PART THREE
Haní Yeeʼáʼ—“Łaʼda Bichʼįʼ Saad Dahosoołı̨́įʼgo”
“Łaʼ oodlání bił yah anááshjahígíí, béeso shee níníʼı̨́ı̨́ʼ shidííniid, tʼáá ádzaago shikʼi hodiiʼą́. Łaʼ bił áłah nídeidleehígíí yaa dahodiiztsʼą́ą́ʼ áádóó ałtsʼą́ą́jí daazlı̨́ı̨́ʼ. Áko ńtʼééʼ shikʼi hodiiʼáanii shił nááhóoneʼgo doo ákótʼéego nikʼi hodiiʼáá lá shidííniid. Shichʼįʼ kʼé nízhdooʼniid nidi, áshijííłʼįįdígíí biniinaa shijéí biyiʼdóó doo baa nidideeshʼááł da niizı̨́ı̨́ʼ.”—Linda.
LINDA bikʼí hástʼahígíísh bá baa ákonínízin hakʼis łaʼ hakʼi hodiiʼáaníí biniinaa tiʼhojoozniiʼ? Díí ákóhootʼįįhgo, łaʼda ayóó yikʼee yínííł yileeh biniinaa diyin kʼehgo oodááł yę́ę yinííłtłʼah. Niísh łaʼda ákwii akíniʼdiilyaa?
Tʼáá Háiida Daatsʼí ‘Diyin God Yee Ayóóʼánihóʼníinii . . . Yitsʼánihidoonił’?
Christ Yidaʼałíinii éí ayóóʼádaʼahóʼní. (John 13:34, 35) Áko baa ákoniidzingo bił áłah nídeidleehígíí łaʼda doo ákǫ́ǫ́ ánihííłʼįįdígíí biniinaa nihá nanitłʼah łeh. Łaʼda bił áłah nídeidleehígíí áko hołʼı̨́įgo tʼóó hąąh náháłkaʼ dóó hajéí diniihgo áhoołʼįįh.—Psalm 55:12.
Jó, Diyin Bizaad ání, oodlání danilíinii łaʼda tʼáá haʼátʼíí da biniinaa “saad” haleeh. (Colossians 3:13) Áko kótʼéego nihił hooʼaahgo ayóó nanitłʼah yileeh. Nihíká adoolwołígíísh łaʼ hólǫ́? Diyin Bizaad bikʼehgo oodááłígíí táaʼgo dadíníilʼįįł:
Nihi Taaʼ yáʼąąshdi hólónígíí éí tʼáá ałtsoní yaa ákonínízin. Jiihóvah éí tʼáá ałtsoní haisííd, dóó tʼáá ałtsoní bee nihichʼįʼ nidahwiiʼnánígíí yooʼı̨́. (Hebrews 4:13) Áádóó ałdóʼ, nihíchʼįʼ nahwiiʼnáago Jiihóvah yaa ákonízin. (Isaiah 63:9) Jiihóvah éí achʼįʼ nahwiiʼná dóó atéʼélʼı̨́ ádaatʼéii doo yee hasʼą́ą da—náánáłaʼ bá nidaalʼaʼí—ndi “Diyin God yee ayóóʼánihóʼníinii . . . yitsʼánihidooniłgi doo yídaneelʼą́ą da.” (Romans 8:35, 38, 39) Nihí ałdóʼ tʼáá ákótʼéego baa nitsíikeesgo, Jiihóvah bił kʼé ahidiiʼnínígíí biniinaa tʼáá háiida doo ałtsʼá nihidoonił da.
Doo akǫ́ǫ́ ániilaaígíí bá yóóʼadahidiitʼaah ndi bąąhági átʼéii doo tʼóó bá hosiilʼą́ą da. Háiida doo ákǫ́ǫ́ ánihiilaaígíí bá yóóʼadahidiitʼaahgo éí bąąhági ádaatʼéii doo tʼóó bá hosiilʼą́ą da doo. Béénílniih, Jiihóvah éí bąąhági ádaatʼéii doo yee hasʼą́ da. Ákondi, binahjiʼ kʼé náhodoodleełígíí hólǫ́ǫgo éí Jiihóvah nihaa néiidiyiiʼaah. (Psalm 103:12, 13; Habakkuk 1:13) Jiihóvah éí náánáłaʼ diné nihichʼįʼ doo ákǫ́ǫ́ ádáátʼįįdii bá yóóʼadahidohʼaah nihóʼní shidaʼołʼį nihił ní ákódaatʼı̨́įgo éí bidaʼołʼı̨́. Bí éí “doo hoolʼáágóó báháchįʼ da doo.”—Psalm 103:9; Matthew 6:14.
Akʼijįʼ ídlı̨́ nahjįʼ kódíílíiłgo ná yáʼátʼééh doo. Haitʼéego? Díí binahjįʼ baa nitsíníkees. Tsé tʼáá díkwííshı̨́ı̨́ dah daʼdiidlohgo áádóó bił kʼídínilníihgo tsé dah yiʼááłgo tʼóó kónígháníjįʼ éí doo nantłʼa da. Haash nízaajįʼ dah yiʼááł doo —díkwíidi da alzhinjįʼ? . . . tʼááłáʼí ahééʼilkid jįʼ daatsʼí? . . . doodaiiʼ biláahgo daatsʼí? Ndi tʼáá bééhózin nigaan chʼééh dadinoogááł! Tsé éí tʼááłáʼígíí nidaaz ndi nízaadgóó dah yiʼááłgo éí nidaaz nahalin dooleeł. Háida bichʼįʼ doo ákójítʼéego ałdóʼ tʼáá ákótʼé. Doo nizaadgo diné bichʼįʼ haadajítʼééh da doo—éí tʼáadoo biniyéhí da—tʼáá éí biniinaa hatsʼíís yichʼįʼ hodiyiiłná. Éí biniinaa Jiihóvah éí doo ákóniitʼééhígíí yóó adahidohʼaah nihił ní. Áko ná yáʼátʼééh doo.—Proverbs 11:17.
Ádahachįʼ ni kódíílííłgo nihá yáʼátʼééh
“Jiihóvah Tʼáá Bí Shichʼįʼ Yáłtiʼ Lá Niizı̨́ı̨́ʼ”
Linda lá haʼátʼíí bíká eelwodgo oodlání yichʼįʼ báháchįʼ yę́ę nahjįʼ kóyiilaa? Diyin Bizaad yółtaʼgo dóó yéego yaa nitsíkeesgo, éí binahjįʼ yaa neidiníʼą́. (Psalm 130: 3, 4) Linda éí díí yaa ákoniizı̨́ı̨́ʼ, bąąhági ádaaníiłii bá yóóʼadahidiitʼaah áko Jiihóvah éí nihibąąhági átʼéii ałdóʼ nihá yóóʼiidííʼą́ą doo. (Ephesians 4:32–5:2) Díí yaa nitsíkeesgo Linda ázhdííniid: “Jiihóvah tʼáá shí shichʼįʼ yáłtiʼ lá niizı̨́ı̨́.”
Haashı̨́ı̨́ nízaadgóó nihoolzhísh áadi índída, Linda biniinaa háháchįʼ yę́ę yóóʼazhdííʼą́. Hakʼi hazʼą́ yę́ę bił kʼé náʼahizhdooʼniid áádóó kʼad éí tʼáá íiyisí hadeezhí nilı̨́įgo baa nitsíjíkees. Kʼad éí Linda dóó biníłtłʼagóó Jiihóvah bá nináájílʼaʼ. Ní ałdóʼ Jiihóvah tʼáá ákótʼéego níká adeeshwoł nóʼní.
