Jiihóvah éí hoghan hazʼą́ągi tʼóó haidiilaa yę́ędą́ą́ʼ éí amá dóó azhéʼé baʼáłchíní yaa áhályą́ą doogi yąąh niinílá. (Colossians 3:20) Jiihóvah ayóóʼáyóʼníi doo áádóó neeyą́ągo hóyą́ dooleeł biniyé neʼawééʼ nanítin. Díí naanish éí amá dóó azhéʼé bąąh niilyá. (2 Timothy 1:5; 3:15) Neʼawééʼ bijéí biiʼ hólónígíí nił bééhoyoozįįh. Tʼáá ni binááł ááníiłgi éí íiyisí bee naʼnítingo átʼé. Ni áłtsé Jiihóvah Bizaad ádiihíʼníiłgo tʼéiyá neʼawééʼ nizhónígo Jiihóvah bee ndíníitı̨́ı̨́ł.​—Psalm 40:8.

DIYIN BIZAAD KÓNÍ: “Hazhóʼó ajíistsʼą́ąʼ doo, nidi tąądee háádziidziih doo,” doodaiiʼ hazhóʼó nitsáháskéezgo haʼiidziih doo. (James 1:19) Naʼáłchíní tʼáá ałtsoní yee nichʼįʼ yáłtiʼgo bá íínísin. Naʼáłchíní łaʼ nichʼįʼ hadeesdzih niizįįhgo, tʼáá ákǫ́ǫ́ yídííłtsʼįįłgo bił bééhózingo íínísin. Tʼáá ałtsoní neʼ kódíílííł, áko doo bá nanitłʼagóó biʼdiiłʼáhígíí yee nichʼįʼ hadoozih. (James 3:18) Tʼáá naʼníleʼdii doodaiiʼ tʼóó shikʼíhodootʼahda nízingo éí biʼdiiłʼáhígíí doo yee nichʼįʼ hadoodzih da. Naʼáłchíní baa áhólyą́ągi haʼíínílní dóó ayóóʼííníʼnínígíí tʼáá ahą́ą́h bił ííshjání íníłʼį.​—Matthew 3:17; 1 Corinthians 8:1.

DÍÍ BIKʼEH ÁDÍÍNÍÍŁ:

• Naʼáłchíní nichʼįʼ hadeesdzih niizįįhgo tʼáá ákǫ́ǫ́ bá náhoołʼaah

• Naʼáłchíní tʼáá ahą́ą́h bił ałchʼįʼ yáníłtiʼ, doo éí bichʼįʼ hodiiʼnáahgo índa bił ałchʼįʼ yáʼátiʼ da

DIYIN BIZAAD KÓNÍ: “Tʼáá háiida hóyą́ągo hazhóʼó saad yiyíistsʼą́ąʼii yáʼátʼéehii yikʼídoogááł.” (Proverbs 16:20) Naʼáłchíní łaʼ yáłtiʼgo łahda tsʼídá íiyisí yaah bíniʼígíí hazhóʼó bíká ájíistsʼą́ąʼgo tʼéiyá bikʼizhdiʼdootı̨́ı̨́ł. Nooséłí danilínígíí éí tʼáadoo leʼé tʼáá yilááhídi yaa adahoʼniilnih, doodaiiʼ tʼáadoo ádadidooniił yę́ę yee hadaadzih. “Diné haʼátʼíhída tʼáadoo hazhóʼó yidiitsʼı̨́hí, Kótʼéego lá átʼée ni, níinii éí doo áháyąʼ átʼé.” (Proverbs 18:13) Áko díí biniinaa tʼáadoo tʼóó nánáháchįįhí.​—Proverbs 19:11.

DÍÍ BIKʼEH ÁDÍÍNÍÍŁ:

• Neʼawééʼ haʼátʼííshı̨́ı̨́ yee nił ahoʼniilneʼgo bíniʼdii yáłtiʼ, tʼóó bikʼee náhóchįįh lágo

• Ni ákwii naníseʼ yę́ędą́ą́ʼ béénílniihgo, haʼátʼíí lá nił ílı̨́įgo baa nitsíníkees ńtʼééʼ

DIYIN BIZAAD KÓNÍ: “Shiyeʼ nizhéʼé binaʼnitin yísíníłtsʼą́ą́ʼ áádóó nimá yee nanintinii yóóʼadóóʼááł lágo.” (Proverbs 1:8) Tʼáá áłah azhéʼé dóó amá éí haʼáłchíní bikʼi hóhólníih dooígi éí Jiihóvah hąąh niinílá. Naʼáłchíní naa yistiʼ dóó nikʼeh hółʼı̨́į dooígi bee nanítin. (Ephesians 6:1-3) Azhéʼé dóó amá doo ‘tʼááłáʼí góneʼ nitsíkeesgo’ éí áłchíní yaa ákonízingo átʼé. (1 Corinthians 1:10) Tʼáadoo leʼé doo aheełtʼéego baa nitsóhkeesgo, nihaʼáłchíní binááł tʼáadoo biniinaa ałghaʼdohtʼáhí. Háálá binááł ákóhtʼı̨́įgo éí bizhéʼé dóó bimá nohłı̨́įgi doo bił nilı̨́ı̨́góó ádoohłííł.

DÍÍ BIKʼEH ÁDÍÍNÍÍŁ:

• Nihaʼáłchíní hashkée bił naʼnitinígíí ádohłíiłgi baa náhtʼı̨́įgo bee ałghaʼdidoohtʼááł

• Áłchíní nanitingi ałʼąą átʼéego baa nitsóhkeesgo, nichʼooní yaa nitsíkeesígíí hazhóʼó bá baa ákonínízin

DIYIN BIZAAD KÓNÍ: “Áłchíní hináa dooleeł góneʼ bínabiníłtin.” (Proverbs 22:6) Naʼáłchíní yáʼátʼéehgo nidínóohtı̨́įłgi, éí binahatʼáago tʼéiyá ádoonííł. Naʼnitin binahatʼaʼ hólǫ́ǫgo yáʼátʼééh, éí hashkée bił naʼnitinígíí bóóltąʼgo ádoohłííł. (Psalm 127:4; Proverbs 29:17) Hashkée bił naʼnitinígíí éí díí ałdóʼ áhyiłní, bee hosíníłʼánígíí naʼáłchíní yikʼidaʼdidootı̨́įłgi bee nanítin. (Proverbs 28:7) Áádóó, Jiihóvah Bizaad dóó binahjįʼ bee naʼnitinígíí hazhóʼó yikʼiʼdiyiitįįhgo ayóóʼáyóʼníi doo biniyé ałdóʼ bee nabinítin. (Psalm 1:2) Áko éí nitsíkeesgi yáʼátʼéehgo íidoolííł.​—Hebrews 5:14.

DÍÍ BIKʼEH ÁDÍÍNÍÍŁ:

• Naʼáłchíní éí God tʼáá aanii hólónígíí deidoodląąłgi bee bíká adíílwoł, áko éí yadaʼólíi doo

• Badaaʼihii ádaatʼéii yaa ákódanízin dóó yitsʼąą kódaatʼéii dooígi naʼáłchíní bee bíká anánílwoʼ. Łaʼ éí Internet dóó social networks deiiłnínígíí dabiyiʼ. Ashtéezh yíká deiyídéelneʼígíí yéigo yitsʼąą ádaa áhályą́ą dooígi naʼáłchíní bee nabinítin