Zephaniah 1:1-18
1 Éíman biyeʼ Josáíyah éí Júdah kéyahgi aláahgo naatʼáanii nilı̨́įgo yoołkááł yę́ędą́ą́ʼ Heziikáíyah biyeʼ Amaráíyah, éí biyeʼ Gedaláíyah, éí biyeʼ Kúshai, éí biyeʼ Zefanáíyah éí íídą́ą́ʼ Bóhólníihii kóníigo yidiiztsʼą́ą́ʼ.
2 Bóhólníihii ání, Kéyahgóó tʼáá átʼéé nítʼééʼ tʼáá ałtsoní ádeeshdįįł.
3 Diné áádóó naaldlooshii ádadeeshdįįł. Yótʼáahdi tsídii nidaatʼaʼígíí áádóó tónteel biyiʼ łóóʼ naaldeehígíí índa doo yáʼádaashóonii yee daʼníłtłʼaii tʼáá bił ádadeeshdįįł. Áádóó kéyahdóó diné áhodeeshdįįł, ní Bóhólníihii.
4 Júdah dineʼé áádóó Jerúsalem kin haalʼáagi kéédahojitʼínígíí hakʼijįʼ nishłı̨́įgo atíhodeeshłííł. Áko díí hazʼánídóó Béíyal* yichʼįʼ nidahałáii yidzíʼígíí áádóó nááʼiiłniihii edaʼalyaii yichʼįʼ nidahałáii índa bee dabiʼdójíhígíí bił ádahodeeshdįįł.
5 Kin bighą́ą́ʼdóó yáʼąąsh biyiʼdi dahiníláii yichʼįʼ nidahałáii índa Bóhólníihii áádóó Málkam* bił ahóóltąʼgo bichʼįʼ bee ádee haʼdiidziihgo nidahałáii bił ádahodeeshdįįł.
6 Bóhólníihii yikééʼ deíkááh yę́ę yitsʼą́ąjįʼ dah nídahidiikaii áádóó Bóhólníihii bééhodeesįįł doo danízinii, doodaiiʼ doo yíndaʼídíłkidii ádahodeeshdįįł.
7 Bóhólníihii binááł hashtʼedadíínóhtʼé, háálá Bóhólníihii beidoołkááł baa hoolzhíísh. Bóhólníihii éí nááhidoonihii hashtʼeyiilaa; baa haaskaígíí atsʼáidiníʼą́ągo dayíísı̨́ı̨́ʼ.
8 Éí ákódzaadóó Bóhólníihii binááhániihii nááhidoonih bijı̨́ı̨́ góneʼ bídahólníihii áádóó aláahgo naatʼáanii badaʼáłchíní índa doo Ízrel dineʼé kʼehjí hadadítʼéii tʼáá ałtso atídeeshłííł.
9 Tʼáá éí bijı̨́ chʼéʼétiin gónaa naníʼáii yáátis hijeehígíí índa bindanitʼaʼí* dabikin biiʼ tʼáá naʼníleʼdii áhoonííł áádóó naʼadloʼ hadadeezbingo ádayiilaii atídeeshłííł.
10 Bóhólníihii ání, Éí bijı̨́ ákódahoodzaago łóóʼ nidahaniihgi dáńʼdítı̨́hídóó ayóó íitsʼaʼgo hahodidoodlał; naaki góneʼ ninááhósʼaʼídóó hanááhodidoodlał índa dah daaskʼidę́ę́ʼ ayóó íitsʼaʼgo hodidootsʼı̨́ı̨́ł.
11 Jerúsalem łahgi Máktesh hoolyéegi kéédahohtʼíinii, chaał hadahoyohnííh, háálá naalyéhé baa nidahaniihii tʼáá átʼé naaʼabídadziisghaal áádóó béésh łigaii deíjáahii ałtso nabiʼdiztseed.
12 Áádóó éí hoolzhishdi ákódahoodzaago Jerúsalemgi bee hoolʼiní naanídeeshtʼáałgo nanishtáa doo, áádóó diné doo ádidahasʼáágóó deíkáahii tʼáá bijéí biyiʼdi kódaaní, Bóhólníihii éí yáʼátʼéhígi doo ááníił da doo; doo yáʼátʼéhígi ałdóʼ doo ááníił da doo, daanínígíí atídadeeshłííł.
13 Éí bąą bindaalyeʼé bighadahidooʼnił áádóó dabikin tʼáá ádzaaí dadooleeł. Kin ádeidoolíił nidi, doo yiiʼ kéédahatʼı̨́į da doo, áádóó chʼil naʼatłʼoʼii kʼideideezláa nidi, yitsʼą́ą́dóó wáin doo deidoodlı̨́įł da.
14 Ayóó átʼéego Bóhólníihii beidoołkáłígíí baa hoolzhíísh. Koshídę́ę́ʼ hoolzhish, áádóó tʼáadoo hodinaʼí ayóó áhodoonííł; Bóhólníihii beiníłką́ bijı̨́ iinééʼ hahoyiiníihgo diné ayóó ábóodziilii anáchahgo yichxa dooleeł.
15 Éí bijı̨́ tʼóó báhádzidgo atíʼélʼı̨́įgo haʼdooʼááł. Achʼįʼ nahwiiʼná áádóó tsístłʼahaztʼiʼ bił haʼdooʼááł. Tʼáá ádzaaí hooleełgo áádóó tʼáá ádzaaí ooleełgo haʼdooʼááł. Chahodoołhił áádóó doo hootʼı̨́ı̨́góó haʼdooʼááł. Kʼos diłhiłgo áádóó yéego chahałheełgo haʼdooʼááł.
16 Kin hadaasʼáii binaa ahéédaʼastłʼinii índa yadaʼniiltłʼóonii bikʼijįʼ anaʼí bidilní áádóó anadaʼałʼı̨́įgo dadilwoshgo haʼdooʼááł.
17 Bóhólníihii bichʼįʼ ádił nidaʼdziisíʼígíí biniinaa diné bá tsístłʼahaztʼiʼgo áhodeeshłííł, áko doo daʼooʼíinii nahalingo deíkáah dooleeł áádóó dahadił éí łeezh dibahí nahalingo yahidookááł índa chąąʼ yáádaaʼá nahalingo dahatsʼíís yáádaaʼáa doo.
18 Bóhólníihii tʼóó báhádzidgo báhóóchįįd bijı̨́įdi béésh łigaii áádóó óola bee dahólóonii tsʼídá doo yisdábónííł átʼée da doo, nidi łeʼniizı̨́ʼígíí diiltłahgo nahasdzáán tʼáá átʼéé nítʼééʼ ałtso iididoołkʼą́ą́ł, áko nahasdzáán bikááʼ kéédahojitʼíinii tʼáá ádzíłtso tʼáadoo kótʼéʼílíní áhodoołdįįł.
Footnotes
^ Saad Łaʼ Ááhdeiłníinii bee bééhózinígi yíníłtaʼ.
^ Áman dineʼé bidiyin bidiʼníinii átʼé.
^ Bidiyin dabidiʼníinii ááhyiłní.
