SÁMSON ádindóó bikʼijįʼ, Sámuel éí Ízrelgi God yá halneʼii dóó ánihwiiʼaahii jílı̨́ı̨́ ńtʼééʼ. Hanaagóó ałʼąą dineʼé naatʼáanii bee dahólónígi átʼéego, nihí ałdóʼ naatʼáanii łaʼ nihá nídidííłtééł dahałníigo haa ninádinikah. Díí dajókeedígíí Jiihóvah yéigo yikʼee diniih, ákótʼéii ndi Sámuel éí díí bikʼeh ádíínííł bidooʼniid. Áko God éí diné aʼohgo nitsíkees léiʼ, Saul wolyéego naatʼáaniigo áyiilaa. Áádóó náás hodeeshzhiizhgo Naatʼáanii Saul, ayóó átʼéego ádaa tsídeeskéezgo doo akʼeh hojíłʼı̨́į da jizlı̨́ı̨́ʼ. Éí bąą Jiihóvah éí Saul naatʼáanii ídlı̨́įgi doo honiizı̨́įʼ da, áádóó Sámuel ííłní naatʼáanii łáʼ nínáádidííłtééł. Éí tʼah ániid naagháá léiʼ David joolyéego nábiʼdiiltı̨́. Ákótʼéii ndi ląʼí nááhaigo índída naatʼáanii jidooleeł.

David éí tʼahdii ashkii jílı̨́įgo hánaaíké, éí Saul bisiláo daʼjítahgo baazhníyá. Tʼáá ałtso Saul bisiláo dajílínígíí tʼááłáʼí anaʼí yéʼiitsoh léiʼ Goláíyath wolyéego ayóó béédajildzid. Díí yéʼiitsoh éí God dóó tʼáá ájíłtso tʼóó há nahałtʼiʼ. Áko díí biniinaa David báhóóchįįdgo yéʼiitsoh tʼáá áko ahidiigą́ą́ł yidííniid. Aditłʼı̨́ı̨́h bee dóó tsé tʼáá díkwííhígo nijijaah, áádóó yéʼiitsoh ayóó áníłnéezgo (9 ft. bilááh) bił ałchʼįʼ nizhníʼáázh. Goláíyath tʼóó haa yidloh, ndi David áháłní shí yeeʼ niláahdi bee naʼabaahii shílákʼee silá. Háálá David éí Jiihóvah bízhiʼ binahjįʼ nijibaah! Tsé tʼááłáʼí bee Goláíyath yiyiisxı̨́, áádóó yéʼiitsoh bidiltłish yee bitsiitsʼiin kʼíiníłhaal. Filístiya bisilaó ayóó átʼéego nídajisʼdzíidgo ajííjééʼ.

Saul éí David doo nináhinilyéésgóó baa ákozhniizı̨́ı̨́ʼ, áko hosiláo yikʼi déezʼı̨́įgo ájiilaa. Ńtʼééʼ David siláo ayóó átʼéii jizlı̨́įʼgo biniinaa Saul tʼáá awołíbee hoołchʼı̨́ı̨́d silı̨́ı̨́ʼ. Éí biniinaa David díí Saul shidiyoołhééł jinízingo nazhnichéego ląʼí nááhai. Ákótʼéii ndi David díí naatʼáanii háká neiʼáhígíí doo haada yitʼéego bikʼijįʼ jílı̨́į da. Háálá íizhnízingo Jiihóvah éí Saul naatʼáaniigo néidiiłtʼı̨́. Saul éí daʼahijigą́ągi hoʼdiisxı̨́. Áádóó Jiihóvah yee haadzíí yę́ęgi átʼéego David naatʼáanii silı̨́ı̨́ʼ.

David naatʼáanii jílı̨́įgo kin biiʼ sohodizinígíí tʼáá shí Jiihóvah bá ádeeshłííł jiniizı̨́ı̨́ʼ. Ákótʼéii ndi Jiihóvah éí naʼáłchínígíí łaʼ díí kin niidooʼááł hodííniid. Éí David biyeʼ Solomon wolyéhígíí kin niiníʼą́. Ákondi God éí David yikʼi hoosdliʼ, éí baa hózhǫ́ǫgo bee ahaʼdeetʼáanii hoł áyiilaa. Nahatʼaʼ tʼáadoo łaʼda benáłtʼéhígóó hó hatsʼą́ą́dóó naatʼáanii daʼahéelchíił doo. Áko éí Íídendi Yisdáʼiiníiłii bee haʼoodzííʼ yę́ę, David bitsʼą́ą́dóó doochííł. Éí Mesáíyah dooleeł, “God atsʼábiníłtı̨́” doodaiiʼ nábidiiłtı̨́ jiníigo óolyé. Jiihóvah éí díí Mesáíyah hoolʼáágóó Hooʼáałii nilı̨́į dooleeł níigo yee haadzííʼ.

David éí yéigo ahééh jinízingo kin biiʼ sohodizinii bee ádoolníłígíí, dóó béésh daʼílínígíí ałʼąą ádaatʼéii ałhąąh ájiilaa. Áádóó ałdóʼ ląʼígo diyin kʼehgo sin ádajiilaa. Hweʼiinaʼ nidootʼihjįʼ hoolzhishgo David ájíní: “Bóhólníihii biNíłchʼi Diyinii shee yáłtiʼgo bizaad bee hahasdziih.”​—2 Samuel 23:2.

​—Naaltsoos 1 Samuel; 2 Samuel; 1 Chronicles; Isaiah wóltaʼii 9:7gi; Matthew wóltaʼii 21:9gi; Luke wóltaʼii 1:32gi; John wóltaʼii 7:42gi biiʼ baa haneʼ.