Zechariah 9:1-17
9 Kéyah Héídrak áádóó kin haalʼá Damáskas yikʼijįʼ Bóhólníihii haadzííʼ. Ízrel dineʼé tʼáá ałtso Bóhólníihii yichʼįʼ dadéezʼı̨́ı̨́ʼ áádóó ałʼąą dineʼé ałdóʼ bichʼįʼ dadéezʼı̨́ı̨́ʼ.
2 Éí bihidiníʼánígíí Héímath kin haalʼáii áádóó Táir índa Sáídan kin haalʼáádóó, azhą́ tʼáá íiyisí dahojíyą́ą nidi, ałdóʼ hakʼijįʼ nilı̨́.
3 Háálá Táir kin haalʼáii bineʼ aʼniichéehii ádayiilaa áádóó łeezh dibahí nahalingo béésh łigaii yááyiitsi índa kintah daʼnítiingóó hashtłʼish ditsʼidí nahalingo óola yááyiitsi.
4 Bóhólníihii tʼáá ákohígo nibidoołtʼeeł, áádóó jitʼíinii hatsʼą́ą́ʼ tónteel biyiʼ góneʼ iidiyoołtłʼiłgo hó éí ahodiʼdoolkʼą́ą́ł, jóʼakon.
5 Áshkelan* díí yiyiiłtsą́ągo tʼóó báhádzidgo bił yééʼ hodooleeł; Géíza* ałdóʼ tʼáá íiyisí yínííł nilı̨́į doo áádóó Ékran* ałdóʼ ákótʼée doo, háálá tʼáadoo bee ił chonááhootʼı̨́ʼígóó baa yáznízin doo; Géízadóó aláahgo naatʼáanii ádoodįįł; Áshkelan doo łaʼ yiiʼ kééhatʼíní da doo.
6 Wótashkiʼ éí Áshdadgi* kéédahatʼı̨́į dooleeł, áádóó Filístiya dineʼé bibee ádaa hodzódliʼ ádeeshdįįł.
7 Nááhániihii bidiłígíí dahazééʼdóó nahjįʼ kódeeshłííł, áádóó nááhániihii bitsįʼ doo yildinii dadzótsaʼígíí nahjįʼ kódeeshłííł, áko nihiDiyin God bá dadzoodzíiʼ dooleeł áádóó Júdah kéyahgi naatʼáanii dajílı̨́į dooleeł índa Ékran éí Jííbas dineʼé nahalin dooleeł.
8 Siláo nidaabaahii biniinaa shidineʼé binaagóó nideeshnééł, ákohgo éí doo łaʼda ákǫ́ǫ́ chʼídoonéeł da, índa nááʼnéełii ałdóʼ dooda. Doo łaʼda bikʼi chʼízhdoojahí da, háálá tʼáá shí yiiłtsą́.
Záíyandi aláahgo naatʼáanii dooleełii
9 Záíyan bichʼéʼé nílíinii, ayóó átʼéego nił nihoozhǫǫh; Jerúsalem bichʼéʼé nílíinii, nił hózhǫ́ǫgo dílwosh. Aláahgo niNanitʼaʼí tsʼídá tʼáá ákogi átʼéii índa yisdánídoołtéełgo aʼohgo átʼéego índa télii, jó, éí télii yázhí yikʼi dah sidáago nichʼįʼ bił yigááł, jóʼakon.
10 Íífreiyim bitsinaabąąs bijáád naakiígíí bee naʼabaahii bitsʼą́ą́ʼ nahgóó kódeeshłííł, áádóó łı̨́ı̨́ʼ yee nidaabaahii Jerúsalem bitsʼą́ąjįʼ nahjįʼ kódeeshłííł. Áko ałtı̨́ı̨́ʼ bee naʼabaahii nihideeshchxǫǫł áádóó ałʼąą dineʼé bichʼįʼ bee ił hózhóonii yee yádoołtih. Tónteel bibąąhdóó tónteel ninááneelʼą́ąjįʼ índa tooh nílı̨́ı̨́dóó nahasdzáán nineelʼą́ąjįʼ bee bóhólníih doo.
Záíyan hashtʼeʼninábididooʼnił
11 Ni ałdóʼ dił bee ahaʼdeetʼáanii bee bis áhoodzą́ tó ádindę́ę́ʼ nihiʼawáalyaaí yisdáánil.
12 Awáalyaaí bił chohooʼı̨́ danohłíinii, bidziilgo hazʼą́ą́góó anáhóhkááh. Díí jı̨́ naakidi ahą́ą́h nániiláago nihaa dideeshʼáłígíí bee nihił hashneʼ.
13 Háálá Júdah dineʼé shiʼałtı̨́ı̨́ʼ nahalingo hwiideestas áádóó Íífreiyim éí shikʼaaʼ nahalingo ałtı̨́ı̨́tłʼóól bíhwiideestsoł. Záíyan nílíinii, niyeʼké dahideeshnáałgo éí, Gríis nílíinii, niyeʼké yikʼijįʼ nídidookah. Áko diné ayóó átʼéii bidiltłish nahalingo ándeeshłííł.
14 Bóhólníihii éí bidineʼé yikʼijįʼ biʼdidooltsééł, índa bikʼaaʼ éí atsiniltłʼish anáhátaʼ nahalin doo; Bóhólníihii Diyin God deenástsʼaaʼ bideeʼ bee íʼdílzoołí yee ádidooniił, áko shádiʼááhjígo náátsʼóʼoołdísii yee yigáał doo.
15 Tʼáá ałtsoní bee Bóhólníihii bidineʼé yichʼą́ą́h nídidoodááł, áko bidaʼanaʼí deidooldiłgo tsé yee adadziiztłʼinii yikʼi nidookah, áádóó wáin hoł dahoniiłdohígi átʼéego hahojííłʼáa doo; łeetsʼaaʼ biiʼ dił hazhdééłbįįdígi átʼéego áádóó bikááʼ nááʼiiniihí tʼáá naanídaazʼáágóó dił bąąh nidaashchiiʼígi átʼéego ádajítʼée doo.
16 Éí bijı̨́ biBóhólníihii Diyin God bidineʼé éí dibé dah danéelkaadígi átʼéego yisdéidoonił; jó, naatʼá chʼah éí tsé daʼílíinii bee nidaashchʼąąʼígi átʼéego bikéyah bikáaʼgi dah naʼatʼaʼí dah yidoołtsos.
17 Dooládóʼ yee yáʼádaatʼéehii áádóó yee danizhóníii ayóó átʼée da! Tłʼoh naadą́ą́ʼ bee tsíłkéí dabíiyis dooleeł áádóó wáin ániidíii bee chʼikéí bízháán nidaakaii dabíiyis dooleeł.
Footnotes
^ Filístiya dineʼé bikin haalʼá.
^ Filístiya dineʼé bikin haalʼá.
^ Filístiya dineʼé bikin haalʼá.
^ Filístiya dineʼé bikin haalʼá.
