Jiihóvah éí Sámuel áyidííniid: ‘Jésii bighangóó dínááh. Jésii biyeʼ łaʼ Ízrel binaatʼáanii dooleeł.’ Ákǫ́ǫ́ jiníyáago, alą́ąjįʼ naagháhígíí jiiłtsą́ągo: ‘Díí dinééh shı̨́ı̨́ naatʼáanii dooleeł.’ jiniizı̨́ı̨́ʼ. Ńtʼééʼ Jiihóvah éí díí dooda hałní. Ákondi ‘diné ánoolninígíí doo bee néshʼı̨́į da, ndi bijéí bee haasííd.’

Jésii éí hastą́ągo biyeʼké Sámuel yeiníʼeezh. Áádóó Sámuel Jésii ííłní: ‘Díí Jiihóvah doo łaʼ néiidiiłtı̨́į da. Tʼáásh díí tʼéí niyeʼké?’ Jésii ájíní: ‘Tʼááłaʼí yidziih, akéédę́ę́ʼ naagháhígíí David. Éí shidibé yaa áhályą́.’ David yah ííyáago, Jiihóvah Sámuel ííłní: ‘Díí nidiiłtı̨́!’. Ízrel binaatʼáanii jidooleeł biniyé Sámuel éí David bitsiiʼ bikáaʼgi akʼah yayiiziid.

Tʼahádóó Ízrel dineʼé éí Filístiya dineʼé bił daʼahijigą́. Filístiya dineʼé łaʼ ayóó átʼéego naabaahii nilı̨́įgo Goláíyath wolyé. Éí tʼáá ákwíí jįʼ Ízrel dineʼé yíheedáahgo yéʼátsʼih. Dilwoshgo ání: ‘Bił ahideeshgą́łígíí shichʼı̨́ʼ chʼídoogááł, éí shikʼeh deesdlı̨́įʼgo nihinaalteʼ daniidlı̨́į doo. Nihikʼeh déshdlı̨́įʼgo éí nihinaalteʼ danohłı̨́į doo.’

Ízrel bisiláo dah yinéłígi David éí bínaaíké chʼiyáán yá yiníjaaʼ. Goláíyath ánínę́ę yidiiztsʼą́ąʼgo David ání: ‘Shí bił ahideeshgą́ą́ł!’. Ndi Saul éí David ííłní:  ‘Tʼahdii yeeʼ ashkii nílı̨́.’ David hanáádzíiʼgo ání: ‘Jiihóvah shíká adoolwoł.’

Saul éí David siláo biʼééʼ yee haidiilaa. David ání: ‘Díí ééʼ ayóó áníłdáás.’ Sling nízhdiiláago tó nílı̨́ı̨́dę́ę́ʼ tsé dadilkǫǫhii ashdlaʼgo nízhdiinilgo hweʼazis biih jíínil. Goláíyath bichʼįʼ joolwodgo áháłní: ‘Ashkii yázhí hágo, tsídii wódahgo nidaatʼaʼígíí áádóó naaldlooshii daʼałchinii bichʼįʼ nitsʼíís ahideeshxą́ą́ł.’ David doo honáldzidgóó dilwoshgo ání: ‘Ni diltłish dóó nitsiidétáán bee shichʼįʼ híídááł. Shí éí Jiihóvah bízhiʼ bee nichʼįʼ heeshdááł. Éí íiyisíí bił ahigą́, nihí éí dooda. Díí diné yaa ákodadínóozįįł, Jiihóvah éí diltłish dóó tsiidétáán biláahgo ayóó ábóodziil, áko nihikʼeh dah didíídleeł.’

David éí sling tsé biih jííʼą́ągo wołí bee jismasgo bee ajíítłʼin. Jiihóvah háká eelwodgo Goláíyath bitááʼ góneʼ tsé eelwod. Ayóó ájítʼé yę́ę niʼjįʼ ajíítłizhgo dajiztsą́. Filístiya bisiláo nídaasdzíidgo yóóʼííjééʼ. David nahalingo, Jiihóvaásh baʼíínílí?