Zephaniah 2:1-15
2 Dineʼé doo nidzinii danohłíinii,* tʼáá nihí tʼáá łaʼ bizhiʼee áłah óhnééh, tʼáá aaníí, áłah óhnééh.
2 Bóhólníihii yee nihoníʼáanii tʼah doo íílééhdą́ą́ʼ, azhool nahalingo tʼah doo nihił yóóʼahaghááhdą́ą́ʼ, tʼah doo tʼóó báhádzidgo nihichʼįʼ báháchįįhdą́ą́ʼ, Bóhólníihii tʼah doo nihichʼįʼ báháchįʼgo yidiłkaahdą́ą́ʼ áłah óhnééh.
3 Nihokááʼ dineʼé aʼohgo ádanohtʼéii, bikʼeh dahonołʼíinii tʼáá ánółtso, Bóhólníihii hádaohtʼı̨́. Tʼáá ákogi átʼéii hádaohtʼı̨́; aʼohgo éʼétʼéii hádaohtʼı̨́. Áko Bóhólníihii tʼóó báhádzidgo atíʼdoolííł bijı̨́įdi daatsʼí nihinéesʼı̨́įʼ dooleeł.
4 Háálá Géíza* yóóʼadidootʼááł áádóó Áshkelan* kintsʼiil dooleeł; Áshdad* hoolyéédóó dineʼé ałníʼníʼą́ągo chʼíbidíʼnóolkał índa Ékran* éí naniseʼ behétłʼóól haaltsʼǫ́ǫ́d nahalin dooleeł.
5 Tónteel bibąąhgóó kéédahohtʼíinii, Kéreth dineʼé nohłíinii, doo hojoobaʼ ájíníi da! Háálá Bóhólníihii bizaad yee nihikʼijįʼ nilı̨́. Filístiya dineʼé bikéyah nílíinii, Kéínan ándeeshdįįłgo doo łaʼ ákwii kéédahatʼíní da doo.
6 Tábąąhgi kéyah bikááʼgóó dahootsogóó naʼniłkaadii dabighan doo áádóó dibé dabighan doo.
7 Áádóó Júdah dineʼé daadzíiʼii tábąąhgóó kéyahígíí daabí dooleeł. Éí kéyahígíí yitsʼą́ą́dóó daʼayą́ą dooleeł. Eʼeʼáahgo Áshkelan kin haalʼáhígi danjah doo. Háálá haDiyin God Bóhólníihii haa áhodoolyąąłgo yisnááh dajílíinii nahjįʼ kwíidoolíiłgo daahóó nítʼééʼ yę́ę hóóʼ nídadoodleełgo íidoolííł.
8 Móʼab dineʼé ándahałtʼiʼ áádóó Áman dineʼé daʼódziih; shidineʼé yá nidahałtʼiʼgo tʼáá bí ayóó átʼéego ádaa dahaʼniihgo dahakéyah yikʼijįʼ ádá nidahalchįįhgo disétsʼą́ą́ʼ.
9 Tʼáá ałtsoní bee Bóhólníihii éí Ízrel biDiyin God nilíinii ání, Éí bąą tsʼídá tʼáá aaníí hinishná; ákótʼéego Sádamgi áhóótʼįįdígi átʼéego Móʼabgi ałdóʼ tsʼídá tʼáá aaníí ákóhodoonííł áádóó Gomárahgi áhóótʼįįdígi átʼéego Áman dineʼé bikéyahgi ałdóʼ ákóhodoonííł. Éí chʼil adishahii dahólóonii áádóó táánííʼ bił dahooldzisgóó hoolʼáágóó tʼáá ádzaaí hazʼáanii hodooleeł. Shidineʼé daadzíʼígíí biʼanaʼí binaalyeʼé deidoołnééł áádóó shidineʼé daadzíʼígíí biʼanaʼí bííʼ ádeidoolííł.
10 Bibee ádaa hodzódliʼ biniinaa kódabidiʼdoolnííł, háálá tʼáá ałtsoní bee Bóhólníihii bidineʼé yikʼijįʼ danilı̨́įgo dayíídzííʼ áádóó tʼáá bí ayóó átʼéego ádaa dahaʼniih nítʼééʼ.
11 Tsʼídá tʼóó báhádzidígi átʼéego Bóhólníihii hakʼijįʼ dooleeł, áko nahasdzáán bikááʼ diyin dabidiʼníinii tʼáá ałtso yaa nididoodaał, áádóó ałʼąą dineʼé tʼááłáʼí nítínígo tʼáá bił nahazʼą́ą́dę́ę́ʼ tʼáá ałtso hachʼįʼ nidahałáa doo.
12 Iithiyópiya kéyahdę́ę́ʼ danohłíinii, nihí ałdóʼ shidiltłish bee nidanihidiʼdootsxił.
13 Áádóó náhookǫsjigo hakʼijįʼ kʼídidoolchiłgo Asíriya dineʼé atíidoolííł índa Níneveh kin haalʼáii tʼáá ádzaaí íidoolíiłgo honoojíígóó hóółtsei nahalingo hazʼą́ą doo.
14 Kintahgóó dibé dah danéelkaadii naazhjéeʼ doo; nihokááʼ dineʼé dabilı̨́ı̨́ʼ tʼáá ałʼąą ádaatʼéii áadi naazhjéeʼ doo. Naalʼeełíshzhiin áádóó tábąąsdísí ałdóʼ kin naaznilii chʼéʼétiin bikáaʼgi haʼnaa naníʼáhígi nábiilkáahgo tsésǫʼdóó áníigo dah sikée doo. Chʼéʼétiin tʼáadoo biniyéhí da doo, háálá gad bee dahazbįʼii tʼáadoo bahatʼaadí daníʼáa doo.
15 Díí baa hózhǫ́ǫgo kin haalʼáii ayóogo bitsʼáhoníyééʼ nítʼéeʼgo tʼáá bijéí biyiʼídi ání, Tʼáá shí tʼéí honishłǫ́ áádóó kin haalʼá doo łaʼ nááhódlǫ́ǫ da. Dooládóʼ tʼáá ádzaaí dzizlı̨́įʼgo nidaaldlooshii ákóneʼ naazhjééʼ hazlı̨́ı̨́ʼ lá. Tłeeyéiʼ, daaníigo bílaʼ yee yóóʼadahwiighaasgo tʼááłáʼí nítínígo hą́ą́h hidikáah doo.
Footnotes
^ Júdah dineʼé ááhyiłní.
^ Filístiya dineʼé bikin haalʼá.
^ Filístiya dineʼé bikin haalʼá.
^ Filístiya dineʼé bikin haalʼá.
^ Filístiya dineʼé bikin haalʼá.
