PART ONE
“Yóóʼádahaaskaii Hadínéeshtaał”
Dibé yázhí yóóʼííyáago tʼóó bitah hoditłidgo hááhgóóshı̨́ı̨́ yícha. Dibé yázhí tʼóó naʼałchozh ńtʼééʼ, dibé tʼáá átʼé baa diikai lá, haashı̨́ı̨́ yitʼéego dibé yił naakai yę́ę yitsʼá níyá. Áko náánáłaʼ dibé doo yooʼı̨́į da, baa áhályáanii ndi doo yooʼı̨́į da. Ńtʼééʼ chahóółhéél, mąʼii nikʼidadiijééʼ, áko dibé yázhí tʼáadoo baa áhóolyaʼígóó biniinaa tʼóó yicha. Áádóó hodíínááʼígo índída dibé yázhí naʼniłkaadii yidiiztsʼą́ą́ʼ, éí dibé yázhí yichʼįʼ nídiilwodgo néiidiiłtı̨́, áádóó yił ázdisgo ádíyóóltąʼgo haghango néiníłtı̨́.
JIIHÓVAH éí díí naʼniłkaadii nahalingo ádaa nitsíkees. Tʼáá bí bizaad biyiʼ ánihiłní: “Tʼáá shí shidibé hadinéeshtaałgo bitah dídéeshʼįįł.” —Ezekiel 34:11, 12.
“Dibé Baa Ádahashyánígíí”
Háísh éí Jiihóvah bidibé danilı̨́? Jó, Jiihóvah bidibé éí ayóóʼádabóʼní dóó bikʼeh dahółʼı̨́įgo bikééʼ deiyíkááh. Diyin Bizaad ání: “Bichʼįʼ yaa ádadiiʼníiłgo bichʼįʼ nidahodiidlaał, Bóhólníihii ánihiilaii bichʼįʼ nitsidadidiigoh! Háálá bí nihiDiyin God nilı̨́, áádóó bikéyah hootsogi bidineʼé naakaígíí niidlı̨́. Jó, bidibé dah yooléełii daniidlı̨́.” (Psalm 95:6, 7) Tʼáá dibé naʼniłkaadii yikééʼ naakai nahalingo, t’áá ákótʼéego Jiihóvah bidineʼé bikééʼ deiyíkááh. Ákoósh éí doo nidaʼiisíih da? Ndagaʼ. Jiihóvah bá nidaalʼaʼí tʼáá dibé nahalingo łaʼ, ‘taoskai,’ ‘yóóʼádahaaskaii,’ doodaiiʼ ‘dibé yóóʼahekáhígi átʼéego yóóʼahikááh.’ (Ezekiel 34:12; Matthew 15:24; 1 Peter 2:25) Ákondi łaʼ átsʼá níyáa ndi, Jiihóvah doo yóóʼabididooʼáał da, tʼáá shaa níjidoodááł yóʼní.
Jiihóvaásh tʼahdii níNaʼniłkaadii nilı̨́įgo baa nitsíníkees? Dííshjı̨́įdi Jiihóvah lá haitʼéego Naʼniłkaadii nilı̨́įgo nihaa áhályą́? Táaʼgo baa chʼíhodootʼááł:
Diyin kʼehgo nihá naʼaltsoʼ. Jiihóvah ádííniid: “Chʼil yílʼáagi daʼałchozh doo; éí daabígo ákwii daʼałchozh doo . . . ákwii chʼil yílʼáagi náhinoojah doo”. (Ezekiel 34:14) Jiihóvah diyin kʼehgo anáʼáłtsoʼ tsʼídá doo yiʼoh nilı̨́į da, éí tʼáá ákogo nizhónígo ałʼąą ádá átʼéego nihá naʼałtsoʼ. Łaʼísh béénílniih naaltsoos yíníłtaʼgo, yáʼátʼéehii haneʼ łaʼda dísínítsʼą́ąʼgo éí doodaiiʼ ndaalkidígíí níníłʼı̨́įgoísh Jiihóvah bee bichʼįʼ sodíínílzin yę́ę, yee níká eelwod. Éí bee Jiihóvah t’ááʼaaníí ayóóʼánóʼnínígíí dóó naa aʼááh nízingo nił ííshjání áyiilaa.
Nihichʼą́ą́h naaghá dóó nihíkáʼanálwoʼ. Jiihóvah tʼáá bí ádee haadzííʼ: “Yóóʼádahaaskaii hadínéeshtaał; . . . nidaʼniłhodii dadiniihgóó bá bikʼídaʼdideesdis, doo bitah dahwiináanii bitah dahółdzilgo áńdadeeshdlííł.” (Ezekiel 34:16) Diné bijéí biʼdiiłʼáhígíí ląʼí yileehgo biniinaa doo bitah dahwiináanii Jiihóvah bitah dahółdzilgo ánéíłʼı̨́. Dibé atídabiʼdiilyaa nahalingo, Jiihóvah bidineʼé łaʼ yínííł yileehgo yaa aʼááh nízin dóó yaa áhályą́ągo néiidoołdzih—azhą́ shı̨́ı̨́ náánáłaʼ oodlání bíniʼ yiyiiłʼaʼ ndi, átsʼá dahidinéeskaiígíí dóó doo yáʼáshǫ́ǫ́góó nitsídaahkeesígíí ninéiyiiʼéésh.
Nihaa áháyą́ągi t’áá shidéétʼiʼ nízin. Jiihóvah ání: ‘Ałtso taoskai yę́ę yisdánáhideeshnił,’ dóó “yóóʼádahaaskaii hadínéeshtaał.” (Ezekiel 34:12, 16) Jiihóvah éí łaʼ bidibé yóóʼííyáhígíí éí doo yóóʼiidííʼą́ą da. Bidibé t’áá ałtso yééhósin, łaʼ yóóʼííyáago, haidínóotaał dóó yikʼi naʼneeztą́ąʼgo yaa bił hózhǫ́ǫ łeh. (Matthew 18:12-14) Jó, díí átʼéego Jiihóvah bidineʼé yaa nitsíkees, “dibé naakaígíí shidibé danohłínígíí éí diné danohłı̨́” dóó nihaa áháshyáanii danohłı̨́. (Ezekiel 34:31) Ní éí atah bidibé nílı̨́.
Dibé yóóʼ ííyáhígíí éí Jiihóvah doo yóóʼiidííʼą́ą da. Dibé yikʼínáneeztą́ą́ʼgo yaa bił hózhǫ́ǫ łeh
“Ałkʼidą́ą́ʼ Nihídayééłkaah Yę́ęgi Átʼéego Ániidí Ánánihídlééh”
Haʼátʼíísh biniyé Jiihóvah níká déezʼı̨́ı̨́ʼ dóó shaa nídíídááł nóʼní? Jó, nił hózhǫ́ǫ doogo ná yinízin. “Nahałtinígíí” nahalingo, bidibé bee “hakʼihojidlíigo átʼée doo” níigo yee ádee haadzííʼ. (Ezekiel 34:26) Díí yee ádee haadzííʼígíí tʼáá aaníinii átʼé. Ni tʼáá íídą́ą́ʼ Jiihóvah níká eelwodgo nił bééhózin.
Béénílniih, Jiihóvah áłtsé bééhosínísįįd yę́ędą́ą́ʼ. Haalá lá yitʼéego nijéí yidiyiisʼnááʼ? Jiihóvah bízhiʼ bíhwiiniłʼą́ą́ʼ yę́ędą́ą́ʼ dóó diné haʼátʼíí biniyé ályaaígíí, nił lá haitʼé ńtʼééʼ? Béénílniihísh nitsaago áłah náʼádleehgo ałnáánídáahgo, Jiihóvah bidineʼé bił áłhínéíníkáahgo ayóó shı̨́ı̨́ baa nił hózhǫ́ǫ́ ńtʼééʼ. Tʼáá háiida ayóó yíneedlı̨́įgo Diyin Bizaad bee bił nináholnihgo, ayóó shı̨́ı̨́ baa nił hózhǫ́ǫgo hooghandi nináhídááh ńtʼééʼ?
Baa nił hózhǫ́ yę́ę ánéidoodlííł. Tʼáá níléídę́ę́ʼ God bidineʼé kótʼéego sodadilzin, “Achʼįʼ kónanihídlééh, Bóhólníihii nílíinii, áko nichʼįʼ dah nídidiikah; ałkʼidą́ą́ʼ nihídayééłkaah yę́ęgi átʼéego ániidí ánánihídlééh.” (Lamentations 5:21) Díí sodizin Jiihóvah yidiiztsʼą́ąʼ, áádóó bidineʼé ayóó bił dahózhǫ́ǫgo bá nináádaalʼaʼ ńtʼééʼ. (Nehemiah 8:17) Ni ałdóʼ Jiihóvah ná ákódoonííł.
Ákondi, Jiihóvah baa nízhdoodááłígíí tʼáá nanitłʼahgo átʼé. Jiihóvah baa nídíídááłígíi baa nídadíitʼįįł. Háálá baa hodínóotłʼahígíí dahólǫ́ǫ ndi éí tʼáá bikʼeh didíídleeł.
