádá daohdlą́ąʼ da?
7 Jerúsalem kin haalʼáagi diné kéédahatʼı̨́ yę́ędą́ą́ʼ éí binaagóó kin hadaasʼáhígi tʼáá ałtsoní bee ádaʼazįįd yę́ędą́ą́ʼ índa shádiʼáahjigo áádóó dahoníteelgóó diné kéédahatʼı̨́ yę́ędą́ą́ʼ Bóhólníihii yá dahalneʼii chánahgo yaa dahoolneʼ yę́ę éí nihí ałdóʼ dadoohtsʼaʼ.
Doo akʼeh dahółʼíinii biniinaa yisnááh daazlı̨́ı̨́ʼ
8 Áko Bóhólníihii éí Zekaráíyah yichʼįʼ haadzíiʼgo ání,
9 Tʼáá ałtsoní bee Bóhólníihii ání, Tʼááłáʼí nootínígo tʼáá aaníígóó nihikʼis tʼáá ákogi átʼéego bá ádaohtʼı̨́ áádóó baa dajiinohbaʼ índa baa aʼáhí danohsin leʼ.
10 Asdzání bąąh ádahasdįįdii, doodaiiʼ áłchíní bizhéʼé ádaadinii, doodaiiʼ déʼéyóní danilíinii, doodaiiʼ badahojoobáʼíii tʼáadoo bide ádahwíínóhsiní. Índa nihijéí tłʼááhdę́ę́ʼ tʼáadoo nichxǫ́ʼígo nihikʼis bichʼįʼ nitsídaohkeesí.
11 Nidi tʼóó ákʼeh dahalʼı̨́įgo doo tʼáá kʼad daʼdiiztsʼą́ą́ʼgóó deíkááh áádóó doo daʼdidootsʼı̨́įł da biniyé jéʼádahodilkał nítʼééʼ.
12 Bee hazʼáanii índa tʼáá ałtsoní bee Bóhólníihii bizaadígíí biNíłchʼi Diyinii yee dahalneʼii yę́ę yaa dahoolneʼígíí doo dajíistsʼą́ąʼ da doo biniyé dahajéí tsé dildǫ́ʼii nahalingo dadzííłtłʼis. Éí bąą tʼáá ałtsoní bee Bóhólníihii tsʼídá ayóó átʼéego hashké niidzı̨́ı̨́ʼ.
13 Kódzaago bichʼįʼ ádííniid, nidi doo dashíistsʼą́ąʼ da nítʼéʼígi átʼéego hó ałdóʼ shichʼįʼ ádazhdííniid, nidi shí ałdóʼ doo hwíínístsʼą́ąʼ da nítʼééʼ, ní tʼáá ałtsoní bee Bóhólníihii.
14 Náátsʼóʼoołdísii naanáʼooghasígi átʼéego ałʼąą dineʼé doo béédahodzísinii bitahgóó tahonooskaadgo hakéyah tʼáá ádzaaí silı̨́ı̨́ʼ; tsʼídá doo łaʼ ákǫ́ǫ́ chʼóoyaʼ átʼée da silı̨́ı̨́ʼ; kéyah hózhóní yę́ę tʼáá ádzaaí ádajiilaa.
