Haʼátʼíísh biniyé Jiihóvah ayóóʼádeiyóʼnínígíí bił ahínéekah doo? Diné bił ahínéekahígíí éí yáʼátʼéehii doodaiiʼ doo yáʼátʼéehii yaa nihidoolos. (Pr 13:20) Aláahgo Nááʼiiłniihii Jiihóíyada bił nijiʼaash yę́ędą́ą́ʼ Naatʼáanii Jiihóʼash ‘tʼáá ákogi ájítʼı̨́įgo Bóhólníihii [Jiihóvah] bíínááł.’ (2Ch 24:2) Jiihóíyada ádindóó bikʼijįʼ Jiihóʼash éí diné doo yáʼátʼéehii bił nijildeehgo Jiihóvah bitsʼázhníyá.​—2Ch 24:17-19.

Ałkʼidą́ą́ʼ, yilʼaadii Paul ání áłah néidleehígíí éí ‘kin nitsaago siʼą́’ nahalin, áádóó yah hanajahígíí éí ‘łeetsʼaaʼ chooʼíinii’ nahalin. “Łeetsʼaaʼ . . . chooʼíinii nahojílin” doo yáʼátʼééhgóó ádaaníłígíí doo bitah dahoniidlǫ́ǫ da. Azhą́ shı̨́ı̨́ nihighan hazʼą́ą́dóó dóó bił yah haneijahígíí doo yáʼáshǫ́ǫ́góó ádaaníiłgo Jiihóvah doo bił yáʼátʼéeh da. (2Ti 2:20, 21) Ákogo, náásgóó Jiihóvah ayóóʼádeiyóʼnínígíí nihikʼis ádeilneʼ dóó bá nideilʼaʼgo nihíká anájah.

VIDEO DOO YÁʼÁTʼÉEHII BITSʼĄ́Ą́ʼ ÁDANIITʼÉ DADÍNÍILʼĮĮŁ, ÁÁDÓÓ DÍÍ NDAʼÍDÍKIDÍGÍÍ BAA NITSÍDEIKEES DOO:

• Doo yáʼátʼéhígíí haash yitʼéego neʼiinaʼ yidínóołtłʼah?

• Naaskidígíí biyiʼdóó, tááltʼéego Oodlání doo yáʼátʼéhígíí nahjįʼ kódayiilaago haʼátʼíísh bíká eelwod?

• Diyin Bizaad binahjįʼ naʼnitinii éísh haitʼéego akʼis yáʼátʼéehii chóidííłtʼeeł?