DÍÍ ániidígo Oodlání áłah nídaadleehgo niitʼánígíí, éí Jiihóvah yihodeezʼánę́ę bohodooníiłgi kodóó bąą siláa doo. Ndi tʼáá íídą́ą́ʼ doo daʼoodlánígíí, dóó łaʼ bił áłah nídajidleehígíí, tʼáá nahontʼineego haatiih nákahgo yaa nídiikai. Ákoósh God bikʼeh hóʼı̨́įgi tʼáá dajótąʼ doo? Diyin Bizaad Gríikjí ályaaígíí éí kótʼéego haʼníigo nanitinígíí, dóó saad bee haʼahóní bídį hondzingi, 21go bee naaltsoos áchʼįʼ ályaa.

Yilʼaadii Paul éí 14go naaltsoos achʼįʼ ádayiilaa, éí Roman wolyéhígíí dóó Hebrewjįʼ naaltsoos sinilígíí. Áłah nídaʼadleehígíí doodaiiʼ tʼáá nizhdiltʼéhégo, Paul yichʼįʼ ádaʼiilaaígíí éí díí naaltsoos bee dabiʼdéejiʼ. Paul naaltsoos ádayiilaaígíí biiʼdóó haneʼ łaʼ dadíníilʼįįł.

Yáʼátʼéehgo oodáałgi bee naʼnitin. Naʼageh bee tsiʼdajíkáahii, dazhdiléii, dóó bąąhági ádaatʼéii baa jookahígíí éí Diyin God biNahatʼaʼ “łáʼí ndi doo hóóʼ dadooleeł da.” (Galatians 5:19-21; 1 Corinthians 6:9-11) God yichʼįʼ dahodísinii éí, azhą́ shı̨́ı̨́ ałʼąą dineʼé dajílı̨́į ndi, kʼé bee daʼahijótąʼ doo. (Romans 2:11; Ephesians 4:1-6) Bił oodlání dajílínígíí baa hoł dahózhǫ́ǫgo yiʼoh danilínígíí bee bíká anídajijah doo. (2 Corinthians 9:7) Paul éí, “tʼáá áłahjįʼ sodadołzin,” nihił ní. Oodlání éí ádabidiʼní, Jiihóvah nihijéí tłʼááhdę́ę́ʼ bichʼįʼ sodadołzin. (1 Thessalonians 5:17; 2 Thessalonians 3:1; Philippians 4:6, 7) Sodizin God yididootsʼı̨́įłgo éí bíká sozdilzinígíí tʼáá aaníí joodlą́ą doo.​—Hebrews 11:6.

Hooghan hazʼą́ągi haʼátʼíísh bee yáʼátʼéehgo hazʼą́ą doo? Ahastiin tʼáá bí bitsʼíís ayóóʼádayóʼnínígi átʼéego beʼasdzą́ą́ ayóóʼádayóʼníi doo. Eʼasdzą́ą́ jílíinii hahastiin hoł nilı̨́į doo. Áłchíní danohłíinii nihizhéʼé dóó nihimá bikʼeh dahonołʼı̨́, háálá díí éí God baa bił hózhǫ́. Diyin Bizaad kʼehgo oodáałii bee azhéʼé dóó amá ayóóʼóʼóoʼniʼ bee, baʼáłchíní kótʼéego yił níigo yee neinitin doo.​—Ephesians 5:22-6:4; Colossians 3:18-21.

God yihodeezʼánę́ę éí Oodlání hazhóʼó yikʼidaʼdiitą́. Ląʼígo Bee Hazʼáanii Mózes baa deetʼánę́ę, éí Ízrel dineʼé Jesus níyáajįʼ yiyaa sinil ńtʼééʼ. (Galatians 3:24). Ákondi Oodlání dajílínígíí éí God bá nidajilʼaʼgi, díí Bee Hazʼáanii yę́ę doo biyaa jiznil da. Paul éí Hííbrew yichʼįʼ íʼiilaa, éí Jew dineʼé oodlání daazlı̨́ʼígíí ádaatʼı̨́. Éí ląʼígo Bee Hazʼáanii bikʼiʼdidootı̨́įłgi, dóó God yihodeezʼánę́ę éí Jesus bee bohoolyaagi yił ííshjání áyiilaa. Paul áníigo éí díí Bee Hazʼáanii bikʼehgo ádaʼalʼínę́ę łaʼ ałkééʼ danínilígíí, éí náasdi ádahodooníłígíí bichahaʼoh átʼé. Ákótʼéego  łaʼ, naaldlooshii náádahaniih yę́ęgi, Jesus nááʼádiisʼniiʼígíí bił ahenáłtʼé. Áko éí Jesus nááʼádiisʼniiʼígíí binahjįʼ niʼiidzíihii ałtso nihá yóóʼádahididootʼááł. (Hebrews 10:1-4). Jesus daaztsánígíí binahjįʼ, God éí díí Bee Hazʼáanii yę́ę niiníłtʼiʼ. Háálá díí éí doo ílı̨́į da silı̨́ı̨́ʼ.​—Colossians 2:13-17; Hebrews 8:13.

Oodlání áłah nádleehígíí hazhóʼó bikʼi adéestʼı̨́ı̨́ʼ. Áłah náʼádleeh binaʼanishgi hastóí łaʼ bíneeshʼą́ danízinígíí éí yáʼátʼéehgo joogáłígíí, dóó Diyin Bizaad bikʼehgo ájítʼéhígíí tʼéiyá há ahóótʼiʼ doo. (1 Timothy 3:1-10, 12, 13; Titus 1:5-9) Oodlání éí ałhee hadaʼjódlíi doo biniyé tʼáá ahą́ą́h áłah níjídleeh doo. (Hebrews 10:24, 25) Dahodíníilzin biniyé áłah néiidleehígíí éí danihidziil, dóó hazhóʼó nidanihiʼdinitingo ánáʼálʼįįh doo.​—1 Corinthians 14:26, 31.

Paul éí haa hwiidínóotʼįįł biniyé Romedi awáalyahgi jizdáago Timothy, naaltsoos naaki góneʼígíí bichʼįʼ áʼjiilaa. Áko tʼáá díkwííhí yeeʼ doo nídaaldzidgóó haa nídaakah ńtʼééʼ. Paul éí hodiʼniilyı̨́įgo hoł bééhózingo ájíní, “ałtso yiishteeʼ, naʼnitin woodláanii tsʼídá tʼáá ákótʼéego íínísingo ahoolzhiizh.” (2 Timothy 4:7) Bééhózingo éí tʼáadoo hodinaʼí díí bikéédóó hweʼoodlą́ biniinaa hoʼdiisyı̨́. Ákótʼéii ndi díísh jı̨́įdi God deidísinígíí díí yilʼaadii Paul naaltsoos ádayiilaa yę́ę yikʼeh deiyíkááh.

​—Naaltsoos Romans; 1 Corinthians; 2 Corinthians; Galatians; Ephesians; Philippians; Colossians; 1 Thessalonians; 2 Thessalonians; 1 Timothy; 2 Timothy; Titus; Philemon; Hebrews biiʼ baa haneʼ.