NAALTSOOS Psalm éí alááh íníłtsogo Diyin Bizaad biiʼ siʼą́, éí sin dadílzinígíí bee hadilyaa. Díí naaltsoos kʼasdą́ą́ʼ 1,000 nááhaijįʼ ahiih hiʼníiłgo ályaa. Éí oodląʼ nayiiłnáago bikʼiniiʼnil. Éí ił hózhǫ́, aa hojiniih, ahééh hwiindzindóó yíníiłjįʼ, cha, áádóó bee hashtʼeʼ nináʼdoodáałii biiʼ baa haneʼ. Sin ádayiilaaígíí éí bééhózínígo God áhánígo yił kʼé daʼahidiʼníigo dayoodlą́ą́ ńtʼééʼ. Díí sin binahjįʼ ádaʼalyaaígíí łaʼ dadíníilʼįįł.

Jiihóvah tʼéiyá óhólnííh bąąh silá, éí bąą bichʼįʼ hodílzin dóó baa haʼniih. Psalm 68:4 ánínígi átʼéego “Diyin God bichʼįʼ dahohtaał; bízhiʼ baa dahohniihgo dahohtaał! . . . Bízhiʼ éí Jiihóvah wolyé.” Jiihóvah ádayiilaaígíí, éí Psalm biiʼ díí bee baa haʼniih. Éí yá biyiʼ sǫʼ eelʼáhígíí, nahasdzáán bikáaʼgi ayóó ádanóolingo ádaalyaaígíí, dóó bílaʼashdlaʼii nizhónígo hadilyaaígíí. (Psalms 8, 19, 139, 148) Jiihóvah éí dabidísinii baa dahaniih, háálá éí yisdá yiinííł dóó yichʼą́ą́h naaghá. (Psalms 18, 97, 138) Áádóó God tʼáá ákogi yee nihoyiiʼaahii nilı̨́įgi, atídabiʼdilʼínígíí yíká análwoʼgi dóó doo yáʼádaashóonii yá nihwiiʼaahgi ałdóʼ binahjįʼ ayóó ájítʼéego ádahósin.​—Psalms 11, 68, 146.

Jiihóvah éí ayóóʼádabóʼnínígíí yíká análwoʼgo bił dahózhǫ́. Psalm 23 éí ayóó bééhoʼdílzin, ákweʼígi David éí Jiihóvah dibé yaa áhályáanii nilı̨́ yił ní. Éí bidibé yá naaghá, yichʼą́ą́h naaghá dóó yaa áhályą́. Psalm 65:2gi éí God dayoodlánígíí díí yééyiyiiłnííh, Jiihóvah éí “Sodizin yidiitsʼaʼii” nilı̨́. Diné ląʼí doo ákǫ́ǫ́ ádaatʼįįdígíí éí Psalms 39 dóó 51gi yéigo bíká análwoʼ. Éí ákweʼé David ajisih yę́ędą́ą́ʼ, hoł bééhózingo éí Jiihóvah kʼé náhodidooʼniiłgo átʼéhígíí binahjįʼ hajéí tłʼááhdę́ę́ʼ jichago níjoozkan. Psalm 55:22gi éí Jiihóvah baʼíínílí dóó bee nide áhootʼéhígíí baa hidíʼaah níigo yee nánihookąąh.

Mesáíyah biNahatʼaʼ bee Jiihóvah łah ánáhodoodlííł. Naaltsoos Psalm biiʼdóó łaʼ hadaasdzooígíí tʼáadoo bahatʼaadí éí Mesáíyah, Naatʼáanii baa chʼíhootʼánę́ę yee nítʼı̨́. Psalm 2gi éí tʼáá bítséedi díí yaa hoolneʼ, éí Mesáíyah Naatʼáanii nilínígíí díí nihookáaʼgi naatʼáanii hakʼijįʼ danilínígíí íidoołdįįł. Áádóó Psalm 72gi díí ííshjání áyiilaa, éí hodichin, doo ákogi átʼéégóó nihodiyiitʼaah, dóó tiʼdaʼiyoołníihii díí naatʼáanii ałdóʼ ałtso íidoołdįįł. Psalm 46:9gi ání, God éí Mesáíyah biNahatʼaʼ bee, anaaʼ dóó bee naʼaltseedii ałtso íidoołdįįł. Psalm 37gi ání, doo yáʼádaashóonii ádooldįįł, tʼáá ákogi ádaatʼéii éí hoolʼáágóó nahasdzáán bikááʼ kéédahatʼı̨́į doo. Tʼáá náhwiistʼą́ą́ ńtʼééʼ kʼé bił hodéesyéelgo hazʼą́ą doo.

​—Naaltsoos Psalm biiʼ baa haneʼ.