ÍZREL dóó Júdah binaatʼáanii dahólǫ́ yę́ędą́ą́ʼ, hastóí łaʼ God bá dahojilneʼii dajílı̨́ı̨́ ńtʼééʼ​—éí God yá dahalneʼii daolyé. Díí hastóí éí bidaʼoodląʼ dabidziil, dóó doo nídahinilyéésgóó God yee hahasdzíiʼii yaa ndahasneʼ. Éí dı̨́įʼgo yaa chʼídahwiizʼánígíí baa daʼíídíilta.

1. Jerúsalem ábiʼdisdįįd. God bá dahalneʼii, Aizéíyah dóó Jeremáíyah, Jerúsalem ábidiʼdooldįįł níigo tʼáá íídą́ą́ʼ yaa nahasneʼ. God éí Jerúsalem biniinaa íísdįįdígíí, éí há dahalneʼii ííshjání ádayiilaa. Éí áádóó diné doo dahozhdohsingóó inaʼadloʼ bee dahojííłchxǫʼ, áádóó doo tsʼííd ádajooníiłgo dahayoochʼííd ńtʼééʼ.​—2 Kings 21:10-15; Isaiah 3:1-8, 16-26; Jeremiah 2:1-3:13.

2. Jiihóvah bikʼeh íʼoolʼįįłii yę́ę hashtʼenályaa. God bidineʼé Bábilandi 70 nááhaijįʼ dabidisnááh, áádóó bééʼílniiʼ. Hakéyah Jerúsalemgóó nízhdookah, áádóó Jiihóvah bikin biiʼ sohodizin yę́ę ánídazhdoodlííł. (Jeremiah 46:27; Amos 9:13-15) Aizéíyah 200 daatsʼí nááhai, Sáíras akʼeh didoodleełgo tʼáá bítséedi baa chʼíhozhníʼą́. Éí Bábilan yikʼeh didoodleeł, áádóó God bidineʼé bá lą́ azhdoołeełgo biDiyin Jiihóvah dólzin yę́ęgi hashtʼéii deedoodlííł. Aizéíyah éí Sáíras díí Bábilan yikʼeh deesdlı̨́įʼgi hazhóʼó yaa hoolneʼ.​—Isaiah 44:24-45:3.

3. Mesáíyah níyáagi, ájíítʼįįdgi dóó áhoʼdoolʼįįdgi. Mesáíyah éí Béthlehem Éfratahgi hodiʼdoochííł. (Micah 5:2) Aʼohgo ájítʼéii ńtʼééʼ, Jerúsalemgi jiníyáago télii yázhí hoł yíldloozh. (Zechariah 9:9) Ayóó haa áhwiinítʼı̨́ı̨́ ńtʼééʼ, ákondi diné tʼóó há dadoolnihgo ląʼí doo dahoniizı̨́įʼ da. (Isaiah 42:1-3; 53:1, 3) Yéigo hachʼįʼ nahodiyooʼnaałgo dazhdootsaał. Ákoósh hweʼiinaʼ tʼáá ádíjįʼ nidootʼih? Ndagaʼ, niʼiidzíihgi aa néiidiyiiʼaah doo biniyé hweʼiinaʼ bee ląʼí bá ninázhdiníʼą́. (Isaiah 53:4, 5, 9-12) Éí dajiztsą́ą́dę́ę́ʼ nááhoʼdiilzáago tʼéiyá ákódoonííł.

4. Mesáíyah éí nahasdzáán yikʼi hooʼááł. Bílaʼashdlaʼii éí kʼé yee dahwéeʼaah doogi, doo yídaneelʼą́ą da. Ákondi Naatʼáanii Mesáíyah éí kʼé bee Hózhǫ́ǫ́jí Yinantʼáii wolyé. (Isaiah 9:6, 7; Jeremiah 10:23) Mesáíyah biyaadóó nahatʼáago éí tʼáá ałtso bílaʼashdlaʼii kʼé daʼahidiʼníigo kéédahatʼı̨́į doo, naaldlooshii nináneelʼą́ąjįʼ tʼáá bił. (Isaiah 11:3-7) Ąąh dahazʼą́ ádin doo. (Isaiah 33:24) Anoonééł ndi hoolʼáágóó ádin dooleeł. (Isaiah 25:8) Mesáíyah hooʼáałgo éí daneeznánę́ę nahasdzáán bikáaʼjįʼ náábidiʼdooljah.​—Daniel 12:13.

​—Naaltsoos Isaiah, Jeremiah, Daniel, Amos, Micah, dóó Zechariah biiʼ baa haneʼ.