Kʼad tʼáadoo leʼé doo yáʼádaatʼéehii nihokááʼ ádahooníłígíí nihił ííshją́ą́ ííłʼı̨́, éí Kéyah Tʼáadoo Bee Honóoshóní koshídę́ę́ʼ bił hoolzhish. Diyin Bizaad ání, Kéyah Tʼáadoo Bee Honóoshóní tsʼídá kʼadę́ę baa hoolzhííshgo, díí tʼáadoo leʼé tʼóó bikʼee áyééʼii deidiiltsééł. Kʼad éí ákótʼéego yoołkááłígíí biiʼ dahiniiʼná! Kǫ́ǫ́ łaʼ tʼáado leʼé ádahodooníłígíí Diyin Bizaad yaa hadzííʼ:

Aláahdi daʼanaaʼígíí. “Háálá ałʼąą dadineʼé ałchʼįʼ ńdahidiibáah doo, áádóó łahgo nihookááʼ bee bóhólníihgo bił hazʼáanii índa náánáłaʼ nihookááʼ bee bínááhólníihgo bił nááhástʼáanii yił ałchʼįʼ ńdahidiibáah dooleeł.” (Matthew 24:7) Díí áhodoonííł baa hóóneʼ yę́ę tʼááʼaaníí silı̨́ı̨́ʼ. 1914 nááhai doo wóshdę́ę́ʼ, naakidi kéyah tʼáá siʼą́ą́ ńtʼę́ę́ʼ ałchʼįʼ ndaʼazbaaʼ dóó tʼóóʼahayóí tʼáá achʼįʼ ádaníłtsogo ndaʼazbaaʼ. Mííltsoh ánéelą́ą́ʼ diné daneezná.

Tʼáá níłteel ńtʼę́ę́ʼ ąąh dah hayoołʼaahii. Díí éí tʼááłaʼ ałyóígóó “ndahałniih [naałniih] doo.” (Luke 21:11) Díísh tʼááʼaaníí ákódza? Aooʼ. Atsʼíís naałdzid, ajéí bą́ą́h dah hayoołʼaahii, jéíʼádįįhii, atsʼíís yichʼą naabaah bąąh dahoyoołʼaałii (AIDS), dóó náánáłaʼ ąąh dah hayoołʼaahii, mííltsoh ánéelą́ą́ʼ diné neistsʼeed.

Chʼiyáán bídin hóyééʼ. Nihookááʼgi tʼááʼałtsogóó díí diné chʼiyáán doodı̨́ı̨́ł bitsʼą́ą́ʼ biʼohígíí dahólǫ́. Tʼáá nináháhááh bikʼeh mííltsoh ánéelą́ą́ʼgo diné dichin yiʼkee noonééł. Díí éí náánáłaʼ bee bééhozin Kéyah Tʼáadoo Bee Honóoshóni koshídę́ę́ʼ bił hoolzhishígíí. Diyin Bizaad ání: ‘Dahodichin dooleeł.’—Mark 13:8.

 Niʼ ńdahidiʼnáh. “Índa łahgo . . . niʼ ńdahidiʼńaah doo.” (Matthew 24:7) Díí kʼad nihił hoolzhishígíí ałdóʼ tááʼaaníí ákóhodza. 1914 nááhai doo wóshdę́ę́ʼ, díí niʼ ńdahidiʼnáahii tʼááłáhádi mííl ntsaaígíí doo biʼaan anéelą́ą́ʼ diné neistsʼeed.

Diné doo yáʼáshxóonii. Diné “béeso yíchą́deídéelniʼ doo” dóó “ayóóʼádadóʼníi doo.” Éí “God ayóóʼádayóʼníi doo yę́ęgi honeenida yichą́dayídéelniʼ doo.” Áłchíní “bishchíinii doo yikʼeh dahółʼı̨́į da doo.” (2 Timothy 3:​1-5) Niísh ałdóʼ nił tʼááʼaaníí dííshjı̨́įdi tʼóóʼahayóí diné ákó daatʼéhígíí? Tsʼídá God doo yaa dastʼiʼ da, dóó háíshı̨́ı̨́ God yaa ídahoołʼaah nayídanitaahígíí yichʼı̨́ʼ ndahwiiłʼná.

Bąąhágiʼátʼéii. “Bąąhágiʼátʼéii kʼeeʼąą deeshzhiizhígíí” ałdóʼ holǫ́ǫ doo. (Matthew 24:12) Tʼááʼałdįį shı̨́ı̨́ díí bee akééʼ nidíínááł, éí bąąhágiʼátʼéii tʼáá nah yihah dę́ę́ʼ tʼóó tséʼédin áánííł. Tʼááʼałtsogóó diné aghaʼílyé, iʼdidleeh, doodaiiʼ atíʼílʼı̨́, tʼóó bá baa hastiʼ.

Díí tʼááʼałtso ádahooníłígíí nihił ííshją́ą́ ííłʼı̨́, God Binahatʼaʼ bił Hazʼáanii koshídę́ę́ʼ bił hoolzhish. Diyin Bizaad ání: “Nihí ałdóʼ díidíígíí bidahoolníiłgo danółʼı̨́įgo Diyin God bee bóhólníihgo bił hazʼáanii tʼááʼáyídídę́ę́ʼ bił nihoolzhiizhgo nihił béédahodoozįįł.” (Luke 21:31) Haʼátʼíísh átʼé God Binahatʼaʼ bił Hazʼáanii? Díí éí God yaʼąąsh dę́ę́ʼ bohotʼááł átʼé, éí nihookááʼ tʼáá siʼą́ą́ ńtʼę́ę́ʼ Kéyah Tʼáadoo Bee Honóoshóní íidoolííł. Tʼááʼałtso bílaʼashdlaʼii binahatʼaʼ bitsáskʼehjįʼ éí God Binahatʼaʼ bił Hazʼáanii hólǫ́ǫ doo.—Daniel 2:44.