JESUS yáʼąąshgóó anáádzáádóó bikʼijįʼ, Jerúsalemdi hooghan léiʼgi 120go daatsʼí yiltʼéego bídahoołʼaahii áłah silı̨́ı̨́ʼ. Éí 33 C.E yihah yę́ędą́ą́ʼ Péntekast beiníłką́ągo hodílzin biniyé áłah jizlı̨́ı̨́ʼ. Ńtʼééʼ tʼáadoo hooyání ayóó átʼéego yiyoł nahalingo hodiistsʼą́ą́ʼ, éí kin biiʼ nijíiztánę́ę góneʼ hoł hadéébįįd. Áádóó ídahoołʼaahii saad ałʼąą ádaatʼéego, doo béédahojísinígíí bee yádajiłtiʼgo baa nízhdiikai. Díí lá hai yitʼéego ákóhóótʼįįd? God éí díí ídahoołʼaahii níłchʼi diyinii yee nílá.

Tłʼóoʼdi éí diné daʼníłtsʼą́ą́dę́ę́ʼ Péntekast biniyé nijiiskai. Ńtʼééʼ ídahoołʼaahii éí dahazaad nizhónígo yee yádaałtiʼgo tʼóó bikʼee hoł ádahóóyóí. Áádóó Peter ání díí God yá halneʼii Jówel átséedi yaa chʼíhoníʼánę́ę bikʼehgo áhóótʼįįd. Éí God biníłchʼi diyinii “bikʼi hwiidooleeł,” áádóó ayóó átʼéego bee nidazhdoolnish. (Joel 2:28, 29) Díí níłchʼi diyinii bee ayóó átʼéego áhóótʼįįdígíí, God éí Ízrel dineʼé doo yiniizı̨́ı̨́ʼgóó bééhoozin. Ndi ániidígo Christ dayoodlą́ągo áłah nídaadleehjígo bił yáʼíítʼééh. God bá naashʼaʼ dooleeł danízinígíí éí Christ bikééʼ joogáał doo.

Tʼóó tséʼádin hakʼijįʼ ídlı̨́įgo hooʼaʼ, ídahoołʼaahii bidaʼanaʼí awáalya góneʼ adahwiistłʼííd. Ńtʼééʼ łah tłʼéeʼgo Jiihóvah níłchʼigo bá naalʼaʼii łaʼ awáalya bidáádílkał há ąą áyiilaa. Áádóó ídahoołʼaahii nidahołneʼígíí tʼááká niʼ kódaołééh lágo hodííniid. Hoosʼįįdgo tʼáá ákǫ́ǫ́ nináádahozhʼniilneʼ. Kin biiʼ sohodizingi yah ajookai, áádóó Jesus baa haneʼígíí baa nidazhdíʼníitą́ą́ʼ. Ákweʼé hastóí ánaazíinii ayóó átʼéego bádahóóchįįd, áádóó Jesus tʼáadoo baa nidahołneʼé dahałní. Ákondi doo nídaaldzidgóó ánídazhdooʼniid: “Diné biláahgo Diyin God tsʼídá bikʼeh” dahoniilʼı̨́.​—Acts 5:28, 29.

Atídahoʼdilʼı̨́įgo tʼóó tséʼádin ádzaa. Jew dineʼé łaʼ íhoołʼaahii Stephen éí God bikʼijįʼ hadziidziih dahałníigo biniinaa hoł nidadzisneʼ. Diné léiʼ Társasdę́ę́ʼ nijigháago Saul joolyéego ákweʼé hwíínááł, háálá hó éí Stephen hoʼdiyoolyééł jiníigo bee lą́ ajisłı̨́ı̨́ʼ. Áádóó Jesus bikééʼ joogáłígíí bidiʼdooltsooł jiníigo Damáskasgóó dashdiiyá. Atiingóó joogáałgo yáʼąąshdę́ę́ʼ hanaagóó łeʼdíídláád, áádóó łaʼ hadzoodzííʼ: “Saul, Saul, haʼátʼíishąʼ biniyé atíshíłʼı̨́?” Adíídláád yę́ę hanááʼ íísdįįd, áko ájíní: “Háishąʼ ánítʼı̨́?” Nátʼą́ą́ʼ áháłní: “Jesus . . . áshtʼı̨́.”​—Acts 9:3-5.

Tááʼ yiską́ą́dóó bikʼijįʼ, Jesus éí íhoołʼaahii Ananáíyas wolyéego Saul ajooʼı̨́ nízhdoodleeł biniyé yichʼįʼ ahóółʼáʼ. Áádóó Saul éí tʼáadoo náhoniyésí Jesus baa nizhdíʼníitą́ą́ʼ. Tʼahádóó Saul éí yilʼaadii Paul bee biʼdóojiʼ, áádóó Christ dayoodláanii áłah nádleehígíí bízhneedlı̨́įgo atah bizhdiiyá.

Jesus bídahoołʼaahii éí God biNahatʼaʼ baa haneʼígíí éí Jew dóó Samériya dineʼé tʼéiyá bee bił nidahojilneʼ ńtʼééʼ. God bá naalʼaʼí łaʼ, Korníílyas bichʼįʼ jitʼı̨́įgo ázhʼdiilyaa, éí yilʼaadii Peter bíká aʼdííłʼaał hodííniid. Korníílyas éí God yidísingo Roman bisiláo jílı̨́ı̨́ ńtʼééʼ. Peter dóó łaʼ bił nijikaigo éí Korníílyas dóó bił dabighanígíí bił nahojisneʼ. Áko Peter tʼáá yájíłtiʼgo, doo Jew dineʼé danilínígíí níłchʼi diyinii bikʼi dahooleʼ. Áádóó Paul ání, díí Jesus bízhiʼ binahjįʼ taah dahodiʼdooʼnił. Áko díí binahjįʼ iiná doo ninítʼiʼii kʼad tʼáá ałtso ałʼąą dineʼé bichʼįʼ ąą ályaa. Christ dayoodlánígíí éí kʼad haneʼ tʼáá náhwiistʼą́ą́ ńtʼééʼ kʼeeʼąą baa náhodoonihgo bá hashtʼehodiidzaa.

​—Naaltsoos Acts wóltaʼii 1:1dóó wóltaʼii 11:21jįʼ biiʼ baa haneʼ.