BÍHWIIDOOʼÁŁÍGÍÍ 5
God Haʼátʼíí Biniyé Nahasdzáán Áyiilaa?
1. God haʼátʼíí biniyé nahasdzáán áyiilaa?
Jiihóvah éí bílaʼashdlaʼii nahasdzáán yee nílá, ákweʼé danihighan. Ádam dóó Íiv, doo yáʼąąshdi haʼáłchíní bił kʼeeʼąą jidinóotʼı̨́ı̨́ł biniyé áhoʼdiilyaa da—God bándaalʼaʼí éí tʼááʼíídą́ą́ʼ yáʼąąshdi dabighango ádabiʼdilyaa. (Job 38:4, 7) God éí áłtsé hastiin dáʼákʼeh Ííden hoolyéegi baa hózhǫ́ǫgo ayóí áhonóolin ńtʼééʼgi nizhníłtı̨́. (Genesis 2:15-17) Áko Jiihóvah éí Ádam dóó haʼáłchíní bił kʼeeʼąą nídazhdínóotʼı̨́ı̨́łgo hoolʼáágóó iiná baa hózhǫ́ǫgo há bodahónéedzą́ągo hainílá.—Psalm 37:29; 115:16 yííníłtaʼ.
Átséedi, dáʼákʼeh Íídengi tʼéiyá ayóí áhonóolin ńtʼééʼ. Áłtsé hastiin dóó asdzání yę́ę haʼáłchíní bił kʼeeʼąą nídazhdínóotʼı̨́ı̨́ł ńtʼééʼ. Náás hoolzhishgo, nahasdzáán tʼáá siʼą́ą́ ńtʼééʼ baa ádahojilyą́ągo ayóí áhonóolingo ádazhdoolííł ńtʼééʼ. (Genesis 1:28) Nahasdzáán éí doo ádooldįįł da, díí éí bílaʼashdlaʼii hoolʼáágóó dabighan.—Psalm 104:5 yííníłtaʼ.
Video God Haʼátʼíísh Biniyé Nahasdzáán Haidiilaa? bee naniné.
2. Nahasdzáánshąʼ haʼátʼíí biniinaa kʼad doo ayóí áhonóolin da?
Ádam dóó Íiv God doo yikʼeh hółʼįįdgóó biniinaa dáʼákʼehdę́ę́ʼ Jiihóvah chʼíhoníłchą́ą́ʼ. Kéyah ayóí áhonóolinée yóóʼeldéél, áko tʼáá átʼéhę́ęgi átʼéego tʼahdoo łaʼ ánéídléeh da. Diyin God Bizaad ání, “Nahasdzáán éí diné doo yáʼádaashóonii baa deetʼą́.”—Job 9:24.—Genesis 3:23, 24 yííníłtaʼ.
Jiihóvahísh bílaʼashdlaʼii átséedi yá hodeezʼánée tʼóó yóóʼiidííʼą́? Ndagaʼ! Bí éí ayóó ábóodziil, áko tʼáadoo yiʼoh nilíní da. (Isaiah 45:18) Bílaʼashdlaʼii tʼáá átséedi yáhodeezʼánéegi átʼéego ánéidoodlííł.—Psalm 37:11, 34 yííníłtaʼ.
3. Haash yitʼéego ayóí áhonóolinée ánídoolnííł?
Jesus éí God biNaatʼáanii jílı̨́įgo, ayóí áhonóolinée ánéedoodlííł nahasdzáán bikáaʼgi. Anaaʼ Armagédan wolyéhígíí Jesus God bá nidaalʼaʼí yooʼishgo tʼááʼałtso God yikʼijįʼ danilínígíí íidoołdįįł. Áádóó Jesus éí Séítan 1,000 nááhaijįʼ aʼáán góyaa dah yidootłʼóół. Jesus éí God bidineʼé yooʼishgo yaa áhályą́ągo éí díí anaaʼ biiʼdę́ę́ʼ yisdéidooʼish. Áko éí díí nahasdzáán bikáaʼgi ayóí áhonóolingo hoolʼáágóó iiná yee nídaʼdooldįįł.—Revelation 20:1-3; 21:3, 4 yííníłtaʼ.
4. Tiʼhooʼnííhshąʼ éí hahgo nidootʼih?
Hahgoshąʼ God nahasdzáán bikáaʼgi doo yáʼáhooshxónígíí niidoołtʼih? Nihodoogááł bichʼįʼ hoolzhish “bee bééhózin” dooígíí Jesus yee nihił hoolneʼ. Kʼad yoołkáłígíí éí bílaʼashdlaʼii doo yisdádookahgóó yiiʼaʼ, áko díí nihił hoogááłígíí bee bééhózingo nihoolzhíishjįʼ ayííłką́.—Matthew 24:7-14, 21, 22 yííníłtaʼ.
Jesus yáʼąąshdę́ę́ʼ 1,000 nááhaijįʼ nahasdzáán yikʼi hooʼáałgo tʼááʼałtso tiʼhooʼnííhígíí niidoołtʼih. (Isaiah 9:6, 7; 11:9) Naatʼáanii jílı̨́ dóó Aláahgo Nááʼiiłniihii ałdóʼ jílı̨́įgo God ayóíʼádeeyóʼnínígíí nidaʼjiisííʼígíí há kʼéeyiʼdoołchxǫǫł. Áko Jesus binahjįʼ God díí ąąh dahazʼą́, są́, dóó anoonééł íidoołdįįł.—Isaiah 25:8; 33:24 yííníłtaʼ.
5. Háí éí náasdi nahasdzáán ayóí áhonóolingo kéédahatʼı̨́į doo?
Kingdom Hallgi God ayóíʼádeeyóʼnínígíí dóó haitʼéego God bił hózhǫ́ǫgo ádeeshłííł danízinígíí bił ahéédahodíilzįįł
Diné God bikʼeh ádajooníłígíí tʼéiyá nahasdzáán ayóí áhonóolingo kéédahojitʼı̨́į doo. (1 John 2:17) Jesus bikééʼ naakai yę́ę ayiisʼaʼ, aʼohgo ádaatʼéhígíí hadanotá áádóó díí bee nidanohtin, haitʼéego God bił tʼáá ákohígíí dazhdooleeł. Dííshjı̨́įdi, Jiihóvah díkwííshı̨́ı̨́ mííl diné ánéelą́ą́ʼgo neenitingo hashtʼeilééh, éí náasdi nahasdzáán bikáaʼgi ayóí áhonóolingo dajiináa doo biniyé. (Zephaniah 2:3) Ahastiin dóó azhéʼé áádóó eʼasdzą́ą́ dóó amá yáʼátʼéehgo ídlı̨́į dooígi Jiihóvah Yá Dahalneʼé biKingdom Hallgi yídahoołʼaah. Amá dóó azhéʼé baʼáłchíní bił ahóoltąʼgo ałhiijįʼ beʼoodląʼ deedísin, dóó haitʼéego nizhónígo haneʼígíí bitsʼą́ą́dóó bíkáʼadoolwołgo yídahoołʼaah.—Micah 4:1-4 yííníłtaʼ.
