JESUS BEDAʼIILʼĮ́ĮGO DAHINIIʼNÁ
Nihaa Dahidookahígíí Bichʼįʼ Kʼé Daniidzin Doo
March 23go, Jesus Daaztsánígíí Bééhániih Biniyé Áłah Aleehgi 12 mííl tsoh ánéelą́ąʼgo doodaiiʼ biláahgo nihaa dahidookah. Jiihóvah biyeʼ nihá ninéidiníʼánígíí binahjįʼ náásgóó hózhǫ́ǫgo nihił hazʼą́ą dooígíí baa ahoʼniineʼ. Éí binahjįʼ ayóó bił dahózhǫ́ǫ doo! (Isa 11:6-9; 35:5, 6; 65:21-23; Joh 3:16) Ákondi doo nihił ahoʼniilneʼígíí tʼéiyá Jiihóvah yaa haniih da doo. (Ro 15:7) Nihí ałdóʼ aniitah doo, nihaa heeskaígíí baa nihił dahózhǫ́ǫgo yáʼátʼééh dabidiʼdiiʼniił.
-
Doo shı̨́ı̨́ tʼóó dah dadíníibįįł da, ndi tʼáá ałtso neheeskaígíí bichʼįʼ kʼé daniidzingo yáʼátʼééh dabidiʼdiiʼniił
-
Łaʼ bił ahéédahonísinígíí bił ahił hólneʼgo łaʼ wóshdę́ę́ʼ dabiʼdooʼniidgo nihaa heeskaígíí ałdóʼ baa ákonízin doo. Índa łaʼ níyáhígíí bił da dah díníídaał, áko Diyin Bizaad nílʼı̨́įgi, doodaiiʼ sin bee dahataałígíí bee bíká adíílwoł
-
Hóóneʼ bikéédóó tʼáá háiida naʼídíkid bee hólǫ́ǫgo éí hazhóʼó yikʼiʼdidootı̨́ı̨́ł biniyé bíká adíílwoł. Tʼáadoo hodinaʼí ákweʼé áłah nááʼádleeh ládą́ąʼgo éí hazhóʼó ahił nahodoonihígíí doo bíighah da łeh. Ákótʼéego éí tʼáá bighangi díínáałgo bił nahodíilnihgo átʼé. Bighangi doo nił bééhózingóó, kódidííniił da: “Díí áłah azlı̨́ʼígíí daatsʼí tʼáá bikʼiʼdinitą́? Naʼídíkid łaʼ nee hólǫ́ǫgo éí bee níká adeeshwołgo átʼé. Ni béésh bee haneʼé daatsʼí hólǫ́, doodaiiʼ tʼáá nighangi naa deesháałgo átʼé.”