Zechariah 8:1-23
8 Tʼáá ałtsoní bee Bóhólníihii shichʼįʼ hanáánáádzííʼ,
2 Tʼáá ałtsoní bee Bóhólníihii kóní, Záíyan baa łeʼnisingo éí tsʼídá ayóó átʼéego baa łeʼnisin áádóó ayóó átʼéego hashké nísdzingo baa łeʼnisin.
3 Bóhólníihii kóní, Dził Záíyangóó nídeeshdáałgo Jerúsalem kin haalʼáagi kééhashtʼı̨́į dooleeł, áko Jerúsalem éí kin haalʼáii tʼáá aaníinii hoolyée doo índa tʼáá ałtsoní bee Bóhólníihii bidził éí dził diyinii hoolyée doo.
4 Tʼáá ałtsoní bee Bóhólníihii kóní, Diné hadaastihii índa asdzání hadaastihii éí Jerúsalemgi kintah daʼnítiingóó nidaháaztą́ą doo; tʼáá íiyisí hadaastihgo biniinaa tʼááłáʼí nítínígo bigish nideiditsi dooleeł.
5 Áádóó kintah daʼnítiingóó ashiiké índa atʼéékéda tʼóó ahayóigo nidaanée doo.
6 Tʼáá ałtsoní bee Bóhólníihii kóní, Éí yoołkáałdi díí dineʼé daadzíiʼii binááł bikʼee tʼóó bił adahayóigo, daʼ shíísh ałdóʼ bikʼee tʼóó shił ahayói doo? ní tʼáá ałtsoní bee Bóhólníihii.
7 Tʼáá ałtsoní bee Bóhólníihii kóní, Jó, haʼaʼaahdę́ę́ʼ áádóó eʼeʼaahdę́ę́ʼ shidineʼé yisdádeeshʼnił.
8 Áádóó nináhideeshʼishgo Jerúsalemgi kéédahatʼı̨́įgo shidineʼé danilı̨́į doo índa tʼáá aaníinii áádóó tʼáá ákogi átʼéii bee biDiyin God nishłı̨́į doo.
9 Tʼáá ałtsoní bee Bóhólníihii kóní, Kin biiʼ sohodizin ádoolnííł biniyé tʼáá ałtsoní bee Bóhólníihii bikin bitłʼááh nástłʼinii ályaa yę́ędą́ą́ʼ dahalneʼí bizaad díí yoołkáałdi dadoohtsʼaʼígíí hániʼdii nihigaan bidziilgo ádeínóhsin.
10 Háálá íídą́ą́ʼ béeso bikʼé naʼanishígíí diné bá ádin nítʼééʼ; naaldlooshii ałdóʼ béeso yikʼé nidoolnishii ádin nítʼééʼ índa anaʼí biniinaa łaʼda chʼééjiidáhígíí índa yah áńjiidáhígíí áchʼįʼ nidaʼjódlíí nítʼééʼ, háálá shí tʼááłáʼí jinítínígo bił kéédahojitʼíinii bił ałkʼijįʼ dajídlı̨́įgo áhwíínísin nítʼééʼ.
11 Nidi chʼóóshdą́ą́dą́ą́ʼ áníshtʼéé nítʼéʼígi átʼéego díí diné daadzíiʼii bichʼįʼ kʼad doo ákóníshtʼée da, ní tʼáá ałtsoní bee Bóhólníihii.
12 Jó, nihitahgóó kʼé hólǫ́ǫgo ádeeshłííł, chʼil naʼatłʼoʼii bineestʼąʼ dahodooleeł áádóó łeeyiʼdę́ę́ʼ hadahidínóotʼı̨́įłgo bikʼijįʼ dahtooʼ naałtingo bee ídaʼazįįd doo, áko díí tʼáá átʼé diné daadzíiʼii bee bikʼidahojidlíi dooleeł.
13 Júdah dineʼé danohłíinii índa Ízrel dineʼé danohłíinii, ałʼąą dineʼé bitahgóó yóóʼabíʼoodzíiʼii danohłı̨́ı̨́ yę́ędą́ʼígi átʼéego yisdánihideeshʼniłgo nihitsʼą́ą́dóó akʼihojidlí hólǫ́ǫ doo. Tʼáadoo nihił daayéʼí, nidi hániʼdii danihidziilgo ídaʼdołnééh.
14 Háálá tʼáá ałtsoní bee Bóhólníihii kóní, Danihizhéʼé yę́ę shíkadaʼiiłhilgo shá dahóółchįįdgo atínihideeshłííł niizı̨́ʼígi átʼéego tʼáadoo łahgo átʼéego tsíńdíkéez da, ní tʼáá ałtsoní bee Bóhólníihii.
15 Kótʼéego díí jı̨́ı̨́góó Jerúsalem bichʼįʼ índa Júdah dineʼé danilíinii bichʼįʼ tsʼídá yáʼátʼéhígi ádeeshníiłgo tsínáádíkééz. Tʼáadoo ádił dahonołyéʼí.
16 Díí éí baa naahkai doo: tʼááłáʼí nootínígo bił kéédahohtʼíinii saad tʼáá aaníinii bee bił ałchʼįʼ yádaałtiʼ; nihił yah adaʼiiztiingi* tʼáá aaníinii índa kʼé hwiindzin bee nidahodiyohʼaah;
17 bił kéédahohtʼíinii nihijéí biyiʼdóó tʼáadoo nichxǫ́ʼígo bee baa nitsídaahkeesí índa tʼáá ádzaagóó ádee haʼdiidziihii tʼáadoo nihił ayóó ádaatʼéhí, háálá díí kódaatʼéhígíí tʼáá ałtso jooshłxá, ní Bóhólníihii.
18 Áko tʼáá ałtsoní bee Bóhólníihii shichʼįʼ hanáánáádzííʼ,
19 Tʼáá ałtsoní bee Bóhólníihii kóní, Dı̨́ı̨́ʼ nídízííd binih áádóó ashdlaʼ nídízííd binih áádóó tsostsʼid nídízííd binih índa neeznáá nídízííd binih hodílzingo doo adánígíí nídaołʼaahgo Júdah dineʼé yaa bił dahózhǫ́ǫgo bił nidahoozhǫǫh doo. Hodílzingo áłah nídaʼadleeh tʼáá íiyisí yaa bił nidahoozhǫǫh dooleeł; éí bąą tʼáá aaníinii índa kʼé hwiindzin ayóóʼádeínóhʼní.
20 Tʼáá ałtsoní bee Bóhólníihii kóní, Dadineʼé éí tʼóó ahayóí kin hadaasʼáágóó kéédahatʼíinii Jerúsalemjįʼ nídeíkáah dooleeł.
21 Łahgo kin haalʼáagi kéédahatʼíinii náánáłahjįʼ ádeididooniił, Sołtįʼéi, Bóhólníihii bibee akʼihojidlíii bídeídíikił, áádóó tʼáá ałtsoní bee Bóhólníihii há deiitʼı̨́į doo! Shí ałdóʼ ákǫ́ǫ́ díyá.
22 Tʼáá aaníí dadineʼé tʼóó ahayóí áádóó ałʼąą dineʼé bidziilgo dah deíkáahii tʼáá ałtsoní bee Bóhólníihii hádaatʼı̨́įgo áádóó Bóhólníihii yee akʼijidlíii yídayókeed biniyé Jerúsalemjįʼ nidahidookah.
23 Tʼáá ałtsoní bee Bóhólníihii kóní, Éí yoołkáałdi ałʼąą dineʼé bizaad ałʼąą ádaatʼéii bitahdę́ę́ʼ diné neeználtʼéego yíkaigo Jew dineʼé nilíinii biʼééʼ dayótąʼgo ádadidooniił, Haaʼíshąʼ nił yiikah dooleeł, háálá Diyin God nił hólǫ́ǫgo naa dahosidiitsʼą́ą́ʼ.
Footnotes
^ Yah adaʼiiztiingi nínígíí aa dahwiinítʼı̨́įgi jiníigo óolyé. Deut. 22:15.
