“HODEEYÁÁDĄ́Ą́ʼ Diyin God yótʼááh hiníláii índa nahasdzáán áyiilaa.” (Genesis 1:1) Díí saad bee ąą ályaaígíí éí tsʼídá aláahdi bééhoʼdílzin. Áko díí saad dashijaaʼígíí éí Diyin Bizaad biiʼ íiyisíí chʼéébiʼditʼáhígíí nihichʼįʼ ííshjání ályaa, éí God ayóóʼábóodziilii, Jiihóvah. Áko díí saad áłtsé dashijaaʼígíí éí God, yá biiʼ dahólóonii dóó nahasdzáán áyiilaago ííshjání ííłʼı̨́. Éí bikéédóó saad dah náánáshjaaʼígíí, éí nízaadgóó bitaʼ ádahóótʼįįdgo yaa chʼíhwiiʼaah. Díí ádahóótʼįįdígíí éí łaʼ ajı̨́ nahalingo yózhí. God éí nahasdzáán bikááʼ iináa dooleeł biniyé hashtʼeyiilaa, ayóó áhonóolingo áhoolaa.

Nahasdzáán bikáaʼgi tsʼídá aláahdi ayóó átʼéego God áyiilaaígíí, éí bílaʼashdlaʼii. Jiihóvah yee átʼéii ayóóʼóʼóoʼniʼ dóó hódząʼ, éí bílaʼashdlaʼii tʼéiyá yee honáłtʼéego ájiilaa. God éí nahasdzáán bitsʼą́ą́dóó łeezh yee diné áyiilaa, éí Ádam bee jíízhiʼ. Áádóó Íídengi ayóó áhonóolingi niiníłtı̨́. God éí tʼáá bí díí dáʼákʼehgi ndaniseʼ kʼiidíílá, hózhónígo tsin bineestʼąʼ baa náhoodleełgo áyiilaa.

Áko ńtʼééʼ God éí diné asdzání bee hólǫ́ǫgo bá yáʼátʼéeh doo niizı̨́ı̨́ʼ. Ádam bitsą́ą́ʼ łaʼ yee asdzání áyiilaa, áádóó hweʼasdzą́ą́ dooleeł biniyé yił haa níʼáázh. Tʼahádóó Íiv bee biʼdóojiʼ. Ádam hoł hóozhǫǫdgo kózhdííniid: “Kʼad díí shitsʼinígíí bitsʼą́ą́dóó tsʼin áádóó shitsįʼígíí bitsʼą́ą́dóó atsįʼ jílı̨́.” God ánídooʼniid: “Éí bąą diné jílíinii hazhéʼé índa hamá bitsʼą́ą́ʼ dashdidoogáałgo hweʼasdzą́ą́ tʼéiyá bił jiináa doo, áko nizhdiltʼé yę́ę atsʼíís tʼááłáʼí jileeh.”​—Genesis 2:22-24; 3:20.

God éí Ádam dóó Íiv naakigo bee hazʼáanii yee hachʼįʼ haadzííʼ. Áłtsé éí ííłní, nihighan nahasdzáán bikáaʼgi kʼééʼdílyéhígíí binaałnishgo baa áhółyą́ą doo. Áko nihaʼáłchíní bił bikáaʼgi kʼeeʼąą dínóohtʼı̨́ı̨́ł. Naaki góneʼ éí dáʼákʼeh nitsaago tʼáá łáʼígo tsin bineestʼąʼ sikaadígíí bąąhdóó oosą́ą́ʼ lágo hodííniid. Háálá éí “tsin bineestʼąʼ bitsʼą́ą́dóó yáʼátʼééhjí índa doo yáʼátʼééhjí” átʼé. (Genesis 2:17) Díí doo bikʼeh ájiidzaagóó éí jidínóoneeł. Áko díí naakigo bee hazʼáanii beʼjiilaago éí God há Hooʼáałii nilı̨́įgo ázhdoolííł. Akʼeh hojííłʼįįdgo éí hwee ayóóʼóʼóoʼniʼ dóó ahééh jinízinígíí ííshjání ájiilaa doo. Díí aa aʼááh bił hootʼáałii éí tʼáá ákónéehee nízhdidoolééł. Áko díí nizhdiltʼéego éí tsʼídá yáʼátʼéehgo hazhdíłtʼéí ńtʼééʼ. Diyin Bizaad ání: “Diyin God éí áyiilaaígíí tʼáá ałtso yinééłʼı̨́įʼgo éí tʼáá íiyisí bił yáʼíítʼééh.”​—Genesis 1:31.

​—Genesis wóltaʼii 1dóó 2jįʼ biiʼ baa haneʼ.